លើកឡើងក្នុងពិធីដង្ហែរក្បួនព្យុហយាត្រា “ដំណើរឆ្ពោះទៅបញ្ឈប់អំពើជួញដូរមនុស្ស” នៅក្រុងសៀមរាប ថ្ងៃទី១១ ខែតុលានេះ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គូសបញ្ជាក់ថា បច្ចុប្បន្នប្រទេសកម្ពុជាកំពុងទទួលបាននូវសន្តិភាព ប៉ុន្តែអំពើជួញដូរមនុស្សនៅលើពិភពលោក នៅមិនទាន់មានសភាពស្ងប់ស្ងាត់ទៅឡើយទេ ដែលទាមទារឱ្យគ្រប់ភាគីពាក់ព័ន្ធទាំងអស់ត្រូវរួមគ្នាទប់ស្កាត់ឲ្យខាងតែបាន។
លោកជំទាវ ជូ ប៊ុនអេង បន្ថែមថា ស្ថិតក្នុងកាលៈទេសៈដែលពិភពលោកកំពុងជួបនូវវិបត្តិដូចបច្ចុប្បន្ននេះ ឧក្រិដ្ឋជនបានឆ្លៀតឱកាសប្រើគ្រប់មធ្យោបាយ ក្នុងការអូសទាញប្រជាពលរដ្ឋ ឱ្យធ្លាក់ចូលក្នុងការកេងប្រវ័ញ្ចរបស់ពួកគេ។ ដូច្នេះព្រឹត្តិការណ៍ដែលមានអ្នកចូលរួមប្រមាណ ៦០០នាក់ នឹងជានិមិត្តរូបនៃការចូលរួមរបស់ប្រជាជនលើពិភពលោក ដើម្បីរួមគ្នាប្រយុទ្ធប្រឆាំងនឹងអំពើជួញដូរមនុស្ស ហើយក៏ចង់បង្ហាញថា ប្រទេសកម្ពុជា នៅមានសុវត្ថិភាព និងប្រឆាំងរាល់អំពើជួញដូរមនុស្សលើគ្រប់រូបភាព។
ចូលរួមក្នុងព្រឹត្តិការណ៍នោះ ក្រុមយុវជន ជាអ្នកផលិតមាតិការតាមបណ្តាញសង្គម បង្ហាញចំណាប់អារម្មណ៍ថា អំពើជួញដូរមនុស្សមានច្រើនទម្រង់ និងបង្កផលប៉ះពាល់ដល់មនុស្សគ្រប់វ័យ សូមជំរុញ និងលើកទឹកចិត្តដល់ជនរងគ្រោះត្រូវក្លាហាន ក្នុងការស្វែងរកការជួយអន្តរាគមន៍ពីអាជ្ញាធរមានសមត្ថកិច្ចតាមរយៈលេខទូរស័ព្ទ១២៨៨ ។
កញ្ញា គ្រីស្ទីន ស្កាហ្វ (Kristen Scharf) នាយិការមូលនិធិ អេ២១ បង្ហាញថា ជនរងគ្រោះដោយសារអំពើជួញដូរ ទទួលរងផលប៉ះពាល់យ៉ាងធ្ងន់ធ្ងរ ទាំងផ្លូវកាយ ផ្លូវចិត្ត និងបង្កការឈឺចាប់ពេញមួយជីវិតរបស់ពួកគេ។ ការជួញដូរមនុស្ស ត្រូវបានគេហៅម្យ៉ាងទៀតថា ទាសភាពសម័យទំនើប នៅតែមានសកម្មភាពគួរឱ្យកត់សម្គាល់ ប៉ុន្តែយើងទាំងអស់គ្នា អាចចូលរួមទប់ស្កាត់ ដើម្បីជួយបញ្ឈប់ទាសភាពសម័យទំនើបនេះបាន។
លោកស្រី យូ សុភា អភិបាលរងខេត្ត និងជាអនុប្រធានអចិន្រ្តៃយ៍ គណៈកម្មាធិការប្រយុទ្ធប្រឆាំងការជួញដូរមនុស្សខេត្តសៀមរាប បានបញ្ជាក់ថា បន្ទាប់ពីរងផលប៉ះពាល់ជាសកល នៃវិបត្តិតជំងឺកូវីដ១៩ ខេត្តសៀមរាប ក៏បានទទួលរងផលជាអវិជ្ជមានផងដែរ ពីជនល្មើសមួយចំនួន ដែលមានបំណងទុច្ចរិត ប្រព្រឹត្តបទល្មើសរំលោភបំពាន ការកេងប្រវ័ញ្ចផ្លូវភេទទៅលើកុមារ តាមរូបភាពផ្សេងៗ។
លោកស្រី បន្ថែមថា អំពើជួញដូមនុស្ស គឺជាវិបត្តិសកលមួយ ដែលបណ្តាប្រទេសជាច្រើនបានជួបប្រទះ ហើយកម្ពុជាយើងក៏ទទួលរងពីវិបត្តិនេះផងដែរ។ ទោះជាយ៉ាងនេះក្តី រាជរដ្ឋាភិបាលកម្ពុជា និងអង្គការដៃគូ ក្នុងនោះអាជ្ញាធរខេត្ត បានប្រឹងប្រែងស្រាវជ្រាវ និងបង្ក្រាប សំដៅរួមគ្នាដោះស្រាយលើបញ្ហាទាំងនេះ ដើម្បីឆ្ពោះទៅសម្រេចឲ្យបានក្នុងការលុបបំបាត់គ្រប់ទម្រង់នៃអំពើជួយញដូមនុស្ស៕
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
