វិស័យពុទ្ធិកសិក្សា បានដើរតួយ៉ាងសំខាន់ នៅក្នុងស្ថាប័នព្រះពុទ្ធសាសនានិងសង្គមជាតិ ដោយវិស័យនេះ បានផ្តោតទៅលើការសិក្សារៀនសូត្ររបស់បព្វជិតពុទ្ធសាសនា និងពលរដ្ឋទូទៅ ហើយសាលាពុទ្ធិកវិទ្យាល័យរាជបូណ៌ ត្រូវបានចាត់ទុកថា ជាសាលាអាទិភាពមួយក្នុងចំណោមសាលាពុទ្ធិកទូទាំងប្រទេស នេះបើតាមប្រសាសន៍ នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ មេបញ្ជាការនគរបាលជាតិប្រចាំទិសភូមិភាគទី៤និងទី៥។
មានប្រសាសន៍ ក្នុងពិធីបើកបវេសនកាលសាលាពុទ្ធិកវិទ្យាល័យរាជបូណ៌ ឆ្នាំសិក្សាថ្មី ២០១៩-២០២០ នៅវត្តរាជបូណ៌ ស្ថិតក្រុងសៀមរាប ថ្ងៃទី០៤ ខែឧសភា ឆ្នាំ២០១៩ នាយឧត្តមសេនីយ៍ ខេង សុមេធ បានមានប្រសាសន៍បន្ថែមថា ៖ យ៉ាងណាក៏ដោយ ព្រះពុទ្ធសាសនា ដែលរដ្ឋធម្មនុញនៃព្រះរាជាណាចក្រកម្ពុជា បានចែងថា ជាសាសនារបស់រដ្ឋនោះ កំពុងមានតួនាទីយ៉ាងសំខាន់ លើការងារអប់រំសីលធម៌នៅក្នុងសង្គមជាតិខ្មែរ និង មានឥទ្ធិពលឲ្យគ្នាទៅវិញទៅមកជាមួយវិស័យអាណាចក្រ ដែលធ្វើឲ្យវិស័យទាំងពីរនេះ ( ពុទ្ធិចក្រ និង អាណាចក្រ ) មិនអាចកាត់ផ្តាច់ចេញពីគ្នាបាននោះឡើយ សម្រាប់ការកសាងសង្គមខ្មែរមួយ ដែលប្រកាន់យកនូវសាមគ្គីធម៌ រួមរស់ជាមួយគ្នាប្រកបដោយភាពសុខដុមរមនា ស្រឡាញ់ការពារសន្តិភាព ដើម្បីកិច្ចដំណើរការអភិវឌ្ឍជាតិ តែជាការពិត គ្រប់បណ្តាសាសនាទាំងអស់នៅកម្ពុជា ( ព្រះពុទ្ធសាសនា- គ្រឹស្ទសាសនា និង មូស្លីមសាសនា ) មានកំណើតរួមគ្នាជាលើកទី២ ក្នុងថ្ងៃតែមួយ គឺ ថ្ងៃ៧ មករា ១៩៧៩ ហើយតម្លៃនៃសន្តិភាពនេះហើយ គឺជាកត្តាសំខាន់បំផុត ក្នុងបុព្វបទ នៃការរីកចម្រើនរបស់បណ្តាសាសនាទាំងឡាយ ដែលកំពុងមានវត្តមាននៅក្នុងព្រះរាជាណាចក្រកម្ពុជា នាពេលបច្ចុប្បន្ននេះ ។
សូមជម្រាបថា សាលាពុទ្ធិកវិទ្យាល័យរាជបូណ៌ បានបង្កើតឡើងនៅក្នុង ព.ស ២៥៤៣ ត្រូវនឹង គ.ស ២០០០ ។ មកទល់នឹងឆ្នាំសិក្សា ២០១៨-២០១៩ មានសាមណសិស្ស ១១ជំនាន់កន្លងមកហើយ បានប្រឡងយកសញ្ញាបត្រពុទ្ធិកមធ្យមសិក្សាទុតិយភូមិ ដែលក្នុង១ជំនាន់ៗ មានសាមណសិស្សប្រមាណជា៦០អង្គ ត្រូវបានប្រឡងជាប់ ។ សម្រាប់ឆ្នាំសិក្សាថ្មី ២០១៩-២០២០ មានសាមណសិស្ស និងសិស្សចូលសិក្សា នៅសាលាពុទ្ធិកវិទ្យាល័យរាជបូណ៌ ចំនួន ៤៥០ អង្គ-នាក់ ។
សូមជម្រាបដែរ ក្នុងពិធីបើកបវេសនកាលសាលាពុទ្ធិកវិទ្យាល័យរាជបូណ៌ ឆ្នាំសិក្សាថ្មី ២០១៩-២០២០ នៅវត្តរាជបូណ៌ ស្ថិតក្រុងសៀមរាប ថ្ងៃទី០៤ ខែឧសភា ឆ្នាំ២០១៩នេះ ក្រោមព្រះវត្តមាន ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ គណៈមហានិកាយ សមាជិកថេរសភាសង្ឃ ឧត្តមទីប្រឹក្សាគណៈសង្ឃនាយកនៃព្រះរាជាណាចក្រកម្ពុជា និងជាព្រះនាយកសាលាពុទ្ធិកវិទ្យាល័យរាជបូណ៌ ព្រះចៅអធិការវត្តរាជបូណ៌ ខេត្តសៀមរាប ។ ក្នុងនោះ បច្ច័យ ៨៨លានរៀល ត្រូវបានប្រគេនថ្វាយចំពោះព្រះវិមលធម្ម ពិន សែម ប្រគេនថ្វាយព្រះមេគណខេត្ត និងព្រះគ្រូចៅអធិការវត្តចំនួន១២ផ្សេងទៀតក្នុងខេត្តសៀមរាប ។ សាមណសិស្សនិងសិស្ស នៃសាលាពុទ្ធិកវិទ្យាល័យរាជបូណ៌ ចំនួន ៤៥០អង្គ-នាក់ ប្រគេននិងជូន បច្ច័យនិងថវិកាសារុប ២២លាន ៥សែនរៀល លោកគ្រូអ្នកគ្រូ៤៥នាក់ ទទួលបានថវិកាសារុប ៤លាន ៥សែនរៀល អមដោយ សៀវភៅ ក្រមង៉ុយ សៀវភៅបណ្ឌិត អ៊ូចុង ប៊ិច និងសៀវភៅសរសេរ ផងដែរ ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
