ក្នុងសិក្ខាសាលាបិទបញ្ចប់គម្រោងលើកកម្ពស់ជីវភាពប្រជាជនក្រីក្រ (លាភ) ដែលធ្វើឡើងនៅខេត្តសៀមរាប នៅព្រឹកថ្ងៃទី១៣ ខែវិច្ឆិកា ឆ្នាំ២០២៣ ក្រុមប្រជាពលរដ្ឋដែលទទួលបានផលពីគម្រោងលាភ បានលើកឡើងថា គម្រោងលាភ ដែលបានដាក់ឲ្យអនុវត្តរយៈ៦ឆ្នាំមកនេះ ពិតជាបានផ្លាស់ប្តូរជីវភាពរបស់ពួកគាត់ឲ្យមានភាពល្អប្រសើរ ដូច្នេះពួកគាត់ចង់ឃើញរាជរដ្ឋាភិបាលនៅអនុវត្តបន្តគម្រោងមួយនេះទៀត ដើម្បីជួយដល់គ្រួសារក្រីក្រផ្សេងទៀត ព្រោះគម្រោងនេះ បានជួយដល់ពួកគាត់ឱ្យមានមុខរបរ និងចេញផុតពីការលំបាក។
សូមជម្រាបថា គម្រោងលើកកម្ពស់ជីវភាពប្រជាជនក្រីក្រ(លាភ) ត្រូវបានបង្កើតឡើង ដើម្បីឆ្លើយតបទៅនឹង គោលនយោបាយរបស់រាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធសង្គម និងសេដ្ឋកិច្ច តាមរយៈការបង្កើនលទ្ធភាពរបស់គ្រួសារក្រីក្រមានប័ណ្ណក្រីក្រកម្រិតទី១ និង កម្រិតទី២ និងជនងាយរងគ្រោះ នៅតំបន់ជនបទ និងទីក្រុងឱ្យទទួលបាននូវសេវាមូលដ្ឋានចាំបាច់នានាមានដូចជា សេវាហិរញ្ញវត្ថុបណ្តុះបណ្តាល ជំនាញបច្ចេកំទេសឱកាសបង្កើនប្រាក់ចំណូល និងការអភិវឌ្ឍ ហេដ្ឋារចនាសម្ព័ន្ធសហគមន៍ខ្នាតតូច ធ្វើឱ្យជីវភាពរបស់ពួកគាត់បានប្រសើរឡើងចាកចេញពីភាពក្រីក្រ។ គម្រោងនេះ គាំទ្រដោយធនាគារ ពិភពលោកដឹកនាំសម្រសម្រួលដោយក្រសួងមហាផ្ទៃ ហើយអនុវត្តផ្ទាល់ដោយរដ្ឋបាលខេត្តសៀមរាប និងសាលារាជធានីភ្នំពេញ ដោយសហការជាមួយក្រសួងកសិកម្ម រុក្ខាប្រមាញ់ និងនេសាទ។
លោក សុខ ថុល អភិបាលរងនៃគណៈអភិបាលខេត្តសៀមរាប បានថ្លែងថា សម្រាប់នៅខេត្តសៀមរាប គម្រោងលាភ បានអនុវត្តនៅក្នុងឃុំ សង្កាត់គោលដៅ ចំនួន៤៧ នៃក្រុងស្រុកចំនួន ៩ ។ ក្នុងការអនុវត្តរយៈពេល៦ ឆ្នាំនេះ គម្រោងសម្រចបាននូវសមិទ្ធផលសំខាន់ៗរួមមាន បានកែប្រែដល់ប្រជាពលរដ្ឋដោយបានផ្លាស់ប្តូរផ្នត់គំនិតខិតខំប្រឹងប្រែងអភិវឌ្ឍន៍ការងារប្រចាំថ្ងៃដោយបានប្រែជីវភាពក្រីក្រ ផ្លាស់ប្តូរពីរបៀបរបបនៃការគ្រប់គ្រង ដោយបញ្ជ្រាបការចូលរួមរបស់ប្រជាពលរដ្ឋ តាមបែបប្រជាធិតេយ្យនៃក្រុមនីមួយៗ។ ក្នុងស្មារតីនេះ លោកសង្ឃឹមថា រាជរដ្ឋាភិបាល ក្រសួងសេដ្ឋកិច្ច និងហិរញ្ញវត្ថុ និងដៃគូអភិវឌ្ឍ នឹងបន្តគាំទ្រ និងផ្តល់ឱកាសដើម្បីអនុវត្តគម្រោងប្រភេទបែបនេះនាពេលអនាគត។
ព័ត៌មានជាតិ ថ្មីៗ
ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានសម្របសម្រួលគម្រោងលាភថ្នាក់ជាតិ បានមានប្រសាសន៍ថា គម្រោងនេះ បានចងក្រងក្រុមជួយខ្លួនឯង ក្រុមផលិត និងសហគមន៍កសិកម្ម ធ្វើឱ្យពួកគាត់ចេះបង្កើនដើមទុនការផលិតនិងស្វែងរកទីផ្សារ។ ទុនបង្វិលក្នុងក្រុមបានជួយសម្រាលទុក្ខលំបាក ពួកគាត់បានជាច្រើន តាមរយៈកម្ចីប្រាក់ពីក្រុមយកទៅព្យាបាលជំងឺបន្ទាន់ និងការប្រកបរចិញ្ចឹមជីវិត ដូចជាដាំដំណាំ ចិញ្ចឹមសត្វ (មាន់ ជ្រូក ត្រី…) និងមានដើមទុនបង្កើន មុខរបរលក់ដូរ ។ល។ ដូច្នេះគម្រោងលាភ ពិតជាបានចូលរួមចំណែក ជាមួយរាជរដ្ឋាភិបាលកម្ពុជា ក្នុងការអនុវត្តយុទ្ធសាស្ត្របញ្ចកោណរបស់រាជរដ្ឋាភិបាល។
ឯកឧត្តមក៏បាន ស្នើឱ្យការិយាល័យសម្របសម្រួលគម្រោង ក្រសួងមហាផ្ទៃធ្វើការរៀបចំចងក្រងនិងផ្សព្វផ្សាយនូវសមទ្ធិផលនិងបទពិសោធន៍ទាំងនេះជូនដល់ក្រសួង ស្ថាប័ន និងដៃគូពាក់ព័ន្ធ និងរដ្ឋបាលថ្នាក់ក្រោមជាតិគ្រប់លំដាប់ថ្នាក់ដើម្បីធ្វើការសិក្សាស្រាវជ្រាវ នូវបទពិសោធន៍ល្អៗ ដែលជាសមទ្ធិផលរបស់គម្រោងលើកកម្ពស់ជីវភាពប្រជាជនក្រីក្រ។ ទន្ទឹមនេះ ផ្អែកលើសមទ្ធិផលទាំងនេះ ឯកឧត្តមក៏បានស្នើឱ្យធនាគារពិភពលោកធ្វើការពិនិត្យពិចារណា ក្នុងការបន្ត និងពង្រីកគម្រោងប្រភេទនេះ ដល់បណ្តាខេត្តដទៃទៀត តាមស្ថានភាពជាក់ស្តែង ដោយសារគម្រោងនេះ បានចូលរួមដោះស្រាយ និងជួយដល់គ្រួសារប្រជាជនក្រីក្រពិតប្រាកដ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
