ឯកឧត្តម ប្រាក់ សោភ័ណ អភិបាលខេត្តសៀមរាប មានប្រសាសន៍ថា ការរៀបចំព្រះរាជពិធីបុណ្យអុំទូក បណ្តែតប្រទីប សំពះព្រះខែ និង អកអំបុក នេះ គឺធ្វើឡើងដើមី្បរំលឹក និង គោរពដល់វីរៈភាពនៃបុព្វបុរសទាហានជើង ទឹកជំនាន់ដើម ដែលបានពលីជិវិត ក្នុងការធ្វើសឹកសង្រ្គាមតាមផ្លូវទឹកក្នុងការកម្ចាត់ពួកសត្រូវឈ្លានពានហើយទទួលបានជ័យជំនះជូនជាតិមាតុភូមិអង្គរនៃយើង ហើយរំពឹងទុកថា នឹងមានអ្នកទេសចរជាតិ អន្តរជាតិយ៉ាងច្រើនមកចូលរួមកម្សាន្តសប្បាយនៅក្នុងព្រះរាជពិធីបុណ្យអុំទូកបណ្តែតប្រទីប សំពះព្រះខែ និង អកអំបុក ដែលនឹងប្រព្រឹត្តធ្វើឡើង នៅតាមដងស្ទឹងសៀមរាបនាចុងខែវិច្ឆិកា ឆ្នាំ២០២៣ខាងមុខនេះ។
ឯកឧត្តមមានប្រសាសន៍បែបនេះ នៅក្នុងកិច្ចប្រជុំបច្ចេកទេស របស់គណៈកម្មការរៀបចំព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុកខេត្តសៀមរាប នាព្រឹកថ្ងៃទី ២៤ ខែ តុលា ឆ្នាំ២០២៣ នេះ នៅសាលាខេត្តសៀមរាប ។
ឯកឧត្តមប្រាក់ សោភ័ណ បានបញ្ជាក់បន្ថែមអំពីខ្លឹមសារ នៃយន្តការការរៀបចំពិធីអបអរសាទរព្រះរាជពិធីបុណ្យអុំទូក បណ្តែតប្រទីប សំពះព្រះខែ និង អកអំបុក រួមទាំងការរៀបចំនូវកម្មវិធីកម្សាន្តផ្សេងៗ ជូនដល់បងប្អូនប្រជាពលរដ្ឋទាំងក្នុង និង ក្រៅខេត្ត ព្រមទាំងភ្ញៀវទេសចរ បានទស្សនាកម្សាន្តសប្បាយនិងបានស្វែងយល់បន្ថែម អំពីវប្បធម៌ ប្រពៃណីទំនៀមទំលាប់ របស់ប្រជាពលរដ្ឋខែ្មរយើងដែលបានបន្សល់ទុកតាំងពីយូរលង់ណាស់មកហើយ ព្រមទាំងបានអនុញ្ញាតឲ្យគ្រប់អនុគណៈកម្មការនីមួយៗ លើកឡើងនិងពិភាក្សាទៅលើស្ថានភាពគោលដៅទីតាំង ពេលវេលា វាយតម្លៃសន្និដ្ឋានឱ្យបានត្រឹមត្រូវ ទៅតាមបច្ចេកទេស និងបទពិសោធដែលធ្លាប់បានរៀបចំកាលពីឆ្នាំមុនៗ
ក្នុងកិច្ចប្រជុំ ក៏បានពិភាក្សា ដោយផ្តោតសំខាន់ ទៅលើការងារសន្តិសុខ សណ្តាប់ធ្នាប់សាធារណៈ អនាម័យ សុខភាព បរិស្ថាន អគ្គិសនី ការរៀបចំស្តង់សម្រាប់បងប្អូនអាជីវករ ដែលមានបំណងចូលមកលក់ដូរនៅក្នុងឱកាសបុណ្យអុំទូក និងការប្រគុំតន្ត្រីជូនដល់ភ្ញៀវជាតិអន្តរជាតិរាំកម្សាន្តសប្បាយផងដែរ ។
ព័ត៌មានជាតិ ថ្មីៗ
បន្ទាប់មកឯកឧត្តម ប្រាក់ សោភ័ណ បានណែនាំមួយចំនួនដល់ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក ដែលមានទូកចូលរួម ប្រកួតក្នុងពិធីបុណ្យអុំទូកឱ្យពិនិត្យផ្គូរផ្គងវាយតម្លៃឱ្យបានច្បាស់លាស់ យុត្តិធម៌ ទៅលើកម្លាំងចំណុះទូក ក៏ដូចជាកម្លាំងត្រៀម ចៀសវាងកើតចេញជាបាតុភាពមិនល្អ ព្រោះថារដ្ឋបាលខេត្តក៏បានត្រៀមកញ្ចប់ថវិកាសម្រាប់ជ័យលាភីតាមលំដាប់លំដោយផងដែរ ពិសេសត្រូវយកចិត្តទុកដាក់ទៅលើការការពារសន្តិសុខសណ្តាប់ធ្នាប់សាធារណៈ ជូនដល់ប្រជាពលរដ្ឋ ដែលមកកំសានសប្បាយ និងត្រូវសហការសម្អាតអនាម័យ បរិស្ថាន ប្រមូលសំរាមទុកដាក់ឱ្យបានស្អាតជាប្រចាំ និងត្រូវពិនិត្យមើលប្រព័ន្ឋភ្លើងបំភ្លឺសាធារណៈ និងបញ្ហាពាក់ព័ន្ឋជាច្រើនទៀតសម្រាប់ឱ្យដំណោះការពិធី ដែលមានរយៈពេល៤ថ្ងៃ ចាប់ពីថ្ងៃទី២៥ដល់ថ្ងៃទី២៨ខែវិច្ឆិកាឆ្នាំ២០២៣ ឱ្យដំណើរទៅដោយរលូននិងសប្បាយរីករាយ៕
អត្ថបទ និងរូបភាព៖ លោក ជា ស្រស់ និង លោក យូ វង្ស
កែសម្រួល៖ លោក លីវ សាន្ត
