មន្ត្រីជាន់ខ្ពស់អាកាសចរណ៍ស៊ីវិល បានឱ្យដឹងថា ការដាក់រូបព្រហ្ម នៅព្រលានយន្ដហោះអន្ដរជាតិសៀមរាប-អង្គរ គឺជាការបង្ហាញនូវការស្វាគមន៍ដោយកក់ក្ដៅ ប្រកបដោយស្នាមញញឹមដល់ភ្ញៀវទេសចរជាតិ និងអន្ដរជាតិ ដែលបានធ្វើដំណើរមកដល់អាកាសយានដ្ឋានខ្នាតអន្ដរជាតិ នៃទឹកដីសៀមរាបអង្គរមួយនេះ។
ឯកឧត្ដម ប៊ុន រដ្ឋា ទីប្រឹក្សា រដ្ឋលេខាធិការដ្ឋានអាកាសចរណ៍ស៊ីវិល និងជានាយកអាកាសយាន្ដដ្ឋានអន្ដរជាតិសៀមរាប-អង្គរ បានបញ្ជាក់នៅថ្ងៃទី៥ ខែតុលានេះថា ចម្លាក់ព្រហ្មនៅកណ្ដាលអាគារព្រលានយន្ដហោះអន្ដរជាតិសៀមរាប-អង្គរ មានកំពស់៧ម៉ែត្រកន្លះ សាងសង់ពីស្ពាន់ ដោយគោលបង្ហាញពីស្នាមញញឹមរបស់ប្រជាជនខ្មែរ ដល់ភ្ញៀវទេសចរជាតិនិងអន្ដរជាតិ ដែលបានមកដល់ទឹកដីអង្គរ ជាពិសេសបានបញ្ជាក់ពីអាកាសយាន្ដអន្ដរជាតិអង្គរ បានសាងសង់នៅទឹកដីបេតិភណ្ឌពិភពលោក ដែលមានរូបព្រហ្ម នៅតាមប្រាសាទបុរាណ ដែលជាវប្បធម៌របស់ខ្មែរ។
ឯកឧត្ដមបានបញ្ជាក់ទៀតថា ការសាងស់ព្រលានយន្ដហោះដែលល្អឥតខ្ចោះនេះ កើតឡើងបានដោយសារប្រទេសជាតិមានសុខសន្ដិភាព ហើយបន្ទាប់ពីបើកដំណើរការផ្លូវការហើយ អាកាសយានដ្ឋាននេះ នឹងបាននាំចូលនូវផលលាភជាច្រើនដល់ប្រទេសកម្ពុជា ជាពិសេសខេត្ដសៀមរាប ដូចជាទេសចរ និងទំនិញជាដើម។
សូមបញ្ជាក់ជូនថា៖ អាកាសយានដ្ឋានអន្តរជាតិសៀមរាបអង្គរ បានវិនិយោគទឹកប្រាក់ចំនួន ១,១០០លាន ដុល្លារអាមេរិក មានចំណតសម្រាប់ចតអាកាសយានចំនួន៣៨ ចំណតមានសមត្ថភាពទទួលអ្នកដំណើរតាមផ្លូវអាកាសបាន៧លាននាក់ក្នុងឆ្នាំ២០២៤ និង១២លាននាក់ក្នុងឆ្នាំ២០៤០ខាងមុខមានសមត្ថភាពផ្ទុកទំនិញតាមផ្លូវអាកាសបានចំនួន១០,០០០តោនក្នុងឆ្នាំ២០២៤ និង២៦,០០០ តោនក្នុងឆ្នាំ២០៤០ខាងមុខ អាចទទួលជើងហោះហើរបានចំនួន ៦៥,៨០០ជើងក្នុងឆ្នាំ២០២៤ និង១១២,៧០០ ជើង ក្នុងឆ្នាំ ២០៤០៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
