អាជ្ញាធរខេត្តសៀមរាប បានណែនាំដល់គ្រប់មន្ត្រីពាក់ព័ន្ធទាំងអស់ ត្រូវពង្រឹងបន្ថែមលើការងារបង្ក្រាបបទល្មើសជលផលទូទាំងខេត្តសៀមរាប ខណៈដែរគិតត្រឹមរយៈពេល ១០ខែ ក្នុងឆ្នាំ២០២៣នេះ ហាក់កំពុងមានចំនួនច្រើនគួរឲ្យកត់សម្គាល់។
ថ្លែងក្នុងកិច្ចប្រជំុំពិភាក្សា និងពិនិត្យវឌ្ឍនភាពការងារចុះបង្ក្រាបបទល្មើសជលផលក្នុងភូមិសាស្ត្រខេត្តសៀមរាប នៅរសៀលថ្ងៃទី៣ ខែតុលា ឆ្នាំ២០២៣នេះ លោក អ៊ឹង គឹមលាង អភិបាលរងខេត្តសៀមរាប បានមានប្រសាសន៍ថា កិច្ចប្រជុំនាពេលនេះដែរ គឺដើម្បីប្រមូលធាតុចូលសំខាន់ៗបន្ថែមទៀតពីគ្រប់ភាគីពាក់ព័ន្ធ ពិសេសជាមួយគណៈបញ្ជាការកងឯកភាពក្រុងស្រុកទាំង៦ដែល ទាក់ទងនឹងស្ថានភាពភូមិសាស្រ្តមុខសញ្ញាជនល្មើសជលផល ដោយប្រើឧបករណ៍នេសាទសំខាន់ៗដែលជនល្មើសប្រើប្រាស់ ត្រូវវិធានការ ឬយន្តការទប់ស្កាត់ និងបង្គ្រាបកន្លងមកអោយមានប្រសិទ្ធផលខ្ពស់។ ក្នុងនោះលោកក៏បានដាក់ចេញនូវបទបញ្ជា និងវិធានការមួយចំនួនដល់គ្រប់សមត្ថកិច្ច នៃកងកម្លាំងប្រដាប់អាវុធ និងគណៈបញ្ជាការឯកភាពក្រុងស្រុក ក្នុងការគ្រប់គ្រង និងបង្ក្រាបនូវរាល់សភាពការណ៍ ដែលកើតមានឡើងនៅតាមមូលដ្ឋាន។ ត្រូវស្រាវជ្រាវរាល់សំណុំរឿងបទល្មើសនេសាទ ដែលស្ថិតក្រោមសមត្ថកិច្ចរបស់ខ្លួន ដើម្បីយកមកចាត់ការតាមច្បាប់ឱ្យបានឆាប់រហ័ស ដោយម៉ឺងម៉ាត់ និងប្រកបដោយការទទួលខុសត្រូវខ្ពស់ សំដៅពង្រឹងប្រសិទ្ធភាពច្បាប់ និងការពារធនធានធម្មជាតិ ពិសេសធនធានជលផលនៅតំបន់បឹងទន្លេសាប។
លោកអភិបាលរងខេត្ត មានប្រសាសន៍ថា ស្របជាមួយវិធានការទាំងនេះ ការកំណត់ឧបករណ៍សំខាន់មួយចំនួន ដែលជនល្មើសប្រើប្រាស់ធ្វើឲ្យប៉ះពាល់ធ្ងន់ធ្ងរដល់ធនធានជលផល ដើម្បីធ្វើការបង្ក្រាបជាបន្ទាន់ ត្រូវតាមដានត្រួតពិនិត្យជាប្រចាំនូវរាល់សកម្មភាពល្មើសជលផលជាប្រចាំ និងធ្វើអន្តរាគមន៍តាមការចាំបាច់ហើយត្រូវធ្វើការធ្វើជំរឿន និងការស្រាវជ្រាវ រកឧបករណ៍ និងមធ្យោបាយដែលប្រព្រឹត្តបទល្មើសជាបន្ទាន់។ ត្រូវពង្រឹងការអនុវត្តច្បាប់ឱ្យបានម៉ឺងម៉ាត់ និងដោយគ្មានការយោគយល់ចំពោះបទល្មើសនេសាទ និងជនល្មើសនេសាទ ដែលបំផ្លិចបំផ្លាញធនធានជលផលនៅតំបន់បឹងទន្លេសាប។ ជាមួយគ្នានោះដែរ លោកក៏បានណែនាំឱ្យអាជ្ញាធរមូលដ្ឋានក្រុងស្រុក និងបណ្តាអង្គភាពពាក់ព័ន្ធ ត្រូវអនុវត្តនូវផែនការខាងលើតាមភារកិច្ចរៀងៗខ្លួន ប្រកបដោយស្មារតីទទួលខុសត្រូវ និងប្រសិទ្ធភាពខ្ពស់ ដើម្បីធានាឱ្យដំណើរប្រព្រឹត្តទៅ ប្រកបដោយការទទួលខុសត្រូវ និងជោគជ័យគ្រប់កម្មវិធីខាងលើ។
បើតាមលោក ធិន នីសុទ្ធី នាយខណ្ឌរដ្ឋបាលជលផលសៀមរាប បានឲ្យដឹងថា រយៈពេលមួយឆ្នាំ២០២២ កម្លាំងជំនាញបានធ្វើការបង្ក្រាប និងទប់ស្កាត់បទល្មើសជលផលបានចំនួន ៣០៣ករណី និងបានបញ្ជូនទៅសាលាដំបូងខេត្តចំនួន ៣៦ករណី។ ដោយឡែកសម្រាប់ឆ្នាំ២០២៣នេះវិញ គិតត្រឹមរយៈពេល ១០ខែ កម្លាំងចម្រុះបានធ្វើការបង្ក្រាប និងទប់ស្កាត់បានចំនួន ២៤០ករណី ក្នុងនោះរួមាន៖ ឧបករណ៍ ប ចំនួន ១១៣ករណី, ឧបករណ៍ស្បៃមុង ៤៤ករណី, ឧបករណ៍សន្ទូចរនង ១៧ករណី, ឧបករណ៍ឈ្នក់ ១៦ករណី, ឧបករណ៍មងពាក់ ២២ករណី, ឧបករណ៍ឆកត្រី ១៥ករណី, ឧបករណ៍ឈិបយន្ត ៣ករណី, ឧបករណ៍លបប្រើស១១០ ចំនួន ៦ករណី, ឧបករណ៍អុសអួនទឹកសាប ១ករណី និងកាប់ឆ្ការគាស់រានឈុសឆាយព្រៃលិចទឹក ៣ករណី។ បានធ្វើការបំផ្លាញចោលនៅនឹងកន្លែង ២៣២ករណី, លែងត្រីចម្រុះចូលក្នុងទន្លេវិញបានចំនួន ២.៦៥៩គីឡូក្រាម និងបានបញ្ជូនសំណុំរឿងទៅសាលាដំបូងខេត្ត ៨ករណី និងបញ្ជូនខ្លួនជនសង្ស័យ ៩នាក់ទៅកាន់តុលាការទៀតផង។
ជាមួយបញ្ហានេះ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និង នេសាទខេត្ត ក៏បានអំពាវនាវដល់បងប្អូនប្រជានេសាទទាំងអស់ ដែលកំពុងនេសាទ និងរក្សាទុកឧបករណ៍នេសាទល្មើសច្បាប់មានដូចជា៖ អួនអូសទឹកសាប អាំងវ៉ិចទ័រឆក់ត្រី ម៉ាញ់ ឈិបយន្ត កន្ត្រងអូសលៀសដោយម៉ាស៊ីន និងឧបករណ៍នេសាទដែលបង្កើតថ្មី ឬឧបករណ៍នេសាទដែលគ្មានកំណត់ក្នុងប្រកាសរបស់ក្រសួងកសិកម្ម រុក្ខាប្រមាញ់ និងនេសាទ ព្រមទាំងឧបករណ៍នេសាទល្មើសច្បាប់ដទៃទៀត ត្រូវប្រគល់ជូនអាជ្ញាធរមានសមត្ថកិច្ចនៅក្នុងមូលដ្ឋានរៀងៗខ្លួន ទើបករណីបទល្មើសជលផលអាចទប់ស្កាត់បាន៕
អត្ថបទ និងរូបភាព៖ លោក អ៊ុន ណារាជ្យ
