អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ សហការជាមួយមន្ទីរកសិកម្មរុក្ខាប្រមាញ់ និងនេសាទខេត្តសៀមរាប ក្រោមការគាំទ្រពី គម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្ម បានរៀបចំសិក្ខាសាលាផ្សព្វផ្សាយច្បាប់ស្តីពីការការពាររុក្ខជាតិ និងភូតគាមអនាម័យ ជូនដល់ថ្នាក់ដឹកនាំ និងមន្ត្រីជំនាញ នៃមន្ទីរកសិកម្ម រុក្ខាប្រមាញ់ និងនេសាទទូទាំងរាជធានី-ខេត្ត មន្ទីរពាណិជ្ជកម្មខេត្ត សភាពាណិជ្ជកម្មខេត្ត សហគមន៍ កសិកម្ម ដៃគូអភិវឌ្ឍន៍នានា និងវិស័យឯកជន។
សិក្ខាសាលានេះធ្វើឡើងនៅសណ្ឋាគារខេមរាអង្គរខេត្តសៀមរាប នាថ្ងៃទី២៣ ខែតុលា ឆ្នាំ២០២៣ ក្នុងគោលបំណងដើម្បីផ្សព្វផ្សាយនិងលើកកម្ពស់ការយល់ដឹងដល់ភាគីពាក់ព័ន្ធក្នុងការចូលរួមអនុវត្តច្បាប់ស្តីពី ការការពាររុក្ខជាតិនិងភូតគាមអនាម័យឱ្យបានទូលំទូលាយនិងប្រកបដោយប្រសិទ្ធភាពខ្ពស់។
លោកស្រីបណ្ឌិត អុង សុជាតិ អនុប្រធាននាយកដ្ឋានការពារដំណាំ អនាម័យ និងភូតគាមអនាម័យ នៃអគ្គនាយកដ្ឋានកសិកម្ម ក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា៖បច្ចុប្បន្ននេះ វិធានការអនាម័យនិងភូតគាមអនាម័យ (SPS) ត្រូវបានអនុវត្តជាសាកលទាំងគ្រប់ប្រភេទក្របខណ្ឌនៃកិច្ច ព្រមព្រៀងពាណិជ្ជកម្មសេរី (FTAS] និងក្របខណ្ឌពាnIជ្ជកម្មធម្មតា។ វិធានការ SPS ត្រូវធ្វើឡើងជាផ្នែកមួយនៃក្របខ័ណ្ឌរួម នៃការអនុវត្តខ្សែច្រវ៉ាក់តម្លៃ ព្រោះថា SPS តែឯងមិនមែនជាដំណោះស្រាយរបាំងនៃប្រទេសនាំចូលនោះទេ ហើយបើបញ្ហាប្រឈមនិងឧបសគ្គផ្សេងទៀតនៃខ្សែច្រវ៉ាក់តម្លៃមិនត្រូវបានដោះស្រាយទេនោះ ផ្នែកអនាម័យនិងភូតគាមអាហារច្បាស់ជាមិនអាចចម្លងផលិតផលទាំងនោះទៅកាន់ទីផ្សារបានឡើយ។អាស្រ័យហេតុនេះ ដំណោះស្រាយដ៏មានប្រសិទ្ធភាពក្នុងការជម្នះរបាំង SPS ត្រូវតែស្ថិតក្នុងកញ្ចប់តែមួយនៃការអភិវឌ្ឍខ្សែច្រវាក់តម្លៃនាំឆ្ពោះទៅ សម្រេចបាននូវឧត្តមភាពប្រកួតប្រជែងផ្នែកគុណភាព សុវត្ថិភាព និងតម្លៃ ទើបបាំងSPS ត្រូវបានជម្នះប្រកបដោយប្រសិទ្ធភាព។
ព័ត៌មានជាតិ ថ្មីៗ
លោកស្រីបន្តថា គម្រោងប្រកួតប្រជែងខ្សែច្រវាក់តម្លៃនឹងលើកកម្ពស់សុវត្ថិភាពកសិកម្ម (ACSEP) ពិតជាចូលរួមចំណែកក្នុងការដណ្ដើមបាននូវ ឧត្តមភាពប្រកួតប្រកួតប្រជែង (គុណភាព សុវត្ថិភាព និងតម្លៃ) ទាំងលើទីផ្សារក្នុងស្រុកនិងក្រៅស្រុក។ ការដណ្តើមបាននូវ ឧត្តមភាពប្រកួតប្រជែងលើទីផ្សារក្នុងស្រុក ធ្វើឱ្យយើងអាចកាត់បន្ថយការនាំចូលផលិតផលពីខាងក្រៅ និងទប់ស្កាត់ការចំណាយ ចេញក្រៅប្រទេស។ ទន្ទឹមគ្នានេះ ការដណ្ដើមបាននូវឧត្តមភាពប្រកួតប្រជែងលើទីផ្សារខាងក្រៅ អាចឱ្យកម្ពុជានាំចូលមកវិញ នូវចំណូលចូលក្នុងប្រទេស។លោកស្រី អុង សុជាតិ បញ្ជាក់ទៀតថា៖ក្នុងគោលដៅជម្នះនូវរបាំង SPS ឱ្យកាន់តែមានប្រសិទ្ធភាពខ្ពស់ ព្រះរាជក្រមលេខ នស/រកម/0៥២២០០៤ ចុះថ្ងៃទី៣ ខែឧសភា ឆ្នាំ២០២២ ប្រកាសឱ្យប្រើច្បាប់ស្តីពីការការពាររុក្ខជាតិនិងភូតគាមអនាម័យ និងលិខិតបទដ្ឋានក្រោមច្បាប់ស្តីពី ការការពាររុក្ខជាតិនិងភូតគាមអនាម័យចំនួន៤៨ ដែលក្នុងនោះ អនុក្រឹត្យមានចំនួន៥ សេចក្តីសម្រេចរបស់រាជរដ្ឋាភិបាលមាន ចំនួន២ ប្រកាសអន្តរក្រសួងមានចំនួន៥ ប្រកាសមានចំនួន៣៥ និងសេចក្តីសម្រេចរបស់អង្គភាពមានចំនួន២ ជាការរួមចំណែក ដើម្បីពង្រឹងសមត្ថភាព SPS លើផ្នែកទន់ និងផ្នែករឹង ជាការងារអាទិភាពដែលត្រូវរៀបចំ ស្ថាបនាហេដ្ឋារចនាសម្ព័ន្ធរូបវ័ន្ត ដោយ មានបំពាក់ឧបករណ៍និងសម្ភារបរិក្ខាទំនើបដើម្បីបំពេញតាមលក្ខខណ្ឌតម្រូវ SPS៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
