នៅវេលាម៉ោងប្រមាណ ៨និង២០នាទីយប់ ថ្ងៃទី០៥ខែឧសភាឆ្នាំ២០១៩ មានអគ្គីភ័យឆេះម៉ាស៊ីនភ្លើង និងស៊ីទែនប្រេងចំណុះ៥ពាន់លីត្រយ៉ាងសន្ធោសន្ធៅ នៅក្នុងបរិវេណភោជនីយដ្ឋានអាប៉ូឡូប្លាស្សា ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប ខណៈភោជនីយដ្ឋានេះកំពុងរៀបចំពិធីមង្គលការមួយ និងមានភ្ញៀវនៅក្នុងអាគារជាច្រើនរយនាក់។
លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាបបានឱ្យដឹងថា ករណីអគ្គីភ័យនេះបណ្តាលមកពីផ្ទុះប្រអប់ភ្លើងដែលនៅជិតម៉ាស៊ីនភ្លើង ហើយឆាបទៅឆេះស៊ីទែនប្រេងឥន្ធនៈ និងបន្តឆេះម៉ាស៊ីន និងរោងដាក់ម៉ាស៊ីនភ្លើងតែម្តង។
ក្នុងករណីអគ្គីភ័យនេះ ឯកឧត្តម ទៀ សីហា អភិបាលខេត្តសៀមរាប បានចុះទៅផ្ទាល់ ដើម្បីបញ្ជាកម្លាំងសមត្ថកិច្ចក្នុងការពន្លត់អគ្គីភ័យនេះ។
បើតាមរបាយការណ៍របស់ស្នងការដ្ឋាននគរបាលខេត្តសៀមរាប ក្នុងករណីអគ្គីភ័យនេះ កម្លាំងសមត្ថកិច្ចពន្លត់អគ្គីភ័យ បានប្រើរយៈពេល១ម៉ោង ប្រើរថយន្តពន្លត់អគ្គីភ័យ ១៤គ្រឿង និងប្រើទឹកអស់ ២៤រថយន្ត ទើបពន្លត់បានទាំងស្រុង ក្នុងនោះ រថយន្តពន្លត់អគ្គីភ័យ ស្នងការនរគបាលខេត្តចំនួន ៥គ្រឿង រថយន្តពន្លត់អគ្គីភ័យ កងរាជអាវុធហត្ថ ៤គ្រឿង រថយន្តពន្លត់អគ្គីភ័យប៉ូលីសបេតិកភណ្ឌ ១គ្រឿង រថយន្តពន្លត់អគ្គីភ័យអធិការដ្ឋាននរគបាលស្រុកបាគងចំនួន ១គ្រឿង រថយន្តពន្លត់អគ្គិភ័យអាកាសយាន្តដ្ឋានអន្តរជាតិសៀមរាប ១គ្រឿង រថយន្តពន្លត់អគ្គិភ័យភូមិវប្បធម៌ ២គ្រឿង។
បើតាមរបាយការណ៍ដដែលនេះ បានប៉ាន់ស្មានការខូចខាតរួមមាន ម៉ាស៊ីនភ្លើងខ្នាតធំតម្លៃប្រហែល ៣៨០០០ដុល្លារ, ម៉ាស៊ីនភ្លើងខ្នាតតូច តម្លៃប្រហែល ២០០០០ដុល្លារ, ឧបករណ៍ផ្លាស់ប្តូរអគ្គិសនីចំនួន០៥គ្រឿង ០១គ្រឿងប្រហែលតម្លៃ៥០០ដុល្លារ, ប្រេងម៉ាស៊ូតចំនួន ១០០០លីត្រ, ម៉ូតូរ៉ឺម៉កចំនួន០១គ្រឿងតម្លៃប្រហែល ៣០០០ដុល្លារ រួមទាំងសម្ភារមួយចំនួន។ ក្នុងនោះ ករណីអគ្គិភ័យនេះ ពុំបណ្ដាលឲ្យមានមនុស្សរងបួស ឬស្លាប់ឡើយ។
លោកឧត្តមសេនីយ៍ទោ ទិត្យ ណារ៉ុង បានអំពាវនាវដល់ប្រជាពលរដ្ឋ ត្រូវមានការប្រុងប្រយ័ត្នខ្ពស់ទាំងអស់គ្នា ព្រោះថា បច្ចុប្បន្ននេះរដូវប្រាំង មានកំដៅក្តៅខ្លាំង ដែលងាយនឹងបង្កមានគ្រោះអគ្គីភ័យកើតឡើង។
សូមបញ្ជាក់ថា នៅក្នុងឆ្នាំ២០១៩នេះ ដោយសារតែកំដៅឡើងខ្លាំង យើងសង្គេតឃើញថា នៅទូទាំងប្រទេសមានករណីអគ្គីភ័យកើតឡើងជាញឹកពាប់ គួរឱ្យព្រួយបារម្ភ៕
អត្ថបទ និង រូបភាព ៖ លោក ជា ស្រស់ និងលោក ខេង ឧត្តម
កែសម្រួលអត្ថបទ ៖ លោក សេង ផល្លី
