ក្លឹបអ្នកជិះកង់ ដើម្បីសហគមន៍ គ្រោងនឹងរៀបចំកម្មវិធីជិះកង់មនុស្សធម៌ នៅព្រឹកថ្ងៃអាទិត្យ ទី ២៦ ខែ ឧសភា ឆ្នាំ ២០១៩ ដើម្បីប្រមូលថវិកា ជួយសង្ក្រោះដល់ជីវិតកុមារ ដែលកំពុងត្រូវការព្យាបាលដោយឥតគិតថ្លៃនៅមន្ទីរកុមារពេទ្យគន្ធបុប្ផាខេត្តសៀមរាប ។
បន្ទាប់ពី លោក ពៅ ពិសិដ្ឋ អភិបាលរងខេត្ត តំណាងឯកឧត្តម ទៀ សីហា អភិបាល នៃគណៈអភិបាលសៀមរាប បានទទួលជួបពិភាក្សាការងារ ជាមួយក្រុមការងារក្លឹបអ្នកជិះកង់ ដើម្បីសហគមន៍ ពាក់ព័ន្ធនឹងការរៀបចំកម្មវិធីជិះកង់មនុស្សធម៌នេះ កាលពីថ្ងៃទី០៣ ខែឧសភា ឆ្នាំ២០១៩ អាជ្ញាធរខេត្ត បានឯកភាពទៅនឹងកាលបរិច្ឆេទរៀបចំនេះ រួមនឹងអ្នកចូលរួមប្រមាណ ៩០០នាក់។
សូមបញ្ជាក់ថា កម្មវិធីជិះកង់មនុស្សធម៌ នៅព្រឹកថ្ងៃអាទិត្យ ទី ២៦ ខែ ឧសភា ឆ្នាំ ២០១៩ ដើម្បីប្រមូលថវិកា ជួយសង្ក្រោះដល់ជីវិតកុមារដែលកំពុងត្រូវការព្យាបាលដោយឥតគិតថ្លៃនៅមន្ទីរពេទ្យគន្ធបុប្ផាខេត្តសៀមរាបនេះរៀបចំជា៤ដំណាក់កាល៖
១/វេលាម៉ោង ៧:០០នាទី ព្រឹក ចាប់ផ្ដើមចេញដំណើរពីហាងលក់ និងជួលកង់ អាំង គឹមសាន នៅតាមបណ្ដោយផ្លូវជាតិលេខ៦។
២/ធ្វើដំណើររហូតដល់ទីតាំងឈប់សម្រាកលើកទី១ នៅវិទ្យាល័យសម្តេចឳ
៣/បន្ទាប់មកចេញដំណើរបន្តកាត់តាមអាកាសយានដ្ឋានអន្តរជាតិសៀមរាប រហូតដល់ទីតាំងឈប់សម្រាកទី ២ នៅភោជនីយដ្ឋាន ផ្ទះក្រហម ទល់មុខបាឡុង អង្គរវត្ត។
៤/បន្ទាប់មកទៀតបន្តដំណើរតាមវិថីឆាលដឺហ្គោល រហូតដល់ទីតាំងឈប់សម្រាក ប្រារព្វកម្មវិធី ពិសារអាហារ និងបញ្ចប់ទីឆ្លាខាងត្បួង ព្រះអង្គចេក ព្រះអង្គចមខេត្តសៀមរាប ។
អត្ថបទ និង រូបភាព ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
