កម្លាំងអង្គភាពថ្មី ( នគរបាលអន្តរាគមន៍ការពារព្រំដែន ) ប្រមាណជិត៥០០នាក់ទទួលការហ្វឹកហ្វឺនមុខជំនាញ យុទ្ធវិធីប្រតិបត្តិការ វគ្គទី៩ លើកទី២ ឆ្នាំ២០១៩ រយៈពេល៣ខែ នៅបញ្ជាការដ្ឋាននគរបាលជាតិប្រចាំទិសភូមិភាគទី៤។
នាយនគរបាល នាយនគរបាលរង និង ពលនគរបាល ប្រមាណជិត៥០០នាក់ ដែលទទួលបាននូវការបណ្តុះបណ្តាលវិជ្ជាជីវៈនគរបាលរយៈពេល៤ខែ និងទទួលបានការតាំងស៊ប់កន្លងមក បានបន្តការហ្វឹកហ្វឺនយុទ្ធវិធីប្រតិបត្តិការរយៈពេល៣ខែបន្ថែមទៀត មុនចូលទៅបម្រើក្នុងអង្គភាពវរសេនាតូចនគរបាលអន្តរាគមន៍ការពារព្រំដែន ដែលការហ្វឹកហ្វឺននេះ ត្រូវប្រារព្ធពិធីបើកឲ្យដំណើរការជាផ្លូវការ នៅថ្ងៃទី០២ ខែឧសភា ឆ្នាំ២០១៩ នៅបញ្ជាការដ្ឋាននគរបាលជាតិ ប្រចាំទិសភូមិភាគទី៤ ។
នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ មេបញ្ជាការនគរបាលជាតិប្រចាំទិសភូមិភាគទី៤និងទី៥ មានប្រសាសន៍ឲ្យដឹងថា ៖ ដោយយោងតាមការអនុញ្ញាតិរបស់រាជរដ្ឋាភិបាល ក្រសួងមហាផ្ទៃបានសម្រេចជ្រើសរើសនិងបង្កើតអង្គភាពថ្មី ដើម្បីបំពេញសំណូមពរការងារ ស្របតាមដំណាក់កាលបច្ចុប្បន្ននេះ ។ នាយឧត្តមសេនីយ៍ ខេង សុមេធ បញ្ចាក់ច្បាស់ថា ចាប់ពីពេលនេះតទៅ នាយ-នាយរង និង ពលនគរបាល ដែលបានឆ្លងកាត់វគ្គហ្វឹកហ្វឹននេះនឹងត្រូវបានបំពេញតួនាទី-ភារកិច្ចក្នុងអង្គភាពមួយដ៏ជាក់លាក់ដែលមានឈ្មោះថា ( វរសេនាតូចនគរបាលអន្តរាគមន៍ការពារព្រំដែន ) ។ អង្គភាពនេះបង្កើតឡើងដើម្បីបំពេញភារកិច្ចអន្តរាគមន៍ ជួយដល់អង្គភាពវរសេនាតូចនគរបាលការពារព្រំដែនគោកទូទាំងប្រទេស រួមចំណែកការពារបូរណភាពដែនដីទប់ស្កាត់អំពើឧក្រឹដ្ឋកម្មឆ្លងដែន អំពើភេវរកម្ម បាតុកម្ម កុប្បកម្ម ឬអំពើហឹង្សាដែលបណ្តាលឲ្យមានផលប៉ះពាល់ដល់សន្តិសុខនៅតាមខ្សែបន្ទាត់ព្រំដែន ។
នាយឧត្តមសេនីយ៍មេបញ្ជាការ បញ្ជាក់បន្ថែមថា ទោះជាយ៉ាងណាក៏ដោយ កងកម្លាំងនគរបាលជាតិបានប្តេជ្ញាចិត្តខ្ពស់រួចមកហើយ មុះមុតដាច់ខាត ការពាររដ្ឋធម្មនុញ្ញ ការពារព្រះមហាក្សត្រ និង ការពាររាជរដ្ឋាភិបាលស្របច្បាប់ និងទប់ស្កាត់ឲ្យបានទាន់ពេលវេលា នូវឧបាយកល សកម្មភាពបដិវត្តពណ៌ និងការប៉ុនប៉ងផ្តួលរំលំរាជរដ្ឋាភិបាល ដែលប្រសូត្រចេញពីឆន្ទៈរបស់រាស្ត្រ តាមរយៈនៃការបោះឆ្នោត ។
បើតាមរបាយការណ៍របស់ ឧត្តមសេនីយ៍ឯក សុខ ធឿន មេបញ្ចាការរងនៃបញ្ជាការដ្ឋាននគរបាលជាតិប្រចាំទិសភូមិភាគទី៤ និង ជាប្រធានគណគ្រប់គ្រងវគ្គ បានឲ្យដឹងថា នេះគឺជាវគ្គទី៩ លើកទី២ ប្រចាំឆ្នាំ២០១៩ ហ្វឹកហ្វឺនយុទ្ឌវិធីប្រតិបត្តិការជូនដល់កងកម្លាំងនគរបាលអន្តរាគមន៍ការពារព្រំដែន មានរយៈពេល៣ខែសម្រាប់ការហ្វឹកហ្វឺន ដោយចែកចេញជា៥ដំណាក់កាល រួមមាន វិន័យ-បទបញ្ជានិងសណ្តាប់ធ្នាប់កងជួរ យល់ដឹងអំពីផែនទីភូមិសាស្ត្រនិងឧបករណ៍កំណត់ទីតាំងនៃផែនទី លំហាត់ក្បាច់គុនអំពីយុទ្ធវិធីបង្ការទប់ស្កាត់បាតុកម្ម-កូដកម្ម ប្រតិបត្តិការចិត្តសាស្ត្រនិងការស្វែងយល់អំពីអាវុធធុនស្រាល និង យុទ្ធវិធីអន្តរាគមន៍ ទ័ពព្រៃនិងកិច្ចដំបូងរបស់យុទ្ធជន ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
