គណៈកម្មាធិការជាតិអូឡាំពិកម្ពុជា នឹងរៀបចំទិវារត់ប្រណាំងអន្តរជាតិពាក់កណ្តាលម៉ារ៉ាតុងអង្គរ លើកទី២៨ នៅថ្ងៃទី៣ ខែធ្នូ ឆ្នាំ២០២៣ នៅក្នុងតំបន់បេតិកភណ្ឌអង្គរ ដោយមានការចូលរួមពីសំណាក់កីឡាករ-កីឡាការីប្រមាណជាង ៥០ប្រទេសបានចូលរួម។
ថ្លែងក្នុងកិច្ចប្រជុំត្រួតពិនិត្យ និងពិភាក្សាការងារជាមួយស្ថាប័នពាក់ព័ន្ធ នៅខេត្តសៀមរាប នារសៀលថ្ងៃទី១៣ ខែវិច្ឆិកា ឆ្នាំ២០២៣នេះ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) បានបង្ហាញថា ទិវារត់ប្រណាំងអន្តរជាតិពាក់កណ្តាលម៉ារ៉ាតុង លើកទី២៨ នៅក្នុងតំបន់អង្គរ នៅឆ្នាំនេះ មាន ២វិញ្ញាសាដែលត្រូវរត់រួមមាន៖ រត់ចម្ងាយ ២១គីឡូម៉ែត្រ និងចម្ងាយ ១០គីឡូម៉ែត្រ ដោយមានកីឡាករ-កីឡាការីចំនួន ៥៨ប្រទេសបានចូលរួម ហើយគិតមកទល់នឹងពេលនេះ មានកីឡាករ-កីឡាការីជា ១ម៉ឹននាក់ហើយបានចុះឈ្មោះចូលរួមប្រកួត។
ឯកឧត្តម វ៉ាត់ ចំរើន បានបញ្ជាក់ថា ការរៀបចំទិវានេះឡើងក្នុងគោលបំណងសំខាន់ៗ គឺដើម្បីផ្សព្វផ្សាយពីតំបន់ទេសចរណ៍ជាប្រវត្តិសាស្ដ្ររបស់កម្ពុជា ហើយក៏ផ្សារភ្ជាប់នឹងការងារសង្គមផងដែរ ដោយថវិកាទទួលបានពីការរៀបចំ នឹងត្រូវបរិច្ចាគជួយដល់មន្ទីរពេទ្យកុមារ កាកបាទក្រហមកម្ពុជា កុមារកំព្រា និងជនពិការដោយគ្រាប់មីនផងដែរ។ ទិវានៅឆ្នាំនេះដែរ ក៏ជាការរំលឹកខួបអនុស្សាវរីយ៍រយៈពេល ៧០ឆ្នាំ នៃចំណងមិត្តភាពកម្ពុជា-ជប៉ុន ដោយក្នុងទិវានេះក៏មានការចូលរួមពីសំណាក់ថ្នាក់ដឹកនាំជាន់ខ្ពស់នៃប្រទេសជប៉ុនផងដែរ។
ក្នុងនាមអាជ្ញាធរខេត្ត លោកស្រី ម៉មនី រង្សី អភិបាលរងខេត្តសៀមរាប បានជំរុញ និងណែនាំដល់អាជ្ញាធរខេត្ត ជាពិសេសកម្លាំងសមត្ថកិច្ចចម្រុះ ត្រូវយកចិត្តទុកដាក់ឲ្យបានខ្ពស់ក្នុងរៀបចំសន្តិសុខ សណ្ដាប់ធ្នាប់រៀបរយនៅមុន និងពេលចាប់ផ្ដើមកម្មវិធី ជូនដល់ថ្នាក់ដឹកនាំ កីឡាករ-កីឡាការនី រួមនឹងសាធារណៈជនទូទៅ ធ្វើយ៉ាងកុំឲ្យមានបញ្ហាណាក៏មួយជាយថាហេតុ។ ហើយក៏សូមជំរុញដល់ប្រជាពលរដ្ឋ និងអ្នកចូលរួមព្រឹត្តិការណ៍ទាំងអស់ត្រូវរក្សាអនាម័យ បរិស្ថាន និងសូមនែនាំដល់ប្រជាពលរដ្ឋខ្មែរ នៅតំបន់ដែលកីឡាករ-កីឡាការនីឆ្លងកាត់ ត្រូវចូលរួមអបអរសាទរ ការរត់របស់កីឡាករ-កីឡាការិនីជាតិ និងអន្ដរជាតិ ដើម្បីជំរុញព្រឹត្តិការណ៍មួយនេះ ឲ្យកាន់តែទទួលបានជោគជ័យ៕
អត្ថបទ និងរូបភាព៖ លោក អ៊ុន ណារាជ្យ
