រសៀលថ្ងៃទី០៦ ខែឧសភា ឆ្នាំ២០១៩នេះម្សិលមិញ ឯកឧត្តម ទៀ សីហា អភិបាលខេត្តសៀមរាប បានដឹកនាំប្រតិភូជាជាថ្នាក់ដឹកនាំមន្ទីរអង្គភាពនានាក្នុងខេត្ត ចុះហត្ថលេខាលើក្រាំងមាស អបអរសាទ ចំពោះការឡើងគ្រងរាជ្យ កាលពីថ្ងៃទី០១ ខែឧសភា ឆ្នាំ២០១៩ នៃព្រះករុណា ណារ៉ូហ៊ីតូ ព្រះចៅអធិរាជជប៉ុន ដែលការចុះហត្ថលេខានេះបានធ្វើឡើងនៅការិយាល័យកុងស៊ុលជប៉ុន ប្រចាំនៅខេត្តសៀមរាប ។
បើតាមការបញ្ជាក់នៅក្នុងសាររបស់ឯកឧត្តម ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុន ប្រចាំនៅព្រះរាជាណាចក្រកម្ពុជា បានឲ្យដឹងថា ទំនាក់ទំនងរវាងព្រះរាជវង្សានុវង្សកម្ពុជា ជាមួយជប៉ុន បានចាប់ផ្តើមក្នុងអំឡុងពេល ដែលមានព្រះរាជទស្សនកិច្ចរបស់ព្រះករុណា ព្រះបាទសម្តេចព្រះ នរោត្តម សីហនុ ព្រះមហាក្សត្រនៃព្រះរាជាណាចក្រកម្ពុជា ទៅកាន់ប្រទេសជប៉ុនក្នុងឆ្នាំ១៩៥៣ ។
នៅក្នុងឆ្នាំ២០១០ ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានយាងបំពេញព្រះរាជទស្សនកិច្ចជាផ្លូវរដ្ឋទៅកាន់ប្រទេសជប៉ុន ។
នៅក្នុងខែមិថុនា ឆ្នាំ២០១២ នៅពេលដែលព្រះករុណា ណារ៉ូហ៊ីតូ នៅជាព្រះអង្គម្ចាស់រាជទាយាទ ព្រះអង្គបានយាងមកបំពេញទស្សនកិច្ចមកកាន់ព្រះរាជាណាចក្រកម្ពុជា ។
នៅក្នុងអំឡុងពេលនៃដំណើរបំពេញព្រះរាជទស្សនកិច្ចនេះ ព្រះករុណា ណារ៉ូហ៊ីតូ បានយាងគាល់ព្រះករុណា សម្តេចព្រះបរមនាថ នរោត្តម សីហមុនី និងបានយាងជួបសវនាការជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ព្រមទាំងបានយាងសំណេះសំណាលជាមួយនិស្សិត ដេប៉ាតឺម៉ង់ ភាសាជប៉ុន នៃសាកលវិទ្យាល័យភូមិន្ទភ្នំពេញ ។
ព្រះកុណា ណារ៉ូហ៊ីតូ បានយាងព្រះរាជទស្សនកិច្ចប្រាសាទអង្គរវត្ត និង ប្រាសាទបាយ័ន ក្នុងតំបន់វប្បធម៌ប្រវត្តិសាស្ត្រដ៏ល្បីល្បាញរបស់ពិភពលោក ។
ឥឡូវនេះ រជ្ជកាលថ្មី ( Reiwa ) នឹងចាប់ផ្តើម ។ ពាក្យ Reiwa មានន័យថា វប្បធម៌នឹងត្រូវបានរីកលូតលាស់ឡើង នៅពេលដែលឌួងចិត្តរបស់ប្រជាជនទាំង២ រួមគ្នាជាធ្លុងមួយ ប្រកបដោយសុខដុមរមនា ។
រជ្ជកាល Reiwa ប្រជាជនជប៉ុន និង ប្រជាជនកម្ពុជា បន្តលើកស្ទួយមិត្តភាព និង ការផ្លាស់ប្តូរវប្បធម៌ទៅវិញទៅមក ។ ជប៉ុននឹងកម្ពុជា កាន់តែជិតស្និត ក្នុងរជ្ជកាលថ្មីនេះ ៕
អត្ថបទ និង រូបថត ៖ លោក ងិន គឹមឡេង
