យោងតាមរបាយការណ៍របស់គ្រឹះស្ថានអង្គរ ដែលចេញផ្សាយនៅថ្ងៃទី០១ ខែវិច្ឆិកា នេះ បានបង្ហាញថា រយៈពេល១០ខែនេះ មានអ្នកទេសចរបរទេសចំនួន៦០២.៥៧០នាក់ បានទិញសំបុត្រចូលទស្សនាក្នុងរមណីយដ្ឋានអង្គរ និងរកចំណូលពីការលក់សំបុត្រនេះបានចំនួនជាង ២៧លានដុល្លាអាម៉េរិក។
ដោយឡែកសម្រាប់មន្ទីរទេសចរណ៍ខេត្តសៀមរាប ក៏បានឲ្យដឹងថា ក្នុងរយៈត្រឹម៩ខែ ឆ្នាំ២០២៣នេះ មូលដ្ឋានអាជីវកម្មទេសចរណ៍ក្នុងខេត្តសៀមរាប ទើបតែបើកដំណើរការឡើងវិញបានចំនួន ៧១% នៃចំនួនអាជីវកម្មសរុប ១១៦៥ទីតាំង។ ក្នុងនោះសណ្ឋាគារ បានបើកឡើងវិញប្រមាណ ១៤៨ទីតាំង ស្មើនឹង ៧៩២៦បន្ទប់ ស្មើនឹង ៦៥% ផ្ទះសំណាក់ ២១៣ទីតាំងស្មើនឹង ៣៧៣៥បន្ទប់ និងភោជនីយដ្ឋាន ១២០ទីតាំង ស្មើនឹង ៦១% ខណៈដែលចំនួនទេសចរដែលមកដល់ខេត្តសៀមរាបវិញ មានជើងហោះហើរចូលចំនួនជាង ២០ជើងក្នុងមួយថ្ងៃ ហើយមានអ្នកដំណើរចំនួនចន្លោះពី ២០០០ ទៅ ២៦០០នាក់។ ខណៈដែលវិស័យទេសចរណ៍ កំពុងចាប់ផ្តើមងើបឡើងវិញជាបណ្តើរៗ មន្ត្រីជំនាញ និងស្ថាប័នពាក់ព័ន្ធ ក្នុងវិស័យទេសចរណ៍ កំពុងជំរុញការបណ្តុះបណ្តាល វិជ្ជាជីវៈដល់យុវជនបម្រើការ ងារក្នុងវិស័យទេសចរណ៍ ដើម្បីបង្កើតឱកាសការងារដល់ពួកគេដែលអាចស្វែងរកម្រៃបានសមរម្យ និងមានវិថីអភិវឌ្ឍន៍ជំនាញច្បាស់លាស់ជាតួនាទីរបស់គ្រប់ភាគីពាក់ព័ន្ធ។
បើតាមរដ្ឋលេខាធិការក្រសួងទេសចរណ៍ ឯកឧត្តម ប៉ាក់ សុខុម កាលពីថ្មីៗនេះ បានបញ្ជាក់ថា ផែនការមេអភិវឌ្ឍន៍វិស័យទេសចរណ៍ខេត្តសៀមរាប បានជំរុញឲ្យគ្រប់ភាគីពាក់ព័ន្ធខិតខំធ្វើយ៉ាងណាបង្កើននូវផលិត និងផ្សព្វផ្សាយអំពីកញ្ចប់ផលិតផលទេសចរណ៍ថ្មីដើម្បីទាក់ទាញអ្នកទេសចរបរទេស និងទេសចរក្នុងស្រុកឲ្យកាន់ខេត្តសៀមរាបកាន់តែច្រើន។ ជាមួយគ្នាក្រសួងទេសចរណ៍ក៏បានជំរុញទេសចរណ៍ផ្នែកជំនឿសាសនាផងដែរ។ ទន្ទឹមនឹងការទាក់ទាញការអ្នកទេសចរ ការអភិវឌ្ឍធនធានមនុស្សក៏ជារឿងសំខាន់មួយដែលក្រសួងទេសចរណ៍បានដាក់ចុះនូវយុទ្ធនាការ “បុគ្គលិកម្នាក់ ជំនាញមួយ (One Employee, One Skill)” ដែលមានបញ្ជូលក្នុងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ដោយផ្តោតលើទាំងបរិមាណ និងគុណភាព ដើម្បីឆ្លើយតបទៅនឹងតម្រូវការនៃការអភិវឌ្ឍន៍វិស័យទេសចរណ៍ ដែលមានតម្រូវការអ្នកជំនាញប្រមាណ ១,១លាននាក់ នៅឆ្នាំ២០៣០ និងប្រមាណ ១,៤លាននាក់ នៅឆ្នាំ២០៣៥ និងឆ្ពោះទៅសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ SDG 4 និង SDG 8៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
