ឯកឧត្តម ហង់ ពៅ អគ្គនាយកអាជ្ញាធរជាតិអប្សរា ទទួលជួបសំណេះសំណាលការងារជាមួយសភាពាណិជ្ជកម្មអឺរ៉ុបនៅកម្ពុជា ដឹកនាំដោយលោក ហ្គីយ៉ូម ម៉ាឡតាវ៉ែន (Guillaume MALTAVARNE) មន្ត្រីផ្នែកទាក់ទាញវិនិយោគ ដើម្បីស្វែងយល់អំពីកិច្ចការគ្រប់គ្រងសំណល់រឹង និង ទឹកកខ្វក់ក្នុងរមណីយដ្ឋានអង្គរ។
ភាគីអាជ្ញាធរជាតិអប្សរា បានបង្ហាញថាពាក់ព័ន្ធនឹងការគ្រប់គ្រងសំណល់រឹង (សំរាម) ទឹកកខ្វក់នៅក្នុងតំបន់អង្គរ បង្កដោយកត្តាពីរ គឺកត្តាភ្ញៀវទេសចរ និងប្រជាជនក្នុងមូលដ្ឋាន ដោយសារពួកគាត់នៅពុំទាន់យល់ដឹងទូលំទូលាយ អំពីផលប៉ះពាល់ដែលបង្កឡើងដោយសំរាម ការខ្វះអនាម័យជាដើម។
ចំពោះបញ្ហានេះ អាជ្ញាធរជាតិអប្សរា បានធ្វើការអប់រំផ្សព្វផ្សាយ ដល់ប្រជាពលរដ្ឋរស់នៅក្នុងមូលដ្ឋាន ឲ្យបានយល់ដឹងពីតម្លៃបេតិកភណ្ឌ ការគ្រប់គ្រងអនាម័យជុំវិញលំនៅដ្ឋាន ផលប៉ះពាល់នៃការដុតសំរាម និងការចោលថង់ប្លាស្ទិចពាសវាលពាសកាល។ លើសពីនេះ អាជ្ញាធរជាតិអប្សរាក៏មានសកម្មភាពប្រមូលសំរាម ប្រមូលស្លឹកឈើងាប់ សំណល់ផ្ទះបាយ ដើម្បីផលិតជីកំប៉ុស រួមនឹងការសម្អាតបរិស្ថានដោយក្រុមហ៊ុនប្រមូលសំរាមឯកជនក្នុងរមណីដ្ឋានតំបន់អង្គរ និងតំបន់គ្រប់គ្រងដោយអាជ្ញាធរជាតិអប្សរា ជារៀងថ្ងៃផងដែរ។
ក្រោយពីពិភាក្សាស្វែងយល់ពីគ្នាទៅវិញទៅមក លោក ហ្គីយ៉ូម ម៉ាឡតាវ៉ែន បានលើកឡើងនូវការងារសំខាន់ៗជាច្រើន ហើយការងារដែលជាអាទិភាពគឺ ការលើកកម្ពស់ពាណិជ្ជកម្ម ការសិក្សាអំពីសេដ្ឋកិច្ច និងផ្តោតសំខាន់លើការគ្រប់គ្រងសំណល់រឹង និងទឹកកខ្វក់ ហើយលោក ក៏បានបង្ហាញបំណង ចង់ស្វែងយល់លទ្ធភាព ដើម្បីធ្វើកិច្ចសហប្រតិបត្តិការជាលក្ខណៈស្ថាប័ននិងស្ថាប័ន ឬវិស័យឯកជនណាមួយ ដើម្បីធ្វើការងាររួមគ្នាលើវិស័យគ្រប់គ្រងសំណល់រឹង និងគ្រប់គ្រងទឹកកខ្វក់នៅរមណីយដ្ឋានអង្គរ៕
អត្ថបទ និង រូបភាព ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
