រដ្ឋបាលខេត្តសៀមរាប គ្រោងនឹងរៀបចំពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រយៈពេល២ថ្ងៃ គឺចាប់ពីថ្ងៃទី២៦-២៧ ខែវិច្ឆិកា ឆ្នាំ២០២៣ខាងមុខនេះ នៅតាមបណ្តោយដងស្ទឹងសៀមរាប រួមជាមួយនឹងកម្មវិធីកម្សាន្តជាច្រើនទៀត ជូនដល់បងប្អូនប្រជាពលរដ្ឋ ព្រមទាំងភ្ញៀវទេសចរណ៍មកទស្សនាកម្សាន្តអំពីវប្បធម៌ ប្រពៃណីរបស់ប្រជាពលរដ្ឋខែ្មរយើងដែលមានតាំងពីបូរាណមក។
ថ្លែងកិច្ចប្រជុំគណៈកម្មការបច្ចេកទេសបុណ្យអុំទូក បណ្តែតប្រទីប អកអំបុក និងសំពះព្រះខែ នៅខេត្តសៀមរាប នារសៀលថ្ងៃទី៩ ខែតុលា ឆ្នាំ២០២៣នេះ លោក សន សេរីវុទ្ធី នាយកទីចាត់ការធនធានមនុស្ស សាលាខេត្តសៀមរាប បានបញ្ជាក់ថា ការរៀបចំព្រះរាជពិធីបុណ្យអុំទូក បណ្តែតប្រទីប អកអំបុក សំពះព្រះខែនេះ គឺធ្វើឡើងដើមី្បរំលឹក និងគោរពដល់វីរៈភាពនៃបុព្វបុរសទាហានជើងទឹកជំនាន់ដើម ដែលបានពលីជិវិតក្នុងការធ្វើសឹកសង្រ្គាមតាមផ្លូវទឹក ក្នុងការកម្ចាត់ពួកសត្រូវឈ្លានពាន ហើយទទួលបានជ័យជំនះជូនជាតិមាតុភូមិអង្គរនៃយើង។
លោកក៏បានឲ្យដឹងថា សម្រាប់កិច្ចប្រជុំនាពេលនេះដែរ គឺដើមី្បធ្វើការពិភាក្សាគ្នាក្នុងជួរគណៈកម្មការបច្ចេកទេស ដើមី្បធ្វើការរៀបចំក្រុងប្រវត្តិសាស្ត្រសៀមរាបយើងឲ្យមានសោភណ្ឌភាពកាន់តែមានភាពស្រស់ត្រកាលឡើង ក្នុងការទទួលវត្តមានអ្នកទេសចរណ៍ក្រោយពីវិបត្តិកូវីដ-១៩ ជាពិសេសការស្តារឡើងវិញ លើវិស័យទេសចរណ៍ក្នុងខេត្តសៀមរាបយើង ដែលជាក្រុងគោលដៅរបស់ភ្ញៀវទេសចរណ៍លើពិភពលោក ហើយក៏ជាការទាក់ទាញនូវអារម្មណ៍ភ្ញៀវទេសចរណ៍ជាតិ អន្តរជាតិ ចូលមកទស្សនាកម្សាន្តឲ្យកាត់តែច្រើនផងដែរ។ ជាមួយគ្នានោះលោកក៏បានណែនាំដល់ក្រុមការងារទាំងអស់ក្នុងព្រះរាជពិធីបុណ្យអុំទូក ដោយត្រូវផ្តោតជាសំខាន់ទៅលើបញ្ហាបច្ចេកទេសក្នុងផ្គូរផ្គងទូក ការចេញដំណើរពីដើមទីដល់ចុងទី និងត្រូវត្រួតពិនិត្យឲ្យបានល្អិតល្អន់ ចំពោះក្រុមកីឡាករ កីឡាការិនី អំពីសុខភាព និងវិន័យក្នុងការប្រកួត ព្រមទាំងរក្សាឲ្យបានល្អសណ្តាប់ធ្នាប់ទូកមុនចូលការប្រកួត។
ព័ត៌មានជាតិ ថ្មីៗ
ក្នុងនោះដែរ លោកនាយកទីចាត់ការ ក៏បានណែនាំដល់សមាជិកគណៈកម្មការបច្ចេកទេសទាំងអស់ ត្រូវយកចិត្តទុកដាក់ខ្ពស់លើបច្ចេកទេស ដែលគណៈកម្មការយើងមានបទពិសោធន៍ពីបណ្តាឆ្នាំមុនៗ ក្នុងគោលដៅលើកស្ទួយវប្បធម៌ ទំនៀបទំលាប់ប្រពៃណីជាតិ ហើយក៏ជាការផ្សព្វផ្សាយទាក់ទាញអារម្មណ៍ដល់ភ្ញៀវទេសចរជាតិ អន្តរជាតិ ចូលមកទស្សនាកម្សាន្ត នូវសម្បត្តិវប្បធម៌ខ្មែរយើង ដែលសម្បូរទៅដោយប្រាង្គប្រាសាទ រមណីដ្ឋានធម្មជាតិ នៅលើទឹកដីប្រវត្តិសាស្ត្រសៀមរាប ដែលជាទីក្រុងគោលដៅភ្ញៀវទេសចរ នៅលើពិភពលោកផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
