នៅព្រឹកថ្ងៃទី៤ ខែតុលា ឆ្នាំ២០២៣នេះ ឯកឧត្តម តោ គឹមស៊ាន សមាជិកក្រុមប្រឹក្សាខេត្ត និង លោក អ៊ឹង គឹមលាង អភិបាលរងខេត្តសៀមរាប ដោយមានការចូលរួមពីអស់លោកលោកស្រី ក្រុមការងារខេត្តចុះជួយស្រុក មន្ត្រីរាជការ និងអាជ្ញាធរស្រុក បាននាំយកទេយ្យវត្ថុ គ្រឿងឧបភោគបរិភោគចំនួន ១០មុខ និងបច្ច័យចំនួន ៣.១១៥.០០០រៀល ចូលរួមកាន់បិណ្ឌវេនទី៥ នៅវត្តព្រលឹត ស្ថិតក្នុងឃុំល្វា ស្រុកពួក ខេត្តសៀមរាប។
មានប្រសាសន៍នាឱកាសនោះ លោក អ៊ឹង គឹមលាង បានលើកឡើងថា ក្នុងរដូវបុណ្យកាន់បិណ្ឌ និងភ្ជុំបិណ្ឌនាឆ្នាំនេះ ក៏ដូចបណ្តាឆ្នាំកន្លងមក រដ្ឋបាលខេត្តរួមជាមួយមន្ត្រីរាជការ តែងតែមានសទ្ធាជ្រះថ្លាក្នុងវិស័យព្រះពុទ្ធសាសនា ដោយបាននាំមកនូវទេយ្យវត្ថុ គ្រឿងឧបភោគបរិភោគ និងបច្ច័យមួយចំនួន ដើម្បីចូលរួមក្នុងកម្មវិធីផ្សេងៗ មិនដែលខកខាននោះឡើយ។ ជាក់ស្តែងឆ្នាំនេះ ទោះជាស្ថានភាពក្នុងរយៈពេលប៉ុន្មានថ្ងៃ ខេត្តសៀមរាប ស្រុកមួយចំនួនទទួលរងគ្រោះជំនន់ទឹកភ្លៀងយ៉ាងធ្ងបណ្តាលប៉ះពាល់ហេដ្ឋារចនាសម្ព័ន្ធ ផ្ទះសម្បែង ផលដំណាំយ៉ាងណាក៏ដោយ ក៏នៅតែបន្តចូលរួមកាន់បិណ្ឌ នៅតាមបណ្តាវត្តអារាម ក្នុងគោលបំណងចូលរួមផ្គត់ផ្គង់ចង្ហាន់ដល់ព្រះសង្ឃដែលគង់ចាំព្រះវស្សា ដែលមានរយៈពេល១ត្រីមាស និងសមណសិស្សកំពុងសិក្សាក្នុងទីវត្តអារាមផងដែរ។
ជាក់ស្ដែងពិធីបុណ្យកាន់បិណ្ឌ និងបុណ្យភ្ជុំបិណ្ឌ គឺជាបុណ្យធំជាងគេនៅក្នុងចំណោមបុណ្យផ្សេងៗទៀត ដែលប្រជាពុទ្ធបរិស័ទខ្មែរ កាន់ព្រះពុទ្ធសាសនា តែងតែចូលរួមអភិរក្ស ថែរក្សាមិនឲ្យបាត់បង់ប្រយោជន៍ទុកសម្រាប់កូនចៅជំនាន់ក្រោយៗប្រតិបត្តិ។ នៅក្នុងអំឡុងរដូវបុណ្យកាន់បិណ្ឌ និងភ្ជុំបិណ្ឌ គឺជារដូវវស្សាមានរលឹម ភ្លៀងផ្គរ ជោគជាំ តែងតែបង្កការលំបាកដល់ព្រះសង្ឃ ពេលធ្វើគោចរបិណ្ឌបាត្រ ដូចនេះហើយបានជាពុទ្ធបរិស័ទយើងបានបង្កើតកម្មវិធីវេនកាន់បិណ្ឌនេះឡើង មានរយៈពេល១៥ថ្ងៃ ទាំងថ្ងៃភ្ជុំបិណ្ឌ ដើម្បីបង្កភាពងាយស្រួលដល់ព្រះសង្ឃគ្រប់ទីវត្តអារាម។ ទាំងនេះដោយសារការដឹកនាំដ៏ត្រឹមត្រូវ របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ក៏ដូចសម្តេចធិបតី ហ៊ុន ម៉ាណែត នាយករដ្ឋមន្ត្រី នីតិកាលទី៧ ធ្វើឲ្យប្រទេសជាតិមានសុខសន្តិភាព ស្ថេរភាព និងអភិវឌ្ឍន៍រីកចម្រើន ទាំងវិស័យពុទ្ធចក្រ និងអាណាចក្រ។
ក្នុងនាមក្រុមប្រឹក្សាខេត្ត គណៈអភិបាលខេត្ត លោកក៏សូមអំពាវនាវដល់ប្រជាពុទ្ធបរិស័ទ ក្នុងរដូវវស្សានេះ គប្បីបង្កើនការប្រុងប្រយ័ត្ន អំពីគ្រោះទឹកជំនន់ដែលពេលថ្មីៗ។ ជាមួយគ្នានោះលោកបានក្រើនរំលឹកទៅដល់ប្រជាពលរដ្ឋត្រូវបន្តយកចិត្តទុកដាក់ អំពីបញ្ហាសុខុមាលភាពផ្ទាល់ខ្លួន និងធ្វើការដាំដុះឡើងវិញ ក្រោយពីទឹកសម្រក់ ដើម្បីបង្កើនជីវភាពឲ្យកាន់តែប្រសើរឡើង៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
