ក្រុមហ៊ុនអាកាសចរណ៍ Thai Airway International បានហោះពីទីក្រុងបាងកង មកកាន់អាកាសយានដ្ឋានសៀមរាប-អង្គរ ជាលើកដំបូងរបស់ខ្លួន ជាមួយនឹងភ្ញៀវទេសចរណ៍ចំនួន ១៥៧នាក់ នៅថ្ងៃទី០១ ខែធ្នូ ឆ្នាំ២០២៣នេះ។
ឯកឧត្ដម ប៊ុន រដ្ឋា នាយកអាកាសយានដ្ឋានអន្ដរជាតិសៀមរាប-អង្គរ និងជាទីប្រឹក្សារដ្ឋលេខាធិការដ្ឋានអាសចរណ៍ស៊ីវិល មានប្រសាសន៍ថា ក្រោយពីអាកាសយានដ្ឋានសៀមរាប-អង្គរ បានបើកដំណើរការកន្លងមក មានក្រុមហ៊ុនអាកាសចរណ៍ជាច្រើន ទាំងនៅក្នុងតំបន់អាស៊ាន និងមកពីអ៊ឹរ៉ុប បានហោះហើរមកកាន់អាកាសយាន្ដអន្ដរជាតិមួយនេះជាបន្ដបន្ទាប់។ ជាក់ស្ដែងក្រុមហ៊ុនអាកាសចរណ៍ Thai Airway International ដែលដឹកអ្នកទេសចរជាង១៥០នាក់ មកកាន់ខេត្ដសៀមរាប ជាលើកដំបូង និងយន្ដហោះប្រភេទប៊ូអ៊ីង ហោះហើរចេញពីទីក្រុងស៊ីដនី ប្រទេសអូស្ដ្រាលីនាពេលកន្លងមក។
ឯកឧត្ដម ប៊ុន រដ្ឋា បានបន្ដថា បច្ចុប្បន្ននេះយន្ដហោះចុះចតនៅអាកាសយាន្ដអន្ដរជាតិសៀមរាប-អង្គរ គិតជាមធ្យមមានចំនួនជាង ២០ជើង និងមានអ្នកដំណើរជាង ៤ពាន់នាក់ ក្នុងមួយថ្ងៃ។ ហើយនៅខែធ្នូនេះ ក៏មានការហោះហើរទៅកាន់ប្រទេសកូរ៉េផងដែរ។ ឯកឧត្ដមរំពឹងថា នៅឆ្នាំក្រោយទៀត នឹងមានយន្ដហោះចុះចតនៅអាកាសយានដ្ឋានអន្ដរជាតិសៀមរាប កាន់តែច្រើន ។
បើតាម ឯកឧត្ដម ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានឲ្យដឹងថា ក្រោយពីបានធ្វើការហោះហើរជាលើកដំបូង មកកាន់អាកាសយានដ្ឋានអន្ដរជាតិសៀមរាប-អង្គរ រួចហើយ ក្រុមហ៊ុន Thai Airway នឹងមានគម្រោងបន្ដហោះហើរជាប្រចាំថ្ងៃ ដោយមួយថ្ងៃមួយជើង រវាងពីក្រុងបាកង និងទីក្រុងសៀមរាប ដោយប្រើប្រាសប្រភេទយន្ដហោះអ៊ែបឺស ៣២០ ព្រមទាំងក្រុមហ៊ុននោះ មានសិទ្ធិប្រើប្រាស់ប្រភេទផ្សេងទៀតបានទៅតាមតម្រូវការរបស់ក្រុមហ៊ុន ខណៈដែលអាកាសយានដ្ឋានអន្ដរជាតិសៀមរាប-អង្គរ មានវិសាលភាពធំធេងក្នុងការចុះចតយន្ដហោះ។ ឯកឧត្ដមបានសម្ដែងនូវមោទកភាព ដែលមានក្រុមហ៊ុនអាកាសចរណ៍ថ្មីៗហោះហើរមកកាន់អាកាសយានដ្ឋានសៀមរាបអង្គរ។
បើតាមរបាយការណ៍ រដ្ឋលេខាធិការដ្ឋានអាសចរណ៍ស៊ីវិល គិតត្រឹមថ្ងៃទី៣០ ខែវិច្ឆកា ឆ្នាំ២០២៣នេះ ភ្ញៀវជាមធ្យម ៤.១០០នាក់ក្នុងមួយថ្ងៃ ហើយការហោះហើរជាមធ្យម ៤២ជើងក្នុងមួយថ្ងៃ (ទ្វេទិស) ខណៈដែលបច្ចុប្បន្នមានក្រុមហ៊ុនអាកាសចរណ៏ចំនួន៩ ធ្វើការហោះហើរចរញ-ចូល អាកាសយានដ្ឋានសៀមរាប-អង្គរ ក្នុងនោះមានក្រុមហ៊ុនអាកាសចរណ៏អន្តរជាតិចំនួន៨ និងក្រុមហ៊ុនអាកាសចរណ៏ក្នុងស្រុកចំនួនមួយ ហើយការហោះហើរភាគច្រើនហោះហើរពីតំបន់ អាស៊ាន និងចិន, ក្នុងនោះមាន ៥៦សញ្ជាតិ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
