នៅព្រឹកថ្ងៃទី១១ ខែតុលា ឆ្នាំ២០២៣ លេខាធិការដ្ឋានរៀបចំការបោះឆ្នោតខេត្តសៀមរាប បើកកិច្ចប្រជុំផ្សព្វផ្សាយការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២៣ និងការបោះឆ្នោះដើម្បីជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នាពេលខាងមុខ ដោយមានការចូលរួមពីសំណាក់តំណាងគណបក្សនយោបាយ រួមនិងអ្នកពាក់ព័ន្ធជាច្រើនរូប។
លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោតខេត្តសៀមរាប បានលើកឡើងថា កិច្ចប្រជុំនាពេលនេះ គឺក្នុងគោលបំណងឱ្យការងារដំណើរការនៃការបោះឆ្នោត ដើម្បីជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ខាងមុខ ឲ្យប្រព្រឹត្តទៅដោយរលូន និងទទួលបានជោគជ័យ ស្ថិតក្នុងការធានាបាននូវបរិយាកាសសន្តិសុខ សុវត្ថិភាព និងសណ្តាប់ធ្នាប់ល្អ គ្មានការបំភិតបំភ័យ គ្មានការគំរាមកំហែង និងគ្មានអំពើហិង្សា។
លោក នឹម វ៉ាន់សំ បានបន្តថា ក្នុងការចាត់ចែងរៀបចំការិយាល័យចុះឈ្មោះបោះឆ្នោត ដែលអាចតាំងនៅបន្ទប់ដាច់ដោយឡែក ឬតាំងនៅបន្ទប់ធ្វើការរបស់អគ្គលេខាធិការរដ្ឋសភា ដើម្បីស្រងឈ្មោះអ្នកបោះឆ្នោត និងអង្គបោះឆ្នោតដែលជាតំណាងរាស្ត្រក្នុងតំណែងតាមគំរូបញ្ជីដែលផ្តល់ជូនដោយ គជប យើងត្រូវបិទផ្សាយបញ្ជីឈ្មោះទីតាំងការិយាល័យចុះឈ្មោះបោះឆ្នោត និងបញ្ជីឈ្មោះទីតាំង ការិយាល័យបោះឆ្នោត នៅមុខទីតាំងការិយាល័យចុះឈ្មោះបោះឆ្នោតនៃអគ្គលេខាធិការដ្ឋានរដ្ឋសភាយ៉ាងតិច ៧ថ្ងៃ មុនថ្ងៃចាប់ផ្តើមការចុះឈ្មោះបោះឆ្នោតនោះ ហើយយើងត្រូវបិទផ្សាយប្រតិទិននៃការចុះឈ្មោះបោះឆ្នោតសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នៅមុខទីតាំងដដែលយ៉ាងតិច ៧ថ្ងៃ មុនថ្ងៃចុះឈ្មោះបោះឆ្នោត។ លោកថាការបើកការិយាល័យចុះឈ្មោះបោះឆ្នោត ដើម្បីចុះឈ្មោះបោះឆ្នោតគឺចាប់ពីថ្ងៃទី១៨ ខែតុលា ដល់ថ្ងៃទី៦ ខែវិច្ឆិកា ឆ្នាំ២០២៣ ដោយមិនគិតថ្ងៃសៅ-អាទិត្យ ហើយក្នុងនោះអគ្គលេខាធិការរដ្ឋសភាត្រូវមានវត្តមាននៅការិយាល័យចុះឈ្មោះបោះឆ្នោត ក្នុងអំឡុងពេលនៃការចុះឈ្មោះបោះឆ្នោត ដើម្បីស្រង់ឈ្មោះ និងចុះឈ្មោះជូនតំណាងរាស្ត្រក្នុងតំណែង និងបំពេញទម្រង់បញ្ជីឈ្មោះតំណាងរាស្ត្រក្នុងតំណែង និងផ្ដល់ព័ត៌មានឱ្យបានគ្រប់គ្រាន់ ដល់តំណាងរាស្ត្រក្នុងតំណែងទាំងនោះ។
គួររំលឹកផងដែរថា ចំពោះអគ្គលេខាធិការរដ្ឋសភា ត្រូវស្រង់ឈ្មោះ និងទិន្នន័យតំណាងរាស្ត្រក្នុងតំណែង និងផ្ទៀងផ្ទាត់លក្ខខណ្ឌសម្រាប់ ការចុះឈ្មោះបោះឆ្នោត។ ក្នុងករណីពិនិត្យឃើញថាត្រឹមត្រូវពិតប្រាកដហើយ ត្រូវចុះឈោ្មះគាត់ចូលទៅក្នុងបញ្ជីឈ្មោះតំណាងរាស្ត្រក្នុងតំណែងជារួមតាមគំរូដែលផ្ដល់ជូនដោយ គជប ដោយធានាថា ឈ្មោះ និងទិន្នន័យតំណាងរាស្ត្រក្នុងតំណែងដែលបានចុះក្នុងបញ្ជីឈ្មោះដូចគ្នា ជាមួយនឹងឈ្មោះ និងទិន្នន័យរបស់តំណាងរាស្ត្រក្នុងតំណែងនៅលើលិខិតសម្គាល់ខ្លួនជាតំណាងរាស្ត្រក្នុងតំណែងដែលចេញដោយប្រធានរដ្ឋសភា ហើយធានាថា តំណាងរាស្ត្រក្នុងតំណែងទាំងអស់នៅក្នុងក្របខណ្ឌរាជធានី ខេត្តនៃភូមិភាគ នីមួយៗ ត្រូវបានស្រង់បញ្ចូលទៅក្នុងបញ្ជីឈ្មោះតំណាងរាស្ត្រក្នុងតំណែងបន្ទាប់ពីចុះឈ្មោះ និងទិន្នន័យតំណាងរាស្ត្រក្នុងតំណែង និងពិនិត្យផ្ទៀងផ្ទាត់ឈ្មោះ និងទិន្នន័យបានត្រឹមត្រូវ និងគ្រប់ចំនួនតាមអង្គបោះឆ្នោតហើយ ត្រូវថតចម្លងបញ្ជីនេះបន្ថែម ២ច្បាប់ទៀត រួចអគ្គលេខាធិការរដ្ឋសភាត្រូវចុះហត្ថលេខា បោះត្រាអគ្គលេខាធិការដ្ឋាន រដ្ឋសភា និងកាលបរិច្ឆេទ លើបញ្ជីឈ្មោះតំណាងរាស្ត្រក្នុងតំណែងទាំង ៣ច្បាប់ រួចរៀបចំបញ្ជីឈ្មោះទាំងនោះជូនប្រធានរដ្ឋសភា ដើម្បីស្នើសុំបញ្ជាក់ឲ្យភាពត្រឹមត្រូវ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
