ក្នុងឱកាសប្រារព្ធមីទ្ទិញអបអរសារខួបទី ១៥៦ ទិវាពិភព លោកកាកបាទក្រហម អឌ្ឍចន្ទក្រហម ក្រោមប្រធាន ” ខ្ញុំ ស្រឡាញ់កាកបាទក្រហមកម្ពុជា ” នៅរោងមហោស្រព រ៉ូសាណា ប្រូវេត ស្ថិតនៅក្នុងក្រុងសៀមរាប នាព្រឹកថ្ងៃទី០៥ ខែឧសភា ឆ្នាំ២០១៩នេះ សាខាកាកបាទក្រហមកម្ពុជាខេត្តសៀមរាប ទទួលបានថវិកាពីសប្បុរសជនទាំងក្នុងខេត្ត និង ក្រៅខេត្ត រួមទាំងព្រះសង្ឃផង បានចំនួន ៧៩៧.៩៥៥ ដុល្លារអាមេរិក ។
ពិធីនេះ បានប្រព្រឹត្តទៅក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារ ជាតិ និង ជាប្រធានក្រុមការងារថ្នាក់ជាតិចុះមូលដ្ឋានខេត្តសៀមរាបនិងលោកជំទាវ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងលោកជំទាវ ឯកឧត្តម អុឹង ហឿន ប្រធានក្រុមប្រឹក្សាខេត្ត ឯកឧត្តម លោក ជំទាវ សមាជិក សមាជិកា ព្រឹទ្ធសភា រដ្ឋសភា ឯក ឧត្តម លោជំទាវ សមាជិកសមាជិកាក្រុមការងារថ្នាក់កណ្តាលចុះជួយខេត្ត សមាជិក សមាជិកាក្រុមប្រឹក្សាខេត្ត អភិបាលរងខេត្ត ព្រមទាំងមានវត្ត មាន លោក នាយក នាយករងរដ្ឋបាល កងកម្លាំងប្រដាប់អាវុធទាំងបី ប្រធាន អនុប្រធានមន្ទីរ អង្គភាព អភិបាល អភិបាល រងក្រុង ស្រុក មន្ត្រីរាជការក្នុងខេត្ត អ្នកឧកញ៉ា សប្បុរស ជនក្នុងខេត្ត សសិស្សានុសិស្ស និង យុវជនកាក បាទក្រហម ខេត្ត សរុបប្រមាណជាង ១៤០០នាក់ ជាពិសេសវត្តមាននិមន្តចូលរួមរបស់ព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា និងព្រះវត្តមានព្រះមេគណទាំងពីរគណៈ ។
គួររំលឹកថា ការប្រារព្ធពិធីនេះឡើង ក្នុងគោលបំណងបណ្តុះគំនិត ស្មារតីគាំទ្រ លើកកម្ពស់ការចូលរួមឲ្យបានសកម្មទាំងស្មារតី សម្ភារ និងថវិកា ពីសាធារណជនគ្រប់ទិសទី ដើម្បីមានលទ្ធភាព បម្រើឲ្យចលនាកាកបាទក្រហម ក្នុងការជួយសង្គ្រោះដល់ជនដែលរងគ្រោះដោយគ្រោះមហន្តរាយផ្សេងៗ ។
កាលពីឆ្នាំ២០១៧ និងឆ្នាំ២០១៨ កន្លងមក ការកៀរគរប្រមូលថវិកាសម្រាប់ទិវាកាក បាទក្រហមនេះ បានចំនួនចន្លោះពី ៥៨មុឺន ទៅជាង ៦០មុឺន ដុល្លារអាមេរិកក្នុងមួយឆ្នាំៗ ៕
