នៅព្រឹកថ្ងៃទី២ ខែធ្នូ ឆ្នាំ២០២នេះ នៅខេត្តសៀមរាប មានរៀបចំពិធីអបអរសាទរខួបអនុស្សាវរីយ៍លើកទី ៤៥ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា ២ធ្នូ (២ធ្នូ១៩៧៨ – ២ធ្នូ ២០២៣) ក្រោមអធិបតីភាព ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប និងជាអនុប្រធានគណៈកម្មាធិការរណសិរ្ស សាមគ្គីអភិវឌ្ឍន៍មាតុភូមិកម្ពុជា ខេត្តសៀមរាប រួមនិងវត្តមានឯកឧត្តម លោកជំទាវ លោក លោកស្រី នៃស្ថាប័ន អង្គភាព សមាគម មន្ទីរជុំវិញខេត្ត ព្រមទាំងប្រជាពលរដ្ឋ និងសិស្សានុសិស្សសរុបជាង ៣ពាន់នាក់។
តាមរយៈសុន្ទរកថារបស់សម្តេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា ដែលអានដោយ ឯកឧត្តម អ្នកឧកញ៉ា សៀងណាំ បញ្ជាក់ថា ថ្ងៃទី០២ ខែធ្នូ ឆ្នាំ២០២៣នេះ គឺជាថ្ងៃ គម្រប់ខួបលើកទី៤៥ (២ធ្នូ ១៩៧៨-២ធ្នូ ២០២៣) ហើយទិវាកំណើតរណសិរ្សសាមគ្គីសង្គ្រោះជាតិកម្ពុ ជា ដែលបច្ចុប្បន្នត្រូវបានប្តូរឈ្មោះថា “រណសិរ្សសាមគ្គី អភិវឌ្ឍន៍មាតុភូមិកម្ពុជា ជាថ្ងៃប្រវត្តិសាស្ត្រ ដែល កម្លាំងអ្នកស្នេហាជាតិមកពីគ្រប់ទិសទីទាំងក្នុង និងក្រៅប្រទេសរួបរួមគ្នាក្រោកឈរធ្វើចលនាតស៊ូ ក្នុងកម្លាំងអ្នកស្នេហាជាតិមកពីគ្រប់ទិសទីទាំងក្នុង និងក្រៅប្រទេសរួបរួមគ្នាក្រោកឈរធ្វើចលនាតស៊ូ ក្នុងគោលដៅរំដោះជាតិ មាតុភូមិ និងប្រជាជនកម្ពុជាឱ្យរស់រានមានជីវិតឡើងវិញ រួចផុតពីគ្រោះមហន្តរាយនិងការកាប់សម្លាប់នៃរបបកម្ពុជាប្រជាធិបតេយ្យរបស់បនប្រល័យពូជសាសន៍ប៉ុលពត។
ក្នុងសុន្ទរកថារបស់សម្តេចកិត្តិសង្គហបណ្ឌិត ម៉ែន សំអន ក៏បានបញ្ជាក់ផងដែរថា ទិវានេះត្រូវបានរៀបចំឡើង ក្នុងគោលបំណងរំលឹកឡើងវិញ នូវទិវាជាប្រវត្តិសាស្ត្រ នៃដំណើរចាប់ផ្តើមរស់រានមានជីវិតរបស់ជាតិ មាតុភូមិ និងប្រជាជនកម្ពុជា និងដើម្បីប្រកាសជាឱឡារិកថា រណសិរ្ស២ធ្នូ មិនត្រឹមតែសង្គ្រោះយើងទាំងអស់គ្នាឱ្យចាកផុតពីគ្រោះមហន្តរាយនៃរបបប្រល័យពូជសាសន៍ប៉ុណ្ណោះទេ ប៉ុន្តែរណសិរ្ស២ធ្នូ ក៏បានរួមចំណែកយ៉ាងធំធេងជាមួយរាជរដ្ឋាភិបាល និងគណបក្សប្រជាជនកម្ពុជា ក្នុងការស្ដារកសាង និងអភិវឌ្ឍន៍សង្គមជាតិនៅគ្រប់ដំណាក់កាលធ្វើឱ្យមាតុភូមិកម្ពុជាប្រែមុខមាត់ថ្មីជាបន្តបន្ទាប់។
ឯកឧត្តម អ្នកឧកញ៉ា សៀងណាំ ក៏បានរំលឹកឡើងវិញផងដែរ បើសិនគ្មានថ្ងៃ២ធ្នូ ទេ នោះក៏គ្មានថ្ងៃ ៧មករាដែរ ថ្ងៃ២ធ្នូ និង ៧មករា គឺជាមូលដ្ឋានគ្រឹះ ដែលនាំឱ្យប្រទេសកម្ពុជាចាកចេញពីរបបប្រល័យពូជសាសន៍ខ្មែរក្រហម ហើយអាចឱ្យយើងរួមគ្នាកសាងប្រទេសជាតិឱ្យមានការអភិវឌ្ឍមាន សុខសន្តិភាពរហូតមកដល់ថ្ងៃនេះ។
ក្នុងឱកាសនោះ ឯកឧត្តម ក៏បានស្នើសុំដល់បងប្អូនប្រជាពលរដ្ឋ យុវជន សិស្សានុសិស្ស និងមន្ត្រីរាជការទាំងអស់ ត្រូវចងចាំជានិច្ចស្មារតី២ធ្នូ ដែលជាកម្លាំងសាមគ្គីជាតិយ៉ាងធំក្នុងការរំដោះប្រទេសជាតិពីរបបខ្មែរក្រហម ។ ហើយទាំងអស់នេះគឺ ជាមូលដ្ឋានមេរៀនប្រវត្តិសាស្ត្រមួយ សម្រាប់យើងក្នុងការដឹកនាំប្រទេសជាតិ និងការពារសុខសន្តិភាព ដែលកម្ពុជាយើងមាន។
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក សេង ផល្លី
