កាលពីថ្ងៃទី០៥ ខែឧសភា ឆ្នាំ២០១៩ ក្រសួងពាណិជ្ជកម្ម ក្រោមកិច្ចសហការជាមួយសាលាខេត្តសៀមរាប បានរៀបចំការបោះឆ្នោតជ្រើសរើស សមាជិកជ្រើសតាំងសមាជិក និងប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ សម្រាប់អណត្តិទី២ លើកទី២។
ការបោះឆ្នោះនេះ បានប្រព្រឹត្តទៅរយៈពេលពេញមួយថ្ងៃ និងចែកជាពីដំណាក់កាល ដោយដំណាក់ទី១ គឺជាការបោះឆ្នោតជ្រើសរើស ដោយអាជីវករដែលមានវត្តមាននៅទីនោះចំនួន ១៧៣នាក់ នៃចំនួនអាជីវករសរុប ចំនួន ២៩៩នាក់ ដែលមានឈ្មោះក្នុងបញ្ជីជាម្ចាស់សន្លឹកឆ្នោត ដើម្បីជ្រើសរើស សមាជិក៥រូបថ្មី ជំនួសសមាជិកចាស់ ៥រូបដែលត្រូវផុតអណត្តិ។ ដំណាក់កាលទី២ បន្ទាប់ពីសមាជិកថ្មី៥រូបត្រូវបានជាប់ឆ្នោត ពួកគេនឹងត្រូវចូលទៅក្នុងសមាជិក១៥រូប ដែលមានសិទ្ធឈរឈ្មោះធ្វើជាប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ ជាលទ្ធផល បន្ទាប់ពីលោកឧកញ៉ាបណ្ឌិត ហ៊ុយ ភៀវ ជាប់ឆ្នោតក្នុងសមាជិក ៥រូបថ្មីហើយ លោកក៏ត្រូវបានជាប់ឆ្នោតជាប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យបន្តទៀត សម្រាប់អណត្តិទី២ លើកទី២។
ឯកឧត្តម វ៉េង សុធី រដ្ឋលេខាធិការក្រសួងពាណិជ្ជកម្ម មានប្រសាសន៍ពន្យល់អំពីការបោះឆ្នោតនេះ យ៉ាងដូច្នេះថា ៖ (សម្ភាសន៍ ឯកឧត្តម វ៉េង សុធី មានក្នុងវីដេអូខាងលើ)
ឯកឧត្តម វ៉េង សុធី បញ្ជាក់ឲ្យដឹងដែរថា ៖ អនុវត្តតាមច្បាប់ ប្រធានសភាពាណិជ្ជកម្មខេត្ត-រាជធានី មានអណត្តិ៦ឆ្នាំ ហើយនៅក្នុងពាក់កណ្តាលអណត្តិ ត្រូវមានការជម្រុះសមាជិកជ្រើសតាំងផុតអណត្តិចំនួន៥០% និងមានការបោះឆ្នោតជ្រើសរើសសមាជិកជ្រើសតាំងថ្មី៥០% បំពេញបន្ថែមវិញផងដែរ ។ ប្រធានសភាពាណិជ្ជកម្មប្រចាំមណ្ឌលខេត្ត-រាជធានី ពុំបានកំណត់ចំនួនអណត្តិឲ្យបន្តឈរឈ្មោះនោះទេ ដរាបណាមានសមាជិកគាំទ្រ ប្រធានសភាពាណិជ្ជកម្មប្រចាំមណ្ឌលខេត្ត-រាជធានី មានសិទ្ធិបន្តការឈរឈ្មោះបោះឆ្នោតជាប្រធានដឹកនាំ ជារៀងរាល់អណត្តិថ្មី ។
ឯកឧត្តម វ៉េង សុធី បានបញ្ជាក់ថា ៖ សភាពាណិជ្ជកម្មកើតចេញពីការបោះឆ្នោត ដែលត្រូវបានការទទួលស្គាល់ដោយអនុក្រឹត ស្ថិតក្រោមក្រសួងពាណិជ្ជកម្មជាអាណាព្យាបាល គឺជាស្ថាប័នដ៏មានសារសំខាន់ណាស់ក្នុងវិស័យវិនិយោគ ។ ឋានានុក្រមរបស់សភាពាណិជ្ជកម្ម មានតាំងពីថ្នាក់ខេត្ត-រាជធានី រហូតដល់ថ្នាក់ជាតិ ។ សភាពាណិជ្ជកម្មកម្ពុជា មានតួនាទីយ៉ាងសំខាន់ក្នុងការគៀងគរ ប្រមូលអ្នកវិនិយោគទុនជាតិ-អន្តរជាតិ ។ សភាពាណិជ្ជកម្មថ្នាក់ខេត្ត-រាជធានី ជាតំណាងឲ្យអាជីវករធំៗនៅក្នុងដែនរដ្ឋបាលរបស់ខ្លួន នៅពេលណាដែលអ្នកវិនិយោគទុនក្នុងស្រុកនិងក្រៅស្រុក មានធុរកិច្ចបណ្តាក់ទុនរកស៊ី គឺស្ថាប័នសភាពាណិជ្ជកម្មនេះហើយ ដែលជាអ្នកសម្របសម្រួល ផ្តល់ភាពកក់ក្តៅនិងការជឿទុកចិត្តឲ្យគ្នាទៅវិញទៅមក ដោះស្រាយរាល់បញ្ហាផ្សេងៗ ដើម្បីឲ្យការទំនាក់ទំនង និងការវិនិយោគលើគ្រប់វិស័យ មានដំណើរការបានល្អប្រសើរ ព្រមទាំងជាស្ពានទំនាក់ទំនង រវាងវិស័យឯកជនជាមួយរាជរដ្ឋាភិបាលផងដែរ ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
