នៅព្រឹកថ្ងៃទី៣ ខែឧសភា ឆ្នាំ២០១៩នេះ ក្រសួងព័ត៌មាន សហការជាមួយអង្គការ USAID ប្រចាំកម្ពុជា បានរៀបចំពិធីអបអរសាទរ ទិវាសេរីភាពសារព័ត៌មានពិភពលោក ឆ្នាំ២០១៩ ក្រោមប្រធានបទ តួនាទីប្រកបដោយសក្តានុពលរបស់សារព័ត៌មាន ក្នុងការគាំទ្រសន្តិភាព និងប្រជាធិបតេយ្យ នៅសណ្ឋាគារ រ៉ាហ្វិល ឡឺរ៉ូយ៉ាល់ រាជធានីភ្នំពេញ ក្រោមអធិបតីភាព ឯកឧត្ដម ខៀវ កាញារីទ្ធ រដ្ឋមន្ដ្រីក្រសួងព័ត៌មាន ដោយមានការចូលរួមពីសំណាក់លោក Sardar Umar Alam តំណាងអង្គការ USAID ប្រចាំកម្ពុជា , លោក Andreas Johansson លេខាទី១ នៃស្ថានទូតស៊ុយអ៊ែត ប្រចាំកម្ពុជា និង ឯកឧត្ដម លោកជំទាវ លោក លោកស្រី លោកជំទាវ ជារដ្ឋលេខាធិការ , អនុរដ្ឋលេខាធិការនៃក្រសួងព័ត៌មាន ប្រធានមន្ទីរព័ត៌មានរាជធានី ខេត្តទាំង២៥ ព្រមទាំងអ្នកសារព័ត៌មានជាតិ អន្ដរជាតិជាច្រើនរូបទៀតផងដែរ ។
មានប្រសាសន៍ក្នុងឱកាសនោះ ឯកឧត្ដម ខៀវ កាញារីទ្ធ រដ្ឋមន្ដ្រីក្រសួងព័ត៌មាន បានបញ្ជាក់ថា ក្នុងនាមក្រសួងព័ត៌មាន សូមសម្ដែងនូវការគាំទ្រទាំងស្រុងចំពោះសារលិខិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសទិវាសេរីភាពសារព័ត៌មានពិភពលោក លើកទី២៦ នាថ្ងៃទី៣ ខែឧសភា ឆ្នាំ២០១៩នេះ ហើយនៅថ្ងៃខាងមុខ ក្រសួងព័ត៌មាននឹងរៀបចំច្បាប់កាត្វកិច្ច ស្តីពីការកែតម្រូវរបស់អ្នកកាសែត ប្រសិនបើយល់ថាអ្នកកាសែតមានចំណុចខុសឆ្គង និង ចំពោះចាហ្វាង ត្រូវមានចំណេះដឹងខ្ពស់ចាប់ពីបរិញ្ញាបត្រឡើងទៅ ឬបទពិសោធន៍ធ្វើកាសែតរយៈពេល៥ឆ្នាំ ។
គួររំលឹកថា នៅក្នុងថ្ងៃអបអរសាទរទិវាសេរីភាពសារព័ត៌មានសាកលលោក៣ឧសភា លើកទី២៦នេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសារលិខិតមួយ ក្រើនរំលឹកដល់អ្នកសារព័ត៌មានទាំងអស់ ត្រូវស្មោះត្រង់ក្នុងវិជ្ជាជីវៈ ក្លាហានហ៊ាននិយាយការពិត រិះគន់ក្នុងន័យស្ថាបនា និង ត្រូវធ្វើជាកញ្ចក់ឆ្លុះបញ្ចាំងឲ្យឃើញតថភាពសង្គម ដើម្បីជួយកសាងយុត្តិធម៌សង្គម រក្សាសុខសន្តិភាព និងអភិវឌ្ឍប្រទេសជាតិ និង ឲ្យអ្នកសារព័ត៌មាន ត្រូវបន្តខិតខំអភិវឌ្ឍខ្លួនឲ្យមានសមត្ថភាព ក្នុងការវិភាគសភាពការណ៍ទាំងព្រឹត្តិការណ៍ជាតិ និងអន្តរជាតិឲ្យបានស៊ីជម្រៅ ដើម្បីដើរទាន់ការវិវឌ្ឍសភាពការណ៍ទាំងនៅក្នុងប្រទេស នៅក្នុងតំបន់ និងនៅលើសកលលោកនាពេលបច្ចុប្បន្ន។
សម្ដេចតេជោ ហ៊ុន សែន ក៏បានអំពាវនាវឲ្យអ្នកសារព័ត៌មាន រួមគ្នាប្រយុទ្ធប្រឆាំងទៅនឹងព័ត៌មានក្លែងក្លាយ ដែលបង្កឡើងដោយជនអគតិមួយចំនួន ដើម្បីបំរើមហិច្ឆតាលោភលន់របស់ខ្លួន ដែលកំពុងតែគំរាមកំហែងសុខសន្តិភាព ប្រជាធិបតេយ្យ និងការអភិវឌ្ឍនៅលើសកលលោកទាំងមូល ៕
អត្ថបទ ៖ លោក លីវ សាន្ត
រូបថត ៖ លោក លីវ សុខុន
