នៅថ្ងៃទី១០ ខែវិច្ឆិកា ឆ្នាំ២០២៣នេះ ឯកឧត្ដម លីវ សុខុន ទីប្រឹក្សា និងជាប្រធានមន្ទីរព័ត៌មានខេត្ដសៀមរាប បាននាំយកថវិការបស់ឯកឧត្ដម ខៀវ កាញ្ញារិទ្ធ អតីតរដ្ឋមន្ដ្រីក្រសួងព័ត៌មាន និងជាតំណាងរាស្ដ្រខេត្ដកំពង់ចាម និងឯកឧត្ដម ជា ច័ន្ទបរិបូណ៍ រដ្ឋលេខធិការក្រសួងព័ត៌មាន ប្រគល់ជូនដល់ពលរដ្ឋមួយរូប រស់នៅភូមិធម្មជាតិរុនតាឯក ខេត្តសៀមរាប ដែលជាអ្នករើសបានកាបូបលុយភ្ញៀវទេសចរអន្តរជាតិ ហើយបានប្រគល់ជូនដល់ម្ចាស់វិញ។
ឯកឧត្ដម លីវ សុខុន បានបញ្ជាក់ថា ការផ្ដល់អំណោយនេះ ជាកាលើកទឹកចិត្ដដល់ប្រជាលរដ្ឋគំរូ ដែលគាត់មានទឹកចិត្ដល្អ និងគុណធម៌ល្អ មិនចេះចង់បានរបស់អ្នកដ៍ទៃយកទៅធ្វើជារបស់ខ្លួន បើទោះបីមានជីវភាពខ្វះខាត់ក៍ដោយ។ ចំពោះពលរដ្ឋដែលរើសរបស់ភ្ញៀវទេសចរ ហើយប្រគល់ឱ្យម្ចាស់ដើមវិញ គឺជាពលរដ្ឋគំរូប ហើយពិតជាធ្វើឱ្យអាជ្ញាធរមានសមត្ថកិច្ចកោតសរសើរ និងស្ងប់ស្ងែញពីទឹកចិត្ដរបស់គាត់ ដែលរើសបានហើយផ្សព្វផ្សាយតាមបណ្ដាញសង្គម ស្វែងរកម្ចាស់ដើមវិញ ដោយមិនបាត់បង់វត្ថុនៅក្នុងកាបូបនោះឡើយ។
លោក ឈុន គួន ពលរដ្ឋរស់នៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប ដែលបានរើសការបូបលុយភ្ញៀវទេសចរបរទេស បានបញញ្ជាក់ថា ការរើសបានកាបូបហើយស្វែងរកម្ចាស់វិញនេះ ដោយយល់ឃើញពីជនរងគ្រោះជួបការលំបាក ព្រោះថានៅក្នុងការបូបនោះមានថវិកាផង មានប័ណ្ណទស្សនាអង្គរផង ព្រមទាំងមានលិខិតឆ្លងដែនផងដែង។ លោក៏សូមថ្លែងអំណរគុណដល់ឯកឧត្ដមតំណាងរាស្ដ្រខេត្ដ និងរដ្ឋលេខធិការក្រសួងព័ត៌មាន ដែលបានជួយឧបត្ថម្ភថវិកាដល់រូបលោកដើម្បីជួយសម្រួលដល់ជីវភាពរបស់លោក។
បើតាមលោកវរៈសេសនីយ៍ទោ ទី សុខឡែន ប្រធានអង្គភាពនគរបាលទេសចរណ៍ប្រចាំខេត្ដសៀមរាប បានឱ្យដឹងថា កាលពីថ្ងៃទី៧ ខែវិច្ឆិកាកន្លងទៅ ប្រជាពលរដ្ឋមួយរូបបានរើសសម្ភារៈភ្ញៀវទេសចរ នៅតាមផ្លូវទៅអង្គរវត្ដ ហើយបានប្រកាសតាមបណ្ដាញសង្គមហ្វេសប៊ុកស្វែងរកម្ចាស់ រួចហើយប្រគល់ឱ្យសមត្ថកិច្ចនគរបាលប្រគល់ឱ្យម្ចាស់ដើមវិញ។ លោកថា សកម្មភាពទាំងនេះមិនមែនជាលើកទីមួយទេ ដែលប្រជាពលរដ្ឋរើសបានសម្ភារៈភ្ញៀវទេសចរព្រមទាំង និងប្រគល់ឱ្យម្ចាស់ដើមវិញ ដែលនេះបង្ហាញថា ប្រជាពលរដ្ឋខ្មែរ គឺពិតជាមានទឹកចិត្ដល្អ សីលធម៌និងសុជីវធម៌ល្អ បើទោះបីពួកកាត់មានភាពខ្វះខាតក៍ដោយ។ ជាមួយគ្នានេះលោកបានអំពាវដល់ប្រជាពលរដ្ឋខ្មែរគ្រប់រូប នៅពេលរើសបានសម្ភារៈភ្ញៀវទេសចរ សូមឱ្យយកសម្ភារៈទាំងនោះទៅជូនសមត្ថកិច្ចវិញ ដែលមានទីតាំងតាមបណ្ដោយផ្លូវទៅអង្គរវត្ដ ជិតទីតាំងពិនិត្យសំបុត្រទស្សនាអង្គរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
