បន្ទាប់អាក់ខានការរៀបចំព្រះរាជពិធីបុណ្យអ៊ុំទូក អកអំបុក បណ្ដែតប្រទីប និងសំពះព្រះខែ ក្នុងវិបត្តិជំងឺកូវីដ១៩មក ខេត្តសៀមរាប នឹងបន្លឺឡើងនូវសំណើចកងរំពងជាថ្មីឡើងវីញ សម្រាប់ឆ្នាំ២០២៣ រយៈពេល ៤ថ្ងៃ គឺចាប់ពីថ្ងៃទី២៥ ដល់ថ្ងៃទី២៦ ខែវិច្ឆិកានេះ។
តាមការបញ្ជាក់របស់ឯកឧត្តម ប្រាក់ សោភ័ណ អភិបាលខេត្តសៀមរាប ការរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅឆ្នាំ២០២៣ សម្រាប់ថ្នាក់ខេត្តនេះ នឹងមានរៀបចំនូវកម្មវិធីដូចជា ការប្រកួតទូកង បុរស នារី ការជិះទូកលេងកម្សាន្ត ផ្សារទឹក ការប្រគុំតន្ត្រី ការប្រកួតកីឡាប្រដាល់គុនខ្មែរលក្ខណៈអន្តរជាតិ ពិធីអកអំបុក និងបណ្តែតប្រទីប ការតាំងពិរពណ៌ និងកម្មវិធីកម្សាន្តជាច្រើនទៀត។
បើតាម លោក ង៉ូវ សេងកាក់ ប្រធានមន្ទីរទេសចរណ៍ខេត្ដសៀមរាប បង្ហាញថា បច្ចុប្បន្នរដ្ឋបាលខេត្ត រួមជាមួយសហភាពសហព័ន្ធកម្ពុជាខេត្តសៀមរាប បាននិងកំពុងមមាញឹក ក្នុងការរៀបចំសោភណ្ឌភាពទីក្រុង និងកម្មវិធីកម្សាន្តនានា។ ក្នុងនោះ មន្ទីរទេសចរណ៍ខេត្ត ក៏បាននិងកំពុងរៀបចំគោលដៅទេសចរណ៍ទាំងក្នុងក្រុង និងបណ្ដាស្រុក ដើម្បីឱ្យមានភាពទាក់ទាញ ជាមួយការផ្ដល់សេវាកម្មល្អផងដែរ។
លោក ប្រធានមន្ទីរទេសចរណ៍ខេត្ដ ក៏បានបញ្ជាក់ផងដែរថា ការបើកដំណើរការអាជីវកម្មផ្ទះស្នាក់ សណ្ឋាគារ អាហារដ្ឋាន ភោជនីយដ្ឋាន នៅតាមក្រុង ស្រុក មានភាពសំបូរបែប ដែលនឹងផ្ដល់ភាពងាយស្រួល សម្រាប់ភ្ញៀវទេសចរគ្រប់លំដាប់ថ្នាក់។ ទន្ទឹមនោះ លោក ក៏បានប្រកាស មិនអនុញ្ញាតឱ្យមានការតម្លើងថ្លៃសេវាកម្មស្នាក់នៅ និងសេវាកម្មចំណីអាហារខុសពីធម្មតា អំឡុងពេលព្រះរាជពិធីបុណ្យអុំទូកឡើយ។
តាមរបាយការណ៍របស់មន្ទីរទេសចរណ៍ខេត្តសៀមរាប បានបង្ហាញថា គិតត្រឹម៩ខែឆ្នាំ២០២៣នេះ មូលដ្ឋានអាជីវកម្មទេសចរណ៍បានបើកដំណើរការឡើងវិញបានចំនួន ៧១% នៃចំនួនអាជីវកម្មសរុប ១,១៦៥ទីតាំង ក្នុងនោះសណ្ឋាគារបានបើកឡើងវិញប្រមាណ១៤៨ទីតាំង ស្នើនឹង៧៩២៦បន្ទប់ ផ្ទះសំណាក់ ២១៣ទីតាំងស្នើនឹង៣,៧៣៥បន្ទប់ និងភោជនីយដ្ឋាន ១២០ទីតាំង៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
