ដោយមានការគាំទ្រពីមន្ទីរអប់រំ យុវជន និងកីឡា ខេត្តសៀមរាប កាលពីរសៀលថ្ងៃទី២៣ ខែតុលា ឆ្នាំ២០២៣ម្សិលមិញនេះ ក្លឹបបង្រៀនហែលទឹក អេស អេស ស៊ី ខេត្តសៀមរាប សហការជាមួយក្លឹបបង្រៀនហែលទឹក Swimmy inc. of Japan បានរៀបចំកម្មវីធីសប្បុសធម៌ផ្ដល់វគ្គបណ្ដុះបណ្ដាល ស្ដីអំពីសារសុវត្ថិភាពពីការលង់ទឹក ការជួយសង្គ្រោះជនរងគ្រោះពេលមានបញ្ហាលង់ទឹក ដល់់សិក្សានុសិស្ស នៃសាលាអនុវិទ្យាល័យវត្តចក និងសាលាបឋមសិក្សាវត្តបូព៌។
លោក យូ ស៊ូហ្កាហារ៉ា (Yu Sugahara) CEO & Founder នៃក្លឹបបង្រៀនហែលទឹក Swimmy inc. of Japan បានលើកឡើងថា តាមការមើលឃើញរបស់លោកឃើញកុមារកម្ពុជាជាច្រើនបានស្លាប់ដោយការលង់ទឹកដូចនេះហើយបានជាលោកចង់ជួយបង្រៀនកុមារ ជាពិសេសសិក្សនុសិស្សឱ្យពួកគាត់ ចេះហែលទឹកឱ្យបានត្រឹមត្រូវ ក្នុងបំណងចូលរួមចំណែកកាត់បន្ថយអត្រាកុមារស្លាប់ដោយសារការលង់ទឹកនៅកម្ពុជា។
ព័ត៌មានជាតិ ថ្មីៗ
លោក ឯក សាម៉ាឌី អ្នកគ្រប់គ្រងគ្រូបង្រៀនហែលទឹកនៃក្លឹបបង្រៀនហែលទឹក អេស អេស ស៊ី ខេត្តសៀមរាប បានលើកឡើងថា គោលបំណងសំខាន់នៃកម្មវិធីពេលនេះ គឺចង់ឱ្យសិក្សានុសិស្សចេះហែលទឹក ចេះជួយសង្គ្រោះអ្នកលង់ទឹក និងការជួយសង្គ្រោះបឋម តាមលក្ខណៈវិជ្ជាជីវៈ ដែលមានមេរៀនល្អៗជាច្រើន ដោយមិនមែនធ្វើតាមប្រពៃណី។ លោកថា ដោយមើលឃើញពីអត្រាកុមារនៅកម្ពុជាចេះហែលទឹកនៅមានកម្រិត ហើយក៏មានការប្រឈមនឹងការលង់ទឹកច្រើន ជាពិសេសនៅតាមសហគមន៍ ពេលមានទឹកជំនន់នេះ ទើបក្លឹបបង្រៀនហែលទឹក អេស អេស ស៊ី បានបន្តសហការជាមួយបណ្តាសាលានានា ដើម្បីផ្តល់ចំណេះដឹងណេះដឹងទៅពួកគាត់ ហើយចាប់តាំងពីឆ្នាំ២០១៨រហូតមកដល់បច្ចុប្បន្ននេះ ក្លឹបបង្រៀនហែលទឹក អេស អេស ស៊ី បានបង្រៀនសិស្សឱ្យចេះហែលទឹកជា៤ពាន់នាក់ហើយ និងបានធ្វើសកម្មភាពមនុស្សធម៌ចុះបង្រៀនដល់សិក្សានុសិស្សតាមសាលារៀននានាដោយឥគិតថ្លៃបានជាង១ពាន់នាក់់ដែរហើយ។
អ្នកស្រី លាក់ ម៉ាល័យ តំណាងមន្ទីរ អប់រំយុវជន និងកីឡាខេត្តសៀមរាប បានថ្លែងថា ការបង្រៀនកុមារឱ្យចេះហែលទឹកនេះពិតជាមានសារៈសំខាន់ណាស់ ពីព្រោះថាបច្ចុប្បន្ន មានកុមារជាច្រើនបានស្លាប់ដោយសារលង់ទឹក និងការជួយគ្នាពេលមានអ្នកលង់ទឹកដោយសារតែពួកគាត់មិនចេះហែលទឹក និងមិនចេះពីរបៀប នៃការជួយសង្គ្រោះមានពេលមិត្តភក្តិលង់ទឹក។
ក្នុងឱកាសនោះដែរ លោកគ្រូ អន គុណរត្ន័ នាយកសាលាបឋមសិក្សាវត្តបូព៌ បានចាត់ទុកមេរៀនហែលទឹកនេះ ជាចំណេះដឺងដ៏សំខាន់មួយក្នុងជិវិតរបស់កូនៗយើង នៅពេលគាត់ជួបនូវបញ្ហា ឬមិត្តភក្កិគាត់ជួបបញ្ហាគាត់អាចជួយបានទាន់ពេលវេលា ហើយក៏សូមអរគុណដល់ក្លឹបបង្រៀនហែលទឹក អេស អេស ស៊ី ដែលផ្តល់ចំណេះដឹងនេះដល់កូនៗ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក លីវ សាន្ត
