អាជ្ញាធរខេត្ដសៀមរាប សហការជាមួយមន្ទីរពាក់ព័ន្ធ បានរៀបចំពិព័រណ៍ផលិតផលបន្លែ ផ្លែឈើ និងផលិតផលក្នុងស្រុក ដែលមានរយៈពេល៣ថ្ងៃ ចាប់ពីថ្ងៃទី១០-១២ ខែវិច្ឆិកា ឆ្នាំ២០២៣នេះ នៅសួនច្បារព្រះរាជដំណាក់ ក្រុងសៀមរាប ដើម្បីលើកទឹកចិត្ដដល់សហគមន៍អ្នកផលិត និងអ្នកទិញនូវការប្រើប្រាស់ផលិតផលខ្មែរដែលមានស្ដង់ដារត្រឹមត្រូវ។
លោក ភឿន គឹមលី ប្រធានមន្ទីរពាណិជ្ជកម្មខេត្តសៀមរាប បានឲ្យដឹងថា សម្រាប់ការរៀបចំតាំងពិព័រណ៌នាពេលនេះ មានចំនួន ៧០ស្ដង់ ដោយបានដាក់តាំងបន្លែផ្លែឈើ និងផលិតផលក្នុងស្រុកជាច្រើនមុខ ដែលជាស្នារដៃរបស់កូនខ្មែរមកពីសហគមន៍ផ្សេងៗគ្នាទាំងខេត្ដសៀមរាប និងខេត្ដផ្សេងៗទៀត។ ផលិតផលទាំងនោះរួមមាន៖ បន្លែ ផ្លែឈើ ចម្លាក់ថ្ម-ឈើ ប្រាក់-ស្ពាន់ សិប្បកម្មតម្បាញសូត្រ អង្ករ ឱសថបូរាណ វត្ថុអនុស្សាវរីយ៍ ផលិតផលពីការកែច្នៃ ផ្នែកវារីវប្បកម្ម គ្រាប់ធញ្ញជាតិ គ្រឿងទេស នំ ភេសជ្ជៈ និងផលិតផលផ្សេងៗជាច្រើនទៀត ។
លោកបន្ដថា ការតាំងផលិតផលក្នុងស្រុកនេះដែរ គឺដើម្បីបង្ហាញដល់ម្ចាស់អាជីវកម្មទេសចរ ភ្ញៀវទេសចរ ឱ្យពួកគាត់ប្រើប្រាស់ផលិតផលក្នុងស្រុកដែលមានគុណភាពល្អ មិនមានជាតិគីមី ព្រមទាំងជួយលើកកំពស់ដល់អ្នកផលិតផង ហើយផលិតផលបន្លែផ្លែឈើ ព្រមទាំងគ្រឿងទាំងអស់មិនខុសពីផលិតផលភូមិមួយនោះឡើយ។
លោក នាក់ ណេរ៉ុន អភិបាលរងខេត្ដសៀមរាប បានបញ្ជាក់ថា យុទ្ធនាការទិញផលិតផលខ្មែរ គឺជាផ្នែកមួយដ៏សំខាន់នៃការអនុវត្តគោលនយោបាយអភិវឌ្ឍន៍វិស័យពាណិជ្ជកម្មរបស់ក្រសួងពាណិជ្ជកម្ម ដែលធ្វើឱ្យអ្នកប្រើប្រាស់ផលិតផលក្នុងស្រុកជំនួសទំនិញនាំចូលពីបរទេសជាជំហានៗ។ បន្លែផ្លែឈើផលិតផលក្នុងស្រុក ក្នុងការផ្គត់ផ្គង់នៅមិនទាន់បំពេញបាននូវតម្រូវការរបស់ប្រជាពលរដ្ឋនៅឡើយ ដោយបាននាំចូលបន្ថែមមកពីបណ្តាប្រទេសជិតខាងទៀតផង។
លោកអភិបាលរងខេត្ត បានបង្ហាញក្ដីសង្ឃឹមថា ការដាក់តាំងបង្ហាញដែលមានការចូលរួមពីវិស័យរដ្ឋ ឯកជន សមាគម អង្គការ សណ្ឋាគារ ភោជណីយដ្ឋាន និងអ្នកផលិតនៅពេលនេះ និង ផ្តល់លទ្ធភាពកាន់តែប្រសើរ ការជម្រុញឲ្យអ្នកផលិតផលក្នុងស្រុក សំដៅធ្វើការនាំចេញជាបណ្តើរៗ ព្រមទាំងចង់បានបន្លែ ផ្លែឈើមានសុវត្ថិភាព នឹង មានសមត្ថភាពក្នុងការកែច្នៃឲ្យមានភាពល្អជាមុន ដែលជាសញ្ញាណដ៏ល្អក្នុងការផលិត និងពង្រីការដាំដុះ ការកែច្នៃ និងទីផ្សារ ដែលមានមន្ទីរពាណិជ្ជកម្ម និងដៃគូពាក់ព័ន្ធទាំងអស់ ដើមី្បធ្វើឲ្យផលិតផលក្នុងស្រុកកើនឡើង ទាំងបរិមាណ គុណភាព សោភណ្ឌភាព ក្នុងសមត្ថភាពប្រកួតប្រជែងនៅតាមទីផ្សារ។ លោកក៏បានជម្រុញដល់ផលិតករ ពាណិជ្ជករកម្ពុជាត្រូវខិតខំបង្កើតគំនិតច្នៃប្រឌិតថ្មីៗបន្ថែមទៀត សម្រាប់បំរើទីផ្សារតាមគោលការណ៍ «ភក្តីភាពចំពោះពាណិជ្ជកម្ម» គឺផលិតផលត្រូវតែមានគុណភាព មានសុវត្ថិភាពសម្រាប់អ្នកប្រើប្រាស់មានស្តង់ដារអនាម័យ និងមានតម្លៃសមរម្យ ក្នុងការចូលរួមប្រកួតប្រជែងក្នុងទីផ្សារសេរីបាន ៕
អត្ថបទ និងរូបភាព៖ លោក ម៉ី សុខារិទ្ធ ,បូ សាវី
កែសម្រួល៖ លោក អ៊ុន ណារាជ្យ
