ក្រុមប្រឹក្សាខេត្តសៀមរាប នៅថ្ងៃទី១៣ ខែវិច្ឆិកា ឆ្នាំ២០២៣ បានបើកកិច្ចប្រជុំសាមញ្ញលើកទី៥៤ ឆ្នាំទី៥ ជាឆ្នាំចុងក្រោយ នៃអាណត្តិទី៣ របស់ខ្លួន ក្រោមកិច្ចដឹកនាំរបស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង លោកស្រី ម៉ននី រងី្ស អភិបាលរងខេត្ត ព្រមទាំងវត្តមានថ្នាក់ដឹកនាំខេត្ត និងអាជ្ញាធរជុំវិញខេត្តជាច្រើនរូប។
ក្នុងកិច្ចប្រជុំនេះសមាជិកសមាជិកា បានធ្វើការអនុម័តលើរបៀបវារៈនៃកិច្ចប្រជុំដែលបានគ្រោងទុកចំនួន៣ និងការលើកឡើងនូវបញ្ហាពាក់ព័ន្ធមួយចំនួន ដោយបានផ្តោតទៅលើបញ្ញាការអនុវត្តគោនយោបាយភូមិឃុំសង្កាត់មានសុវត្ថិភាព បញ្ហាសន្តិសុខសណ្តាប់ធ្នាប់សាធារណៈ និងចរាចរណ៍ ការកែតម្រូវខ្លឹមសារ តួលេខក្នុងរបាយការណ៍ឲ្យបានត្រឹមត្រូវ បញ្ហាលំនៅដ្ឋាននៅដែលមិនទាន់រុះរើនិងបរិស្ថាន ក្នុងតំបន់អង្គរធ្វើឲ្យប៉ះពាល់សោភណ្ឌភាព បញ្ហាតូបលក់ដូរ(ផ្សាររាត្រី)នៅដងផ្លូវ៦០ម៉ែត្រ(អង្គរឃ្យុងយូ)ធ្វើឲ្យប៉ះពាល់ដល់ចរាចរណ៍ បញ្ហាអនាម័យព្រៃតាមផ្លូវជាតិ ការទុកដាក់សម្រាមគ្នាសណ្តាប់ធ្នាប់។ ក្នុងនោះបណ្តាលមន្ទីរ-អង្គភាពពាក់ពន្ធ័ បានធ្វើការបំភ្លឺជូនដល់អង្គប្រជុំ ហើយអង្គប្រជុំក៏បានអនុម័តទៅលើពង្រាងរបាយការណ៍ប្រចាំខែតុលា ឆ្នាំ២០២៣ របស់រដ្ឋបាលខេត្តសៀមរាប ផងដែរ។
ក្នុងឱកាសនោះលោកស្រី ម៉ននី រងី្ស ក៏បានធ្វើការវាយតម្លៃខ្ពស់ ទៅលើលទ្ធផលការងារប្រចាំខែតុលា ព្រមទាំងបានជម្រុញដល់ថ្នាក់ដឹកនាំមន្ទីរអង្គភាព អាជ្ញាធរក្រុងស្រុក សំខាន់គ្រប់ទីចាត់ការអង្គភាពចំណុះសាលាខេត្ត ដែលជាសេនាធិការ ជូនគណៈអភិបាលខេត្ត នីតិកាលទី៧ ត្រូវបង្កើនការយកចិត្តទុកដាក់ខ្ពស់ ក្នុងកិច្ចកសាង និងអភិវឌ្ឍន៍ ដោយផ្តោតសំខាន់ទៅលើការងារសន្តិសុខ សណ្តាប់ធ្នាប់សាធារណៈ បញ្ហាអនាម័យ បរិស្ថានតាមក្រុងស្រុក ក្នុងការទទួលស្វាគមន៍ភ្ញៀវទេសចរជាតិ អន្តរជាតិ ព្រមទាំងប្រតិភូជាន់ខ្ពស់ជាតិ អន្តរជាតិទៀតផង។
ព័ត៌មានជាតិ ថ្មីៗ
ក្នុងនោះលោកស្រីអភិបាលរងខេត្ត ក៏បានក្រើនរំលឹកដល់អាជ្ញាធរក្រុងស្រុក ត្រូវអនុវត្តឲ្យបាននូវការណែនាំរបស់សម្តេចធិបតីនាយករដ្ឋមន្ត្រី លើយុទ្ធសាស្ត្របញ្ចកោណ នីតិកាលទី៧នៃរដ្ឋសភា។ លោកស្រីបានជម្រុញដល់ក្រុមប្រឹក្សាឃុំសង្កាត់ត្រូវចូលរួមរាល់វេទិកាសាធារណៈគ្រប់ពេលវេលា និងសូមឲ្យអាជ្ញាធរក្រុង ស្រុក ត្រូវអនុវត្តឲ្យបានជាប្រចាំ ការធ្វើអនាម័យ បរិស្ថាននៅតាមដងផ្លូវជាតិ ព្រមទាំងការទុកដាក់សម្រាមឲ្យបានត្រឹមត្រូវផងដែរ។
ថ្លែងបូកសរុបក្នុងកិច្ចប្រជុំ ឯកឧត្តម អ៊ាន ឃុន ប្រធានក្រុមប្រឹក្សាខេត្ត មាប្រសាសន៍ថា ក្រោយការបង្កើតនូវរាជរដ្ឋាភិបាល នីតិកាលទី៧ រដ្ឋបាលខេត្តសៀមរាបបានអនុវត្តកិច្ចការសំខាន់ៗ លើកការងារសន្តិសុខ សណ្តាប់ ធ្នាប់សាធារណៈ ការគ្រប់គ្រងគ្រោះមហន្តរាយ ដោយខ្យល់កន្ទ្រាក់ ជំនន់ទឹកភ្លៀង ដោយគណៈអភិបាលខេត្ត មន្ត្រីពាក់ព័ន្ធ សហការគ្នាចុះផ្ទាល់ដល់មូលដ្ឋាន និង ដោះស្រាយបានទាន់ពេលវេលាដល់គ្រួសារជួបការលំបាក និងគ្រួសារងាយរងគ្រោះ បន្ថែមពីនេះ ប្រជាពលរដ្ឋជួបការលំបាក ត្រូវបានអាជ្ញាធរខេត្តយកចិត្តទុកដាក់ សម្របសម្រួលនិងដោះស្រាយរាល់បញ្ហា ប្រកបដោយប្រសិទ្ធភាព ឈរលើស្មារតីសាមគ្គីភាពផ្ទៃក្នុង និង មានភាពទទួលខុសត្រូវ ស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការ នៅរដ្ឋបាលថ្នាក់ក្រោមជាតិផងដែរ ។ ឯកឧត្តម ក៏បានជម្រុញដល់អាជ្ញាធរខេត្ត ក្រុងស្រុក ត្រូវបង្កើន និងពង្រឹងលើការងារសន្តិសុខ សណ្តាប់ធ្នាប់សាធារណៈ ចរាចរណ៍ អនាម័យ បរិស្ថានក្នុងឱកាសព្រះរាជពិធីបុណ្យអុំទូក បណ្តែប្រទីប សំពាក់ព្រះខែ និង អកអំបុក នាពេលឆាប់ៗខាងមុខនេះ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
