អាជ្ញាធរខេត្តសៀមរាប បានជំរុញដល់គ្រប់វិស័យឯកជនក្នុងខេត្ត ត្រូវពង្រឹងគុណភាពបន្ថែមទៀតទៅលើគ្រប់អាជីវកម្មរបស់ខ្លួន ដើម្បីចូលរួមជាមួយអាជ្ញាធរខេត្ត ផ្ដល់ជូននូវសេវាកម្មប្រកបដោយគុណភាពដល់ភ្ញៀវទេសចរ ស្របតាមផែនការមេអភិវឌ្ឍន៍ទេសចរណ៍ខេត្ត ២០២១-២០៣៥ និងផែនការយុទ្ធសាស្ត្រផ្សព្វផ្សាយ និងទាក់ទាញទេសចរណ៍ខេត្តសៀមរាប ឆ្នាំ២០២៣-២០២៦ ដែលធ្វើយ៉ាងណាទាក់ទាញភ្ញៀវ ទេសចរអន្តរជាតិ និងភ្ញៀវទេសចរផ្ទៃក្នុង ឱ្យត្រលប់មកកម្សាន្តក្នុងខេត្តសៀមរាបឡើងវិញ។
ថ្លៃងក្នុងពិធីបើកឲ្យដំណើរការផ្ទះល្មូន ក្នុងជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វ នៅក្នុងស្រុកសូទ្រនិគម ខេត្តសៀមរាប លោក សុខ ថុល អភិបាលរងខេត្ត នៅថ្ងៃទី១១ ខែតុលានេះ បានមានប្រសាសន៍ថា កន្លងមកការផ្សព្វផ្សាយអំពីទេសចរណ៍ខេត្តសៀមរាប គឺបានដើរស្របទៅនឹងភាពល្បីល្បាញរបស់ប្រាសាទ ពិសេសអង្គរវត្ត ដើម្បីទាក់ទាញភ្ញៀវទេសចរជាតិ និងអន្តរជាតិមកកាន់ខេត្តសៀមរាប ដែលសកម្មភាពនៃការផ្សព្វផ្សាយនេះ ត្រូវបន្តជំរុញបន្ថែមទៀតដើម្បីឆ្លើយតប នឹងតម្រូវការជាក់ស្តែងរបស់ខេត្តសៀមរាបក្នុងមជ្ឈដ្ឋាន ដែលពោរពេញដោយភាពមិនប្រាកដប្រជា និងការប្រកួតប្រជែងខ្ពស់ ក្រោយវិបត្តិនៃជំងឺកូវីដ-១៩ និងការវិវត្តន៍ដ៏ឆាប់រហ័សនៃបច្ចេកវិទ្យា។ ខណៈដែលវិស័យមួយនេះ ត្រូវបានរាជរដ្ឋាភិបាលយកចិត្តទុកដាក់ខ្ពស់ និងជាគោលដៅដ៏ចម្បងបំផុត ដែលចាំបាច់ត្រូវស្តារសកម្មភាពទេសចរណ៍ឡើងវិញ ទាំងការជំរុញចលនាទេសចរណ៍ផ្ទៃក្នុង និងការទាក់ទាញភ្ញៀវទេសចរអន្តរជាតិពីប្រភពទីផ្សារសំខាន់ៗ ។
លោកអភិបាលរងខេត្ត ក៏បានអំពាវនាវដល់វិស័យឯកជន និងគ្រប់ភាគីពាក់ព័ន្ធទាំងអស់ត្រូវចូលរួមសហការ ដើម្បីត្រៀមស្វាគមន៍ភ្ញៀវទេសចរជាតិ និងអន្តរជាតិ ដែលមកកម្សាន្តកម្ពុជា និងជាពិសេសគោលដៅទេសចរណ៍ខេត្តសៀមរាប ក្នុងឱកាសពិធីបុណ្យអុំទូក ដែលនឹងរៀបចំឡើងនាចុងខែវិច្ឆិកាខាងមុខ ឲ្យស្របទៅនឹងការជំរុញ និងការស្តារឡើងវិញនៃវិស័យទេសចរណ៍នៃផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ។ ក្នុងនោះលោកក៏សូមជំរុញដល់ក្រុមការងារផ្ទះល្មូន ត្រូវបន្តយកចិត្តទុកខ្ពស់លើការងារសន្តិសុខ សុវត្ថិភាពចំពោះវត្តមានភ្ញៀវទេសចរ ដោយត្រូវត្រួតពិនិត្យឲ្យបានជាប្រចាំលើការទុកដាក់សត្វតាមរយៈការបង្កើតប្រព័ន្ធការពារ។ ជាពិសេសត្រូវយកចិត្តទុកដាក់ខ្ពស់លើការងារគ្រប់គ្រងបរិស្ថាន និងការផ្ដល់សេវាជូនភ្ញៀវទេសចរប្រកបដោយគុណភាពផងដែរ។
លោក ម៉េង ហ៊ាង ប្រធាន ក្រុមហ៊ុនអង្គរវ៉ាយដ៍ឡាយហ្វ៍ និងអឺឃ្វារៀម បានឲ្យដឹងថា ផ្ទះសត្វល្មូន មានប្រភេទសត្វល្មួនចំនួន ២៨ប្រភេទខុសៗពីគ្នា នាំចូលពីបណ្តាប្រទេសជុំវិញអាស៊ីអាគ្នេយ៍ ដើម្បីកិច្ចការសង្គ្រោះ និងការស្ដារនីតិសម្បទានៃជីវិតសត្វព្រៃ សម្រាប់ផ្តល់ជូនដល់ភ្ញៀវទេសចរ ដើម្បីស្វែងយល់ពីកិច្ចការអភិរក្សពួកគេ។ ភាគច្រើននៃសត្វល្មូន ត្រូវបានសង្គ្រោះពីការជួញដូរខុសច្បាប់ ពីស្ថានភាពគ្រោះថ្នាក់ ឬរងរបួសក្នុងព្រៃ ដោយផ្ដល់អោយពួកគេនូវបរិស្ថានមួយ មានលក្ខណះធម្មជាតិ និងសុវត្តិភាព ខណៈដែលឧរង្គសត្វរងការគំរាមកំហែង និងកំពុងឈម ដែលទាមទារឱ្យភ្ញៀវទេសចរណ៍អោយចូលរួមចំណាត់ការក្នុងកិច្ច ការការពារ ទីជម្រករបស់ពួកគេ។ ផ្ទះឧរង្គសត្វដែលកំពុងត្រូវរក្សាទុក ក្នុងនោះរួមមាន អណ្ដើកហ្លួង ត្រីក្រពើ ពស់ពភ្លាក់ ពស់វែករនាម ពស់ថ្នាន់ស្រកាហូល ខ្យាដំរី អាពីង និងនៅមានច្រើនទៀត៕
អត្ថបទ និងរូបភាព៖ សហការី
