តាមសេចក្ដីជូនដំណឹងមួយ ចុះថ្ងៃទី២ ខែឧសភា ឆ្នាំ២០១៩ របស់មន្ទីរសាធារណការ និងដឹកជញ្ជូនខេត្តសៀមរាប បានប្រាប់ដល់ម្ចាស់យានយន្តដែលប្រកបរបរអាជីវកម្មដឹកជញ្ជូនលើមធ្យោបាយ ទោចក្រយានយន្តសណ្ដោងរ៉ឺម៉ក , ត្រីចក្រ យានយន្ត (PassApp, Grab) និងយានយន្តដែលមានកម្លាំងសេសចាប់ពី ១២៥ CCឡើង ឬម៉ូតូអគ្គិសនីលើសពី ១១KW ឱ្យទៅចុះឈ្មោះចូលរៀនច្បាប់ចរាចរណ៍ផ្លូវគោក និងជំនាញបើកបរទោចចក្រយានយន្តដោយឥតគិតថ្លៃ ដើម្បីប្រឡងយកប័ណ្ណបើកបរ។
ការចាប់ផ្តើមទទួលចុះឈ្មោះគឺចាប់ពីថ្ងៃចេញសេចក្ដីជូន ដំណឹងនេះ រហូតដល់ថ្ងៃទី៣០ ខែកក្កដា ឆ្នាំ២០១៩ គឺរយៈពេល៣ខែពេញ ដែលធ្វើនៅការិយាល័យដឹកជញ្ជូនផ្លូវគោក នៃមន្ទីរសាធារណការ និងដឹកជញ្ជូនខេត្ត ដែលមានទីតាំងស្ថិតនៅស្វាយធំ ឬទល់មុខមន្ទីរពេទ្យយោធភូមិភាគទី៤ នៅរៀងរាល់ម៉ោងធ្វើការ៕
អត្ថបទ និង រូបថត : លោក ម៉ាត់ អារីហ្វីន
កែសម្រួលអត្ថបទ : លោក លីវ សាន្ត
