នាព្រឹកថ្ងៃទី០៧ ខែឧសភា ឆ្នាំ២០១៩នេះ សាខាកាកបាទក្រហមកម្ពុជាខេត្តសៀមរាប ដឹកនាំដោយលោកជំទាវ ទៀង អៀង ទៀ សីហា អនុប្រធានកិត្តិយស នៃគណៈកម្មាធិការកាកបាទក្រហមកម្ពុជាសាខាខេត្ត បាននាំយកគ្រឿងឧបភោគ បរិភោគ ដែលជាអំណោយរបស់សាខាកាកបាទក្រហមកម្ពុជាខេត្តសៀមរាប ចែកជូនដល់ប្រជាពលរដ្ឋចំនួន២៩គ្រួសារ មកពីឃុំសំរោងយា ឃុំខ្នាត និងឃុំពួក ក្នុងស្រុកពួក ដែលលំនៅដ្ឋានរបស់ពួកគាត់បានទទួលរងគ្រោះដោយសារខ្យល់កន្ត្រាក់កាលពីពេលថ្មីៗកន្លងទៅនេះ ។
អំណោយដែលពួកគាត់ទទួលបាន រួមមាន ៖ គ្រួសាររលំផ្ទះទាំងស្រុងចំនួន៤ខ្នង ក្នុងមួយគ្រួសារទទួលបាន ឃីត១កញ្ចប់ , សង្ក័សី១៦សន្លឹក , មី១កេស , ត្រីខ១យួរ , អង្ករ៣០គីឡូក្រាម និង ថវិកា១៥ម៉ឺនរៀល រីឯគ្រួសារបើកដំបូ ផ្ទះចំនួន២៥ខ្នង ក្នុងមួយគ្រួសារទទួលបាន ឃីត១កញ្ចប់ , សង្ក័សី១០សន្លឹក , មី១កេស , ត្រីខ១យួរ , អង្ករ៣០គីឡូក្រាម និង ថវិកា១០ម៉ឺនរៀល ។
មានប្រសាសន៍ក្នុងឱកាសនោះ លោកជំទាវ ទៀង អៀង ទៀ សីហា បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋ ជួបការលំបាក ទីទ័លក្រ មានជំងឺ ជនងាយរងគ្រោះ ជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ និងសូមឲ្យបងប្អូនប្រជាពលរដ្ឋទាំងអស់ប្រកាន់យកនូវអនាម័យល្អ រស់នៅស្អាត ហូបស្អាត ផឹកស្អាត។
លោកជំទាវមានប្រសាសន៍ទៀតថា បច្ចុប្បន្ននេះ បញ្ហាអាកាសធាតុតែងប្រែប្រួល ហើយបង្កគ្រោះមហន្តរាយដោយមិនមាននរណាម្នាក់អាចទប់ស្កាត់បានឡើយ ដូច្នេះសូមឲ្យបងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នឲ្យបានខ្ពស់ ដើម្បីការពារករណីគ្រោះថ្នាក់ដែលកើតឡើងជាយថាហេតុ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
