អង្គកឋិនទានសាមគ្គី ដែលផ្តួចផ្តើមឡើងដោយលោកអាចារ្យ គណៈកម្មការ និងពុទ្ធបរិស័ទជិតឆ្ងាយ រួមទាំងអាជ្ញាធរមូលដ្ឋាន ដើម្បីដង្ហែយកត្រៃចីវរវេប្រគេនចំពោះព្រះភិក្ខុសង្ឃគង់ចាំព្រះវស្សាអស់ត្រីមាស ក្នុងទីបារាយមហានទីរតនារាម ហៅវត្តស្វាយរមៀត នៅភូមិបន្ទាយឈើ សង្កាត់ទឹកវិល ក្រុងសៀមរាប ខេត្តសៀមរាប និងសម្រាប់ទុកប្រើប្រាស់ក្នុងកសាងសមិទ្ធផលនានាក្នុងទីវត្ត ដែលអង្គកឋិនទាននេះមានរយ:ពេលពីរថ្ងៃគឺថ្ងៃទី១១-១២ ខែវិច្ឆិកា ឆ្នាំ២០២៣ ប្រមូលបានបច្ច័យសម្រាប់សង្កត់ត្រៃប្រគេនព្រះសង្ឃសរុបចំនួន ៤៧.២២៧.៧០០រៀល និងប្រាក់ ២.៨១០ដុល្លា។
សូមជម្រាប់ថា ក្នុងពិធីបុណ្យកឋិនទាននេះដែរ ព្រះចៅអធិការវត្តស្វាយរមៀត ក៏បានសហការជាមួយអាជ្ញាធរពាក់ព័ន្ធ បានរៀបចំពិធីប្រណាំងទូកប្រពៃណី រយៈពេលពីរថ្ងៃ នៅបារាយណ៍ទឹកថ្លានៃរមណីយដ្ឋានអង្គរ ដើម្បីរំឭកមនុស្សឱ្យចេះថែរក្សាការពារវប្បធម៌និងអារិយធម៌ប្រណីខ្មែរ និងដើម្បីអបអរសាទរបុណ្យកឋិនទានសាមគ្គី។
ព្រះសច្ចានុបាល នឿម វុទ្ធី ចៅអធិការវត្តបារាយមហានទីរតនារាម ហៅវត្តស្វាយរមៀត ក្រុងសៀមរាប មានសង្ឃដីកាថា ក្នុងបុណ្យអង្គកឋិនទានសាមគ្គី នៅទីវត្តស្វាយរមៀតនេះ ក៏មានរៀបចំធ្វើពិធីប្រណាំងទូកលក្ខណៈប្រពៃណី ដើម្បីរក្សាប្រពៃណីទំនៀមទំលាប់ក្នុងសហគមន៍ ក្នុងការអបអរសាទរអង្គកឋិនទាន ហែរចូលមកទីវត្តនេះ ដើមី្បជូនដល់បងប្អូនដែលបានចូលរួមពិធីបុណ្យបានទស្សនាកម្សាន្ត ក្នុងគោលបំណងរឹតចំណងបង្កើនសាមគ្គីភាពរវាងវត្តអារាមនិងពុទ្ឋបរិស័ទ រក្សាប្រពៃណីទំនៀមទំលាប់របស់ខ្មែរនៅតាមមូលដ្ឋាន។
ព័ត៌មានជាតិ ថ្មីៗ
ព្រះអង្គមានសង្ឃដីកាបន្ថែមថា សម្រាប់កម្មវិធីប្រណាំងទូកប្រពៃណីនេះ ព្រះសង្ឃ គណៈកម្មាការវត្ត និងអាជ្ញាធមូលដ្ឋាន បានរៀបចំឡើងជារៀងរាល់ថ្ងៃ ហើយសម្រាប់ឆ្នាំនេះ មានទូកចូលរួមប្រណាំង ១៧គូ ទូកនារី ៣ទូក ហើយមានកីឡាករចំណុះក្នុងមួយទូក ៦នាក់។ ក្នុងនោះក៏មានកីឡាករប្រណាំងចានដែក ចំនួន ១០គូ ស្មើនឹង ២០នាក់ទៀត ដែលសរុបកីឡាករ ការិនីទាំងអស់ មានចំនួន ២៣៦រូប។ ពិធីប្រកបដោយភាពមហោឡារិក និងអធិកអធ័ម នាពេលនេះក៏មានអមដោយពិធីបណ្តែតប្រទីបសំពះព្រះខែ និងអកអំបុកផងដែរ ដែលមានប្រជាពលរដ្ឋជាច្រើនកុះករទៅកំសាន្ដ និងបានផ្ដល់នូវចំណូលសេដ្ឋកិច្ចដល់ប្រជាពលរដ្ឋនៅសហគមផងដែរ៕
អត្ថបទ និងរូបភាព៖ លោក យូ វង្ស ,បូ សាវី
កែសម្រួល៖ លោក អ៊ុន ណារាជ្យ
