ថ្លែងក្នុងយុទ្ឋនាការដាំកូនឈើចម្រុះប្រមាណជា២ពាន់ដើម និងស្មៅ ១ពាន់ម៉ែត្រក្រឡា នៅតំបន់អង្គរវត្ត នារសៀលថ្ងៃទី១០ ខែតុលា ឆ្នាំ២០២៣ រដ្ឋមន្ដ្រីក្រសួងវប្បធម៌ បានវាយតម្លៃខ្ពស់ក្នុងភាពជាដៃគូរវាងស្ថាប័នរដ្ឋនិងវិស័យឯកជន ក្នុងការចូលរួមដាំកូនឈើនៅតំបន់អង្គរក៏ដូចជាតំបន់ដ៏ទៃទៀត ព្រោះដើមឈើផ្តល់សារៈប្រយោជន៍ច្រើនមិនអាចនឹងគណនាបាននោះទេ ជារួម ការដាំកូនឈើធ្វើឲ្យបរិយាកាសបរិស្ថានធម្មជាតិកាន់តែល្អប្រសើរឡើង និងរក្សាលំនឹងគ្រឺះប្រាសាទព្រមទាំងជួយកាត់បន្ថយឥទ្ធិពលជាអវិជ្ជមានពីការប្រែប្រួលអាកាសធាតុ។
លោកជំទាវបណ្ឌិតសភាចារ្យ ភឿង សកុណា រដ្ឋមន្ដ្រីក្រសួងវប្បធម៌ និងវិចិត្រសិល្បៈ បានចាត់ទុកការចូលរួមដាំកូនឈើរបស់វិស័យឯកជន ក្រោមការសហការគ្នារវាងធនាគារ CIMB និងអាជ្ញាធរជាតិអប្សរា ជាការថែរក្សានូវតម្លៃដែលមានតាំងពីជីដូនជីតាមក ថែរក្សានូវអត្តសញ្ញាណរបស់ជនជាតិខ្មែរ ថែរក្សានូវទំនៀមទំលាប់ បេតិកភ័ណ្ឌរូបបិយនិងអរូបិយរបស់យើង និងក៏ជាផ្នែកមួយចូលរួមលើកស្ទួយវិស័យទេសចរណ៍ ក៏ដូចជាតម្កើងសេដ្ឋកិច្ចកម្ពុជាផងដែរ ព្រោះថាព្រៃឈើ ផ្សារភ្ជាប់នឹងបរិស្ថានៗផ្សារភ្ជាប់ជាមួយទេចរណ៍ បរិស្ថានយើងទាំងអស់គ្នា។ ក្នុងនោះការចូលរួមរបស់វិស័យឯកជនជាមួយស្ថាប័នរដ្ឋនាពេលនេះ ជាគុណតម្លៃក្នុងបំណងតែមួយគឺរួមគ្នាការពារ និងអភិរក្សមរតករបស់ដូនតាខ្មែរឱ្យស្ថិតស្ថេរយូរអង្វែសម្រាប់កូនចៅជំនាន់ក្រោយៗរបស់យើង។
ជាមួយគ្នានោះ លោកជំទាវបានអំពាវនាវដល់ស្ថាប័នរដ្ឋ វិស័យឯកជន ចូលរួមដាំដើមឈើឱ្យបានច្រើន ដើម្បីអភិរក្សសម្បត្ដិបេតិកភណ្ឌជាតិខ្មែរ លើកសោភ័ណ្ឌភាពទេសភាពវប្បធម៌។
លោក ប៊ុន យីន ប្រធាននាយកប្រតិបត្តិធនាគារ CIMB បានឲ្យដឹងថា ការដាំកូនឈើនៅពេលនេះ មានការចូលរួមពីថ្នាក់ដឹកនាំ បុគ្គលិកនៃធនាគារ CIMB មកពីប្រទេសក្នុងតំបន់អាស៊ានដូចជា កម្ពុជា ម៉ាឡេស៊ី ឥណ្ឌូណេស៊ី សឹង្ហបុរី វៀតណាម ថៃ ហ្វីលីពីន សរុបប្រមាណជា ៥០០នាក់។ លោកក៏បានចាត់ទុកការដឹកនាំបុគ្គលិកធនាគារចូលរួមក្នុងយុទ្ឋនាការដាំដើមឈើជាមួយអាជ្ញាធរជាតិអប្សរានេះ ពិតជាមានសារៈប្រយោជន៍សំខាន់ និងរួមចំណែកក្នុងការលើកកម្ពស់ និងថែរក្សាបរិស្ថានធម្មជាតិ ដែល ជាផ្នែកមួយសំខាន់ក្នុងវិស័យទេសចរណ៍កម្ពុជា។ ពីព្រោះ វិស័យទេសចរណ៍កម្ពុជា ត្រូវបានរាជរដ្ឋាភិបាលចាត់ទុកជា វិស័យអាទិភាព បានរួមចំណែកក្នុងការអភិវឌ្ឍសេដ្ឋកិច្ច សង្គម និងការការពារបរិស្ថាន។
សូមបញ្ជាក់ថា គោលការណ៍របស់អាជ្ញាធរជាតិអប្សរា គឺថែរក្សាទេសភាពវប្បធម៌នៅតំបន់អង្គរធ្វើយ៉ាងណាឱ្យ ទេសភាពវប្បធម៌នៅក្នុងតំបន់រមណីយដ្ឋានអង្គរបច្ចុប្បន្នមានភាពស្រស់ស្អាត បៃតងគ្រប់រដូវកាល ក្រោមការយកចិត្តទុកដាក់ថែទាំ ពីសំណាក់អាជ្ញាធរជាតិអប្សរា ដូច្នេះយើងត្រូវបន្តចូលរួមក្នុងកិច្ចការនេះជាបន្តបន្ទាប់ទៀត។ ជាងនោះទៅទៀតដើមឈើមានសារៈសំខាន់បំផុតសម្រាប់មនុស្សជាតិលើសកលលោក៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
