នៅសល់រយៈពេលប្រមាណ ១ខែទៀតប៉ុណ្ណោះ ការប្រឡងសញ្ញាមធ្យមសិក្សាទុតិយភូមិ ក្នុងឆ្នាំសិក្សា២០២២-២០២៣ នឹងមកដល់។ ដើម្បីពង្រឹងស្មារតី និងលើកទឹកចិត្តដល់សិស្សានុសិស្សនៅតាមជនបទ និងទីប្រជុំជន ក្នុងស្រុកវ៉ារិន ខេត្តសៀមរាប ឯកឧត្ដម ផៃ សុខខេង នាយរងខុទ្ធកាល័យ នៃក្រសួងការពារជាតិ រួមនិងលោកអភិបាលស្រុក បានជួបសំណេះសំណាល ជាមួយបេក្ខជនប្រមាណ២៧០នាក់ ដែលពីវិទ្យាល័យវ៉ារិន និងវិទ្យាល័យស្រែណូយ។
ឯកឧត្ដម ផៃ សុខខេង លើកឡើងថា ទោះបីស្រុកវ៉ារិនមានចម្ងាយប្រមាណ ១០០គីឡូម៉ែត្រ ពីមណ្ឌលប្រលងស្ថិតនៅក្រុងសៀមរាបក្ដី តែសមត្ថភាពរបស់សិស្សានុសិស្សនៅតាមជនបទ ពុំនៅឆ្ងាយដូចចម្ងាយផ្លូវនោះទេ។ ការប្រឡងជាប់ជាស្ថាពរ វានឹងឆ្លុះបញ្ចាំងពីសក្ដានុពល និងសមត្ថភាពរបស់យុវជនទាំងនៅទីប្រជុំជន និងជនបទ។ លទ្ធផលជោគជ័យរបស់សិស្សានុសិស្សទាំងអស់ ជាការចូលរួមឆ្ពោះទៅកាន់គោលដៅ អភិវឌ្ឍប្រកបដោយចីរភាព និង គាំទ្រនូវការសម្រេចឱ្យបានចក្ខុវិស័យរបស់រាជរដ្ឋាភិបាលឆ្នាំ ២០៣០ និង ២០៥០។
យោងតាមរបាយការណ៍ ការិយាល័យអប់រំ យុវជន និងកីឡា ស្រុកវ៉ារិន បង្ហាញថា បេក្ខជនប្រលងសញ្ញាបត្រមធ្យមសិក្សាទុតិយភូមិមានចំនួន ២៧៨នាក់ ខណៈដែលនៅទូទាំងខេត្ដសៀមរាប មានបេក្ខជនសរុប ជាងមួយម៉ឺននាក់ ដោយបែងចែកជា១៦មណ្ឌល ស្មើនឹង៤៤៤បន្ទប់។
ព័ត៌មានជាតិ ថ្មីៗ
បើតាមប្រសាសន៍ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បញ្ជាក់ថា ការប្រលងសញ្ញាបត្រមធ្យមសិក្សាទុតិយភូមិ ឬ បាក់ឌុបនេះ នឹងធ្វើឡើងនៅថ្ងៃទី០៦ និងទី០៧ ខែវិច្ឆិកា ឆ្នាំ ២០២៣នេះ ដោយមានបេក្ខជនសរុបចំនួន១៣៧ ៤១២នាក់នាក់ ក្នុងនោះស្រី ជាង៧ម៉ឺននាក់ ធៀបទៅនឹងឆ្នាំ២០២២ មានការកើនឡើងជិត១ម៉ឺននាក់។ ក្នុងចំណោមបេក្ខជនជាង១៣ម៉ឺននាក់ មានថ្នាក់វិទ្យាសាស្ត្រចំនួនតែជាង ៤ម៉ឺននាក់ប៉ុណ្ណោះ ខណៈបេក្ខជនស្វ័យរិនមានជាង ១៥ ០០០នាក់ និងជនមានពិការភាព គថ្លង់ ១៨នាក់។ ជាការបញ្ជាក់របស់ឯកឧត្តម ក្រសួងនៅតែផ្តោតលើគោលការណ៍ចំបងចំនួន៤ គឺគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ពោលគឺ«អ្នកចេះជាប់»។
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
