នៅព្រឹកថ្ងៃទី១៣ ខែវិច្ឆិកា ឆ្នាំ២០២៣នេះ មន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តសៀមរាប និងអាជ្ញាធរស្រុកក្រឡាញ់ បានធ្វើការបិទផ្សាយជាសាធារណៈនូវឯកសារនៃការវិនិច្ឆ័យក្បាលដីស្ថិតនៅក្នុងបរិវេណវត្តព្រះពុទ្ធអណ្តែតរង្សីដំណាក់ខ្ចាស់ សម្រាប់បងប្អូនប្រជាពលរដ្ឋចំនូន ២ភូមិ គឺភូមិឱម៉ាល មានក្បាលដីចំនួន ៥៤៤ក្បាលដី និងភូមិតាំងយូរ មានចំនួនក្បាលដី ៦ក្បាលដី ស្ថិតក្នុងឃុំ២ គឺឃុំសំបូរ និង ឃុំស្រណាល ស្រុកក្រឡាញ់ខេត្តសៀមរាប ក្បាលដីសរុបទាំង ២ភូមិ ចំនួន ៥៥០ក្បាលដី។ នៅក្នុងការបិទផ្សាយនូវឯកសារនៃការវិនិច្ឆ័យក្បាលដីនេះ គឺតម្រួវឲ្យបងប្អូនប្រជាពលរដ្ឋត្រូវមានអត្តសញ្ញាណប័ណ្ណ សំបុត្រកំណើត និងសៀវភៅគ្រួសារ ដើម្បីយកផ្ទៀងផ្ទាត់នៅក្បាលដីរបស់ខ្លួន គឺទុកឲ្យរយ:ពេល ១៥ថ្ងៃ សម្រាប់ត្រួតពិនិត្យមើល នឹងផ្ទៀងផ្ទាត់បញ្ជីឈ្មោះក្បាលដី។
លោក ប៊ូ ជុំសម្បត្តិ អនុប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តសៀមរាប បានបង្ហាញថា ក្នុងចំណោមខេត្តអទិភាពទាំង ២៥ រាជធានី-ខេត្ត ដែលត្រូវបានអនុវត្តការចុះបញ្ជីដីធ្លី មានលក្ខណៈជាប្រព័ន្ធរបស់កម្មវិធីអនុវិស័យរដ្ឋបាលដីធ្លីដែលគាំទ្រថវិកាដោយរាជរដ្ឋាភិបាលកម្ពុជា ក្រោមការដឹកនាំ របស់ក្រសួងរៀបចំដែនដី នគរូបនីយកម្ម និងសំណង់ អនុវត្តការងារដោយមន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តសៀមរាប ដោយមានកិច្ចសហការពីអាជ្ញាធរដែនដី ជាពិសេសតាមការចង្អុលបង្ហាញរបស់ឯកឧត្តម អភិបាល នៃគណៈអភិបាលខេត្តសៀមរាបផងដែរ។
លោក បានបន្តថា ចំពោះការចុះបញ្ជីដីធ្លីមានលក្ខណៈជាប្រព័ន្ធ គឺយោងតាមអនុក្រឹត្យលេខ ៤៦ អនក្រ,បក ចុះថ្ងៃទី ៣១ ខែឧសភា ឆ្នាំ ២០០២ ស្តីពីនីតិវិធីនៃការកសាងប្លង់សុរិយោដី និងសៀវភៅគោលបញ្ជីដីធ្លី, អនុក្រឹត្យលេខ ១២២ អនក្រ.បក ចុះថ្ងៃទី ០៩ ខែមិថុនា ឆ្នាំ ២០១៦ និងសារាចរណែនាំលេខ ០១ ដនស/សដ ចុះថ្ងៃទី ១៩ ខែសីហា ឆ្នាំ ២០០២ អនុវត្តនីតិវិធីន ការកសាងប្លង់សុរិយោដី និងសៀវភៅគោលបញ្ជីដីធ្លី ដើម្បីធានាបាននូវសុវត្ថិភាពក្នុងការកាន់កាប់ដីធ្លី របស់ប្រជាពលរដ្ឋ តាមរយៈការចេញវិញ្ញាបនបត្រសំគាល់ម្ចាស់អចលនវត្ថុ (ប័ណ្ណកម្មសិទ្ធិ) ជូនដល់ប្រជាពលរដ្ឋខ្មែរ។ ជាលទ្ធផលនៃការចុះបញ្ជីដីធ្លីមានលក្ខណៈជាប្រព័ន្ធសំរាប់ខេត្តសៀមរាប មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានធ្វើការបិទផ្សាយ និងចេញប័ណ្ណរួចបាន ៨៧ ភូមិហើយ។
ជាមួយគ្នានោះ លោក មឿ សុភី អភិបាលរងស្រុកក្រឡាញ់ បានលើកឡើងថា កន្លងមកអាជ្ញាធរខេត្ត និង មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប តែងតែយកចិត្តទុកដាក់ក្នុងការចុះវាស់វែងកំណត់ព្រំដីនៃតំបន់២ជាប់មាត់បឹងទន្លេសាប ដោយការចុះបញ្ជី និងការផ្តល់បណ្ណសម្គាល់សិទ្ធិប្រើប្រាស់ និងអាស្រ័យផលលើដីរដ្ឋក្នុងតំបន់២ដែលបានចុះនៅក្នុងសៀវភៅបញ្ជីពីរប្រភេទដែលកត់ត្រាទិន្ន័យក្បាលដីក្នុងភូមិមួយគឺ សៀវភៅគោលបញ្ជីដីធ្លី និងសៀវភៅចុះបញ្ជីសិទ្ធិប្រើប្រាស់ និងអាស្រ័យផលដីតំបន់២។
លោក បានបញ្ជាក់ទៀតថា ដូច្នេះ រដ្ឋបាលសុរិយោដីដែលមានសមត្ថកិច្ច ត្រូវចងចាំ និងយកចិត្តទុកដាក់ដល់ការដើរលេខក្បាលដីនៅពេលដែលមានតម្រូវការចុះបញ្ជីបន្ត ពិសេសការបំបែក ក្បាលដី និងការបង្រួមក្បាលដីកម្មសិទ្ធិ ក៍ដូចជាការចុះបញ្ជីអំពីសន្តតិកម្មពាក់ព័ន្ធនឹងសិទ្ធិប្រើប្រាស់ និងអាស្រ័យ ផលផងដែរ ដែលតម្រូវឱ្យប្រើលេខក្បាលដីថ្មីបន្តពីលេខក្បាលដីចុងក្រោយក្នុងភូមិ ហើយដែលក្បាលដីទាំងនោះ ត្រូវបានចុះបញ្ជីនៅក្នុងសៀវភៅបញ្ជីពីរប្រភេទផ្សេងគ្នា។ នាយកដ្ឋានបច្ចេកវិទ្យាព័ត៌មានសុរិយោដីនឹងចុះធ្វើបច្ចុប្បន្នភាពក្នុងប្រព័ន្ធមូលដ្ឋានទិន្នន័យចុះបញ្ជីដី ដោយបន្ថែមព័ត៌មានពាក់ព័ន្ធនឹងការចុះបញ្ជីសិទ្ធិប្រើប្រាស់ និងអាស្រ័យផល និងណែនាំអំពីការប្រើប្រាស់ជាដើម៕
អត្ថបទ និង រូបភាព ៖ លោក ស៊ាន សុផាត
