នៅព្រឹកថ្ងៃទី0៧ ខែឧសភា ឆ្នាំ២០១៩នេះ សាលាប្រេនី អ៊ិនធឺ ណេសិនណល (CMA Cambodia) និង សាលាអន្តរជាតិអូស្ត្រាលីប៉ាស៊ីហ្វិក (API) ដែលជាសមាជិកសហគ្រិនវ័យក្មេងសាខាខេត្តសៀមរាបដូចគ្នា បានចុះអនុស្សរណៈយោគយល់រួមគ្នាមួយ ក្នុងគោលបំណងផ្តល់ឱកាសដល់សិស្សានុសិស្សនៃសាលាអន្តរជាតិអូស្ត្រាលីប៉ាស៊ីហ្វិក បានសិក្សាកម្មវិធីអភិវឌ្ឍន៍ខួរក្បាល ស៊ីអឹមអេ ឬកម្មវិធីគិតលេខរហ័ស ស្របតាមបរិបទអប់រំពិភពលោក ។
លោក រស់ ប៊ុនធី នាយកសាលាប្រេនី អ៊ិនធឺណេសិនណល មានប្រសាសន៍ថា កម្មវិធីអភិវឌ្ឈន៍ខួរក្បាល « CMA Mental Arithmetic » គឺជាកម្មវិធីដែលល្អជាងគេ និងទំនើបបំផុត សម្រាប់មាតាបិតា អាណាព្យាបាល និងសិស្សានុសិស្សគ្រប់រូប ពីព្រោះកម្មវិធីនេះ បានប្រើប្រាស់បច្ចេកវិទ្យាចម្រុះក្នុងការសិក្សា និងបង្រៀន ដោយមានសៀវភៅ ព្រមទាំងស៊ីឌីជាង២០០ក្បាល មានវីដេអូបង្រៀនអនឡាញ មានលំហាត់អនឡាញសម្រាប់សិស្សានុសិស្សអនុវត្ត ហើយកម្មវិធីនេះ ក៏មានការប្រឡងប្រកួតប្រជែងថ្នាក់អន្តរជាតិដែរ ខណៈកាលពីថ្ងៃទី២២ដល់ថ្ងៃទី២៥ ខែមីនា ឆ្នាំ២០១៩ កន្លងទៅថ្មីៗនេះ លោកបានដឹកនាំសិស្សចំនួន ០៦រូប ចូលរួមប្រកួតប្រជែងថ្នាក់អន្តរជាតិលើកទី១២ នៅប្រទេសសិង្ហបុរី ដែលមានបេក្ខជនចូលរួមប្រឡងចំនួន ១.៣៦០ នាក់ ហើយជាមោទនភាពបំផុតដែលសិស្សកម្ពុជាយើង ទទួលបានចំណាត់ថ្នាក់លេខ២ ចំនួន៣នាក់ និងចំណាត់ថ្នាក់លេខ៤ ចំនួន ៣នាក់ ។
បច្ចុប្បន្ន កម្មវិធីអភិវឌ្ឈន៍ខួរក្បាល ត្រូវបានបណ្តុះបណ្តាលនៅក្នុងប្រទេសជាច្រើនដូចជា សហរដ្ឋអាមេរិក កាណាដា អូស្ត្រាលី New Zealand តៃវ៉ាន់ ចិន អារ៉ាប់រួម ឥណ្ឌូណេស៊ី ម៉ាឡេស៊ី ថៃ ហ្វីលីពីន វៀតណាម ហុងកុង ឥណ្ឌា អេស៊ីប តួគី សិង្ហបុរី និងបណ្តាប្រទេសជាច្រើនទៀត ហើយសិស្សបញ្ចប់ការសិក្សាកម្មវិធីសិក្សាអភិវឌ្ឍន៍ខួរក្បាល មានសមត្ថភាពចងចាំបានល្អ សមត្ថភាពអង្កេត និងស្តាប់បានល្អ បង្កើនការផ្តោតអារម្មណ៍បានល្អ គំនិតច្នៃប្រឌិត និងភាពបត់បែនខ្ពស់ ចេះសម្រេចចិត្តប្រកបដោយភាពត្រឹមត្រូវ គណនាលេខនព្វន្តបានឆាប់រហ័ស បង្កើនភាពឆ្លាតវៃ បង្កើតជំនឿ ជឿជាក់លើខ្លួនឯង៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
