ក្នុងកិច្ចប្រជុំគណៈបញ្ជាការឯកភាពខេត្តសៀមរាប នារសៀលថ្ងៃទី៩ ខែតុលា ឆ្នាំ២០២៣ ឯកឧត្តម ប្រាក់ សោភ័ណ អភិបាលខេត្តសៀមរាប គូសបញ្ជាក់ថា គ្រោះថ្នាក់ចរាចរណ៍នៅតែជាបញ្ហាប្រឈមទៅដល់ការធ្វើដំណើររបស់ប្រជាពលរដ្ឋ ទោះបីមានរបាយការណ៍ពីចំនួនថយចុះករណីគ្រោះថ្នាក់ ក្នុងភូមិសាស្ត្រខេត្តសៀមរាបក្ដី។
ឯកឧត្តម ប្រាក់ សោភ័ណ បន្តថា កន្លងមកការរឹតបន្តឹងការអនុវត្តន៍ច្បាប់ចរាចរណ៍ ក៏ដូចជាការផាកពិន័យ ជាការខិតខំបំពេញភារកិច្ចប្រចាំថ្ងៃទៅតាមគោលដៅរបស់សមត្ថកិច្ច ប៉ុន្តែប្រជាពលរដ្ឋ ដែលបានល្មើសច្បាប់ចរាចរណ៍ គ្រាន់តែយល់ថា ល្មើសច្បាប់បង់ពិន័យ ដោយមិនបានគិតពីអាយុជីវិតខ្លួនឯង និងអ្នកដទៃឡើយ។
ជាមួយនោះ ឯកឧត្តម អភិបាលខេត្ត បានណែនាំ ដល់អ្នកភាគីពាក់ព័ន្ធ ចំពោះការអនុវត្តវិធានការច្បាប់រឹតបន្តឹងនាពេលខាងមុខនេះ មន្ទីរសាធារណការ និងដឹកជញ្ជូនខេត្តសៀមរាប ក៏ដូចជាអាជ្ញាធរក្រុង ស្រុក ត្រូវខិតខំសហការជាមួយនគរបាលចរាចរណ៍ខេត្តសៀមរាប ធ្វើយ៉ាងណាចុះធ្វើការអប់រំផ្សព្វផ្សាយដល់ប្រជាពលរដ្ឋឲ្យបានញឹកញាប់ សំដៅ ធ្វើយ៉ាងណាឲ្យពួកគាត់បានយល់ដឹងអំពីគ្រោះថ្នាក់ ដែលកើតឡើងពីការមិនគោរពច្បាប់ចរាចរណ៍។ បន្ថែមលើនោះ អាជ្ញាធរក្រុង និងសមត្ថកិច្ចពាក់ព័ន្ធ ត្រូវធ្វើការណែនាំដល់សាធារណជន ពិសេសបងប្អូនប្រជាពលរដ្ឋដែលរស់នៅជាប់ផ្លូវទាំងអស់ មិនអនុញ្ញាតឲ្យចតយានយន្តលើចិញ្ជើញផ្លូវ ដែលនាំឲ្យបាត់បង់សណ្តាប់ធ្នាប់ របៀបរៀបរយសាធារណៈ និងឲ្យបាត់បង់នូវសោភ័ណភាព។ ករណីមិនគោរពតាមការណែនាំ សមត្ថកិច្ចពាក់ព័ន្ធទាំងអស់ ត្រូវអនុវត្តន៍វិធានការច្បាប់ ចំពោះអ្នកប្រព្រឹត្តល្មើស។
គួរជម្រាបថា តាមរបាយការណ៍ របស់អគ្គស្នងការដ្ឋាននគរបាលជាតិ សម្រាប់ឆមាសទី១ ឆ្នាំ២០២៣ នៅទូទាំងប្រទេស មានករណីគ្រោះថ្នាក់ចរាចរណ៍ សរុបចំនួន ១ ៥៤៨លើក ដោយគ្រោះថ្នាក់នៅពេលយប់មានរហូតដល់ ៥៤ភាគរយ ដែលបណ្តាលឲ្យមានមនុស្សស្លាប់ចំនួន ៧៥៦នាក់ និងរងរបួសធ្ងន់ ស្រាលចំនួន ២ ០៧២នាក់។ ក្នុងនោះ ករណីដែលកើតឡើងច្រើនជាងគេ មាននៅរាជធានីភ្នំពេញ ចំនួន ៤៥៨លើក ខេត្តព្រះសីហនុ ១២១លើក និងខេត្តពោធិ៍សាត់ ១០៤លើក។
អត្ថបទ និងរូបភាព៖ លោក ជា ស្រស់ និងលោក យូ វង្ស
កែសម្រួល៖ លោក សេង ផល្លី
