នៅថ្ងៃទី៣ ខែតុលា ឆ្នាំ២០២៣នេះ នៅសាលប្រជុំសាលាខេត្តសៀមរាប មានបើកកិច្ចប្រជុំស្តីពីការ ចុះចងក្រងករណីសិក្សាល្អៗ ក្នុងការដោះស្រាយបណ្តឹងរបស់ការិយាល័យប្រជាពលរដ្ឋខេត្ត ដើមី្បរៀបចំជាមេរៀនក្នុងការផ្សព្វផ្សាយ ពីសកម្មភាពរបស់ការិយាល័យប្រជាពលរដ្ឋ ព្រមទាំងពង្រឹងប្រសិទ្ធភាពលើការបំពេញតួនាទី ភារកិច្ច របស់អង្គភាពមួយនេះ នៅថ្នាក់ក្រោមជាតិ។
តាមការបង្ហាញរបស់ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប រយៈពេលជិត ០៥ឆ្នាំមកនេះ គិតចាប់ពីឆ្នាំ២០១៩ រហូតដល់ចុងខែកញ្ញា ឆ្នាំ២០២៣នេះ ការិយាល័យប្រជាពលរដ្ឋខេត្ត ទទួលបានពាក្យបណ្តឹងក្នុងសមត្ថកិច្ចចំនួន ១៥៣ករណី បណ្តឹងក្រៅសមត្ថកិច្ចចំនួន ២២ករណី និងព័ត៌មានផ្សេងៗចំនួន ៣៣ករណី។ ទន្ទឹមនោះ ការិយាល័យប្រជាពលរដ្ឋខេត្ត បានខិតខំប្រឹងប្រែងបម្រើសេវាជូនប្រជាពលរដ្ឋដោយសម្របសម្រួលដោះស្រាយ ស៊ើបអង្កេត រាយការណ៍ និងផ្តល់អនុសាសន៍ទៅលើបណ្តឹងរដ្ឋបាល ដែលស្ថិតនៅក្នុងដែនសមត្ថកិច្ចរបស់ខ្លួន។ លើសពីនោះ ប្រជាពលរដ្ឋខេត្ត ក៏បានសហការ សម្រាប់បទសម្ភាសន៍ជាមួយក្រុមការងារអគ្គនាយកដ្ឋានរដ្ឋបាល ក្រសួងមហាផ្ទៃ ដើម្បីប្រមូលព័ត៌មានអំពីបទពិសោធន៍ជោគជ័យឱ្យបានរលូន និងទទួលបានជោគជ័យបន្តទៀត។
ឯកឧត្តម ឌុក ណារ៉េត ទីប្រឹក្សាក្រសួងមហាផ្ទៃ លើកឡើងថា កម្មវិធីគោលនយោបាយរបស់រាជរដ្ឋាភិបាល នីតិកាលទី៧ ដែលមានគោលដៅយុទ្ធសាស្ត្រទាំង៥ ក្នុងនោះយុទ្ធសាស្ត្រទី៤ គឺបន្តពង្រឹងសមត្ថភាពអភិបាលកិច្ច និង គុណភាពស្ថាប័ន ទាំងថ្នាក់ក្រោមជាតិ ដើមី្បធានាឲ្យបាននូវប្រសិទ្ធភាពសេវាសាធារណៈ ។ ចំពោះស្នូលនៃយុទ្ធសាស្ត្រ មានកិច្ចការអាទិភាពចំនួន៥ ក្នុងនោះអាទិភាពទី៣ នឹងលើកកម្ពស់ និងពង្រឹងភាពស្អាតស្អំនៅក្នុងរដ្ឋបាលសាធារណៈ។
ឯកឧត្តម ឌុក ណារ៉េត ក៏បានលើកនូវគោលការណ៍ ក្នុងការចាត់វិធានការណ៍ដោះស្រាយបណ្តឹង ក្នុងសមត្ថកិច្ចស្របតាមគោលការណ៍ណែនាំ និង សាច់រឿងកើតឡើងពិតប្រាកដ ដែលមានភាពទាក់ទាញ និង ផ្តល់នូវមេរៀនល្អៗ ព្រមទាំងចងក្រង នឹងផ្សព្វផ្សាយ ជាសាធារណៈដល់គោលដៅផ្សេងទៀត និងអ្នកពាក់ព័ន្ធដោយមានការឯកភាពអង្គភាពសាមី ដោយមានការលាក់នូវអត្តសញ្ញាណអ្នកប្តឹង និង អ្នកត្រូវគេប្តឹង ។
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
