នៅព្រឹកថ្ងៃទី១០ ខែវិច្ឆិកា ឆ្នាំ២០២៣នេះ រដ្ឋបាលខេត្តសៀមរាប បានបន្តបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០២៣ សម្រាប់គោលដៅទី៦ ក្រុងសៀមរាប និងស្រុកពួក ដែលជាគោលដៅចុងក្រោយ ក្រោមវត្តមានឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក សុខ ថុល អភិបាលរងខេត្ត រួមនឹងអ្នកពាក់ព័ន្ធជាច្រើនរូប។
លោក សុខ ថុល មានប្រសាសន៍ថា វេទិកាផ្សព្វផ្សាយ និងពិគ្រោះយោបល់ នាឱកាសនេះរៀបចំឡើងក្នុងគោលបំណងផ្តល់ព័ត៌មានជូនប្រជាពលរដ្ឋអំពីសមិទ្ធផលដែលក្រុមប្រឹក្សាខេត្ត រដ្ឋបាលខេត្តសម្រេចបាននាពេលកន្លងមក និងទទួលយកនូវសំណូមពររបស់ប្រជាពលរដ្ឋដើម្បីពិភាក្សា និងឆ្លើយតប ធ្វើយ៉ាងណាជំរុញឱ្យមានការចូលរួម ពិសេសបង្កើនភាពស្និទ្ឋស្នាលរវាងភ្នាក់ងារផ្តល់សេវាសាធារណៈ និងអ្នកទទួលសេវាឱ្យកាន់តែមានភាពល្អប្រសើរឡើង។ ក្នុងនោះដែរលោកក៏បានជម្រុញដល់អង្គភាពពាក់ព័ន្ធ និងអាជ្ញាធរគ្រប់ជាន់ថ្នាក់ ត្រូវពិនិត្យឡើងវិញលើកការងារផែនការ៣ឆ្នាំរំកិល និងការដេញថ្លែក្នុងការស្ថាបនាលើហេដ្ឋារចនាសម្ព័ន្ធក្នុងមូលដ្ឋានខ្លួនឲ្យមានភាពសុក្រិត និងចូលរួមកាត់បន្ថយការប្រើប្លាស្ទីក ដើមី្បបញ្ជៀសការបំពុលភពផែនដីផងដែរ។
ព័ត៌មានជាតិ ថ្មីៗ
សូមជម្រាបថា តាមរយៈវេទិកាផ្សព្វផ្សាយ និងពិគ្រោះយោបល់ណាពេលនេះដែរ ក្រុមការងារបានប្រមូលបាននូវសំណួរ-សំណូមពរប្រជាពលរដ្ឋបានចំនួន៣៦ ដោយក្នុងនោះសំណួរ-សំណូមពរផ្ទាល់មាត់មានចំនួន១៣ ត្រូវបានក្រុមការងារធ្វើការឆ្លើយបំភ្លឺជូនម្ចាស់សំណួរ-សំណូមពរទាំង១៣ ដោយឡែកសំណួរ-សំណូមពរជាលាយលក្ខ័អក្សរមានចំនួន២៣ ក្រុមការងារនឹងយកទៅពិនិត្យ និងពិភាក្សាក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៍អក្សរជូនដល់ម្ចាស់សំណួរ-សំណូមពរតាមរយៈអាជ្ញាធរមូលលំដ្ឋានដែលបងប្អូនរស់នៅវិញ។
ថ្លែងបូកសរុបអង្គវេទិកា ឯកឧត្តម អ៊ាន ឃុន ប្រធានក្រុមប្រឹក្សាខេត្ត មានប្រសាសន៍ថា ក្រោយពីបានស្តាប់សំណូមពរ និងកង្វល់របស់ប្រជាពលរដ្ឋរួចមក រដ្ឋបាលខេត្ត នឹងនាំយកនូវសំណួរ-សំណូមពរទាំងអស់នេះ ទៅធ្វើការពិនិត្យ និងដោះស្រាយជូនបងប្អូន ធ្វើយ៉ាងណាជួយដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិតរបស់បងប្អូនប្រជាពលរដ្ឋក្នុងក្រុង-ស្រុកទូទាំងខេត្ត និងឈានទៅរកការកាត់បន្ថយភាពក្រីក្រ។ ការចូលរួមគាំទ្រពីគ្រប់ផ្នែកពាក់ព័ន្ធ នាឱកាសនេះ អង្គវេទិកាទាំងមូលមានសុទិដ្ឋិនិយមថា វប្បធម៌នៃការចូលរួមកាន់តែមានវឌ្ឍនភាព សំដៅធ្វើយ៉ាងណាឱ្យវិស័យសេដ្ឋកិច្ច និងសង្គមកិច្ចក្នុងក្រុង-ស្រុក នៃខេត្តសៀមរាបទាំងមូលមានការប្រែប្រួលរីកចម្រើនជាងបណ្តាឆ្នាំមុនៗ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល អាណត្តិទី៧ ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
ឯកឧត្តមប្រធានបញ្ជាក់ថា អង្គវេទិកាផ្សព្វផ្សាយ និងពិគ្រោះយោបល់នាពេលនេះដែរ គឺជាជំហានរីកចម្រើនថ្មីបន្ថែមទៀត សម្រាប់រដ្ឋបាលខេត្តសៀមរាប ក្នុងការអនុវត្តមុខងាររបស់ខ្លួនស្របតាមច្បាប់លិខិតបទដ្ឋានគតិយុត្ត នៅថ្នាក់មូលដ្ឋានឱ្យកាន់តែរឹងមាំ និងទូលំទូលាយ៕
អត្ថបទ និងរូបភាព៖ លោក សហការី
កែសម្រួល៖ លោក អ៊ុន ណារាជ្យ
