នៅព្រឹកថ្ងៃទី២៤ ខែតុលា ឆ្នាំ២០២៣នេះ ក្រសួងផែនការ បានបើកអង្គសិក្ខាសាលាកសាងសមត្ថភាព ស្តីពីការចងក្រងម៉េតាទិន្នន័យ និងការប្រើប្រាស់កម្មវិធីថ្នាលទិន្នន័យសម្រាប់រាយការណ៍គោលដៅអភិវឌ្ឍន៍ប្រកបដោយចីរភាព (SDG) ដែលរៀបចំឡើងនៅសាលប្រជុំមន្ទីរផែនការខេត្តសៀមរាប ក្រោមអធិបតីភាព ឯកឧត្តម លី ចាន់សុភក្តី អនុរដ្ឋលេខាធិការក្រសួងផែនការ និង លោក សុខ ថុល អភិបាលរងខេត្ត មានការចូលរួមពីសំណាកឯកឧត្តម លោកលោកស្រីជាអគ្គនាយកស្ដីទីនៃវិទ្យាស្ថានជាតិស្ថិតិក្រសួងផែនការ តំណាងមន្ទីរ អង្គភាពជុំវិញខេត្តសៀមរាប ព្រមទាំងវត្តមានពីថ្នាក់ដឹកនាំនិងមន្រ្តីនៃមន្ទីរផែនការ មកពីខេត្តសៀមរាប ,ឧត្តរមានជ័យ ,ព្រះវិហារ និងខេត្តកំពង់ធំ ចំនួន៣៥នាក់។
ឯកឧត្តម ទ្រី ឬទ្ធា អគ្គនាយកស្ដីទីនៃវិទ្យាស្ថានជាតិស្ថិតិ មានប្រសាសន៍ថា សិក្ខាសាលានេះ មានសារៈសំខាន់ណាស់ ព្រោះនឹងសម្រេចបានគោលដៅយុទ្ធសាស្ត្រ ផែនការសកម្មភាពចម្បងៗមួយចំនួន ដែលត្រូវបានដាក់ចេញក្នុងផែនការសកម្មភាពសម្រាប់អនុវត្តការវាស់វែងសូចនាករ SDG និងក្របខណ្ឌការងារសម្រាប់ប្រមូលទិន្នន័យត្រូវបានកំណត់ ហើយលទ្ធផលរំពឹងទុកដែលត្រូវសម្រេចឱ្យបាននោះ គឺការបង្កើត និងការអភិវឌ្ឍន៍ប្រព័ន្ធកម្មវិធីថ្នាលទិន្នន័យសម្រាប់រាយការណ៍ និងផ្សព្វផ្សាយទិន្នន័យសូចនាករ SDG/CSDG ព្រមទាំងសូចនាករអភិវឌ្ឍន៍ជាតិផ្សេងៗ។
មានប្រសាសន៍ក្នុងឱកាសនោះ លោក សុខ ថុល អភិបាលរងខេត្ត បានសម្ដែងនូវការគាំទ្រចំពោះការរៀបចំបើកសិក្ខាសាលានេះ ព្រោះបានអភិវឌ្ឍន៍សមត្ថភាពមន្រ្តីនៅរដ្ឋបាលថ្នាក់ក្រោមជាតិ ដែលរួមមានមន្រ្តីនៃក្រសួង មន្ទីរ ស្ថាប័ន ដែលពាក់ព័ន្ធនៅក្នុងខេត្ត ជាពិសេស មន្រ្តីនៃមន្ទីរផែនការខេត្តទាំង០៥ ក្នុងការលើកកម្ពស់ចំណេះដឹង ដើម្បីចូលរួមអនុវត្តការងារបានល្អប្រសើរ។ លោកបន្តថា ផែនការយុទ្ធសាស្ត្រជាតិ គឺជាផែនការស្នូល ដែលរាជរដ្ឋាភិបាលកម្ពុជា រៀបចំឡើង ក្នុងក្របខ័ណ្ឌគោលនយោ បាយអភិវឌ្ឍន៍សេដ្ឋកិច្ច សង្គមកិច្ច យ៉ាងសំខាន់ស្របតាមយុទ្ធសាស្ត្របញ្ចកោណ ដំណាក់កាលទី១ នៃរាជ រដ្ឋាភិបាល នីតិកាលទី៧ នៃរដ្ឋសភា ក្នុងកម្មវិធីនយោបាយរបស់រាជរដ្ឋាភិបាលកម្ពុជាអាណត្តិថ្មី ដូច្នេះក្នុងនាមអាជ្ញាធរខេត្តសៀមរាប សង្ឃឹមថា សិក្ខាកាមទាំងអស់ ដែលបានចូលរួមសិក្ខាសាលានេះ នឹងទទួលបាននូវចំណេះដឹងថ្មីបន្ថែមទៀត អំពីការចងក្រងទិន្នន័យសម្រាប់សូចនាករ នៃគោលដៅអភិវឌ្ឍន៍ប្រកបដោយចីរភាព។
ឯកឧត្តម លី ចាន់សុភក្តី អនុរដ្ឋលេខាធិការក្រសួងផែនការ មានប្រសាសន៍ថា ផែនការយុទ្ធសាស្ត្រអភិវឌ្ឍន៍ជាតិ គឺ ជាផែនការស្នូលរបស់រាជរដ្ឋាភិបាលកម្ពុជា ដែលបានរៀបចំឡើងគ្របដណ្តប់លើគ្រប់វិស័យ និងក្របខ័ណ្ឌគោល នយោបាយអភិវឌ្ឍន៍សេដ្ឋកិច្ច-សង្គមកិច្ច ស្របតាមយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលកម្ពុជាអាណត្តិ ទី៧ ដែលបានចែងក្នុងកម្មវិធីគោលនយោបាយរបស់រាជរដ្ឋាភិបាល ជាមួយនឹងការប្តេជ្ញាចិត្តក្នុងការអនុវត្តរបៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាពរបស់អង្គការសហប្រជាជាតិ ពោលគឺគោល ដៅអភិវឌ្ឍន៍ប្រកបដោយចីរភាព (SDGs)។
ឯកឧត្តមអនុរដ្ឋលេខាធិការ សង្ឃឹមយ៉ាងមុតមាំថា នឹងមានការខិតខំធ្វើការរួមគ្នាជាប្រព័ន្ធ និងរៀនសូត្របទពិសោធន៍រវាងអ្នកចូលរួមពីបណ្ដាមន្ទីរ-សា្ថប័នពាក់ព័ន្ធ ព្រមទាំងបានយល់ដឹងកាន់តែទូលំទូលាយអំពីចរិកលក្ខណៈរបស់សូចនាករ ភាពសំខាន់របស់ម៉េតាទិន្នន័យ បានស្វែងយល់ពីប្រព័ន្ធកម្មវិធីថ្នាលទិន្នន័យសម្រាប់រាយការណ៍សូចនាករអភិវឌ្ឍន៍ជាតិ (CAMSTAT) និងប្រព័ន្ធកម្មវិធីថ្នាលទិន្នន័យសម្រាប់ផ្សព្វផ្សាយសូចនាករគោលដៅអភិវឌ្ឍន៍ប្រកបដោយចីរភាព (Open SDG) ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក លីវ សាន្ត
