ថ្លែងក្នុងឱកាសដឹកនាំមន្ត្រីរាជការ និងអាជ្ញាធរស្រុក និងប្រជាពលរដ្ឋ នាំយកទេយ្យវត្ថុប្រគេនដល់ព្រះសង្ឃ ចូលរួមកាន់បិណ្ឌវេនទី៥ នៅវត្តកោះកែវមុន្នីរង្សី ហៅវត្តស្នាសង្គ្រាម ក្នុងឃុំបល្ល័ង្ក ស្រុកប្រាសាទបាគង ខេត្តសៀមរាប នៅព្រឹកថ្ងៃទី៤ ខែតុលា ឆ្នាំ២០២៣នេះ លោក ពិន ប្រាកដ អភិបាលរងខេត្ត បានលើកឡើងថា វិស័យព្រះពុទ្ឋសាសនា រួមនឹងសាសនាផ្សេងៗទៀតនៅកម្ពុជា អាចរីកចំរើនទៅបាន គឺអាស្រ័យដោយសារប្រទេសជាតិទាំងមូលមានសុខសន្តិភាពពេញលេញ ប្រទេសជាតិមានការអភិវឌ្ឍន៍រីកចម្រើនលើគ្រប់វិស័យ ប្រជាពលរដ្ឋរស់នៅក្នុងភាពសុខដុមរមនា និងមានជីវភាពល្អប្រសើរផងដែរ។
លោក ពិន ប្រាកដ មានប្រសាសន៍ថា ដោយសារសុខសន្តិភាពនេះហើយ ទើបប្រជាពុទ្ឋបរិស័ទមានឱកាសប្រកបកិច្ចការរកស៊ីជួញដូរដោយមិនមានការភ័យខ្លាច ដែលញ៉ាំងឱ្យកំរិតនៃសេដ្ឋកិច្ច និងជីវភាពក្នុងគ្រួសារចេះតែរីកលូតលាស់ ហើយពួកគាត់រីករាយ និងជ្រះថ្លាក្នុងការមកធ្វើបុណ្យទានផ្សេងៗ មានសុខសន្តិភាពទើបយើងមានឱកាសបានបំពេញបុណ្យតាមកាលវេលា តាមគន្លងប្រពៃណីពីជីដូនជីតាបានពេញលេញដោយគ្មានក្តីបារម្ភ ហេតុនេះសូមពុកម៉ែបងប្អូននាំគ្នា រក្សាសុខសន្តិភាពនេះ ឱ្យនៅស្ថិតស្ថេរគង់វង្ស សម្រាប់ជាគ្រឺះក្នុងកិច្ចការអភិវឌ្ឍជាតិមាតុភូមិយើងជាបន្តទៅទៀត ដើម្បីទុកជាកេរដំណែលដល់កូនចៅ ជំនាន់ក្រោយរបស់យើង។
លោកអភិបាលរងខេត្ត មានប្រសាសន៍បន្ថែមថា ជាក់ស្ដែងពិធីបុណ្យភ្ជុំបិណ្ឌជាបុណ្យប្រពៃណីខ្មែរ ដែលប្រជាពុទ្ធបរិស័ទខ្មែរគ្រប់រូបតែងតែធ្វើជារៀងរាល់ឆ្នាំ ដើម្បីឧទ្ទិសកុសលផលបុណ្យជូនជីដូនជីតា ញាតិការទាំង៧សណ្តាន ដែលលោកបានចែកឋានទៅកាន់លោកខាងមុខហើយនោះ សូមឲ្យលោកបានទៅកាន់សុគតិភព នឹងសូមឲ្យកូនចៅដែលនៅមានជីវិតរស់រានឲ្យជួបប្រទះតែសេចក្តីសុខចំរើន។ ជាមួយគ្នានោះក៏ជាការឧទ្ទិសជូនដល់ដួងវិញ្ញាណក្ខ័ន្ត កម្មាភិបាល យុទ្ធជន យុទ្ធនារី ដែលបានពលីក្នុងបុព្វហេតុរំដោះជាតិ កសាងការពារមាតុភូមិ ព្រមទាំងបងប្អូនរងគ្រោះដែលបានស្លាប់ទៅដោយភាពអយុត្តិធម៌ និងជួយរំដោះឲ្យរួចចាកផុតពីទុក្ខទោសទាំងឡាយដែលជាឧបាយភូមិណាមួយ និងឲ្យបានទៅកាន់សុគតិភពថ្មី ហើយងាកក្រោយមកជួយបីបាច់ថែរក្សាកូនចៅ ឲ្យមានសេចក្តីសុខសប្បាយក្នុងក្រុមគ្រួសារ និងសង្គមជាតិផងដែរ។
សម្រាប់ទេយ្យវត្ថុមានគ្រឿងឧបភោគបរិភោគ ដែលបានប្រគេនដល់ព្រះសង្ឃនាពេលនោះ រួមមាន៖ បច្ច័យ ២.០០០.០០០រៀល អង្គរ ២៥០គីឡូក្រាម ត្រីខកំប៉ុង ១កេស មី ៥កេស ស្ករ ១០គីឡូក្រាម ទឹកស៊ីអ៊ីវ និងទឹកត្រី ៨យូរ ទឹកបរិសុទ្ធ និងទឹកក្រូច ២០កេស រួមនិងទេយ្យវត្ថុមួយចំនួនទៀត៕
អត្ថបទ និង រូបភាព៖ លោក អ៊ុន ណារាជ្យ
