មន្ដ្រីជាន់ខ្ពស់អាជ្ញាធរជាតិអប្សរា បានបង្ហាញថា អាជ្ញាធរពិតជាមានមោទនភាពយ៉ាងខ្លាំងនៅពេលដែលឃើញក្រុមសិល្បៈកម្ពុជា និងជប៉ុន បានមកសំដែងសិល្បៈដែលជាបេតិកភណ្ឌអរូបិយនៅកន្លែងដែលជាបេតិកភណ្ឌពិភពលោករូបិយនៃកម្ពុជាយើង។
ថ្លែងក្នុងព្រឹត្តិការណ៍ផ្លាស់ប្ដូរវប្បធម៌ប្រពៃណី អបអរសាទរខួបអនុស្សាវរីយ៍លើកទី៧០ នៃការបង្កើតទំនាក់ទំនងការទូតរវាងកម្ពុជា-ជប៉ុន ដែលធ្វើឡើងនៅប្រាសាទបាយ័ន នារាត្រីថ្ងៃទី៣ ខែធ្នូ ឆ្នាំ២០២៣នេះ ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍ថា កម្ពុជា និងជប៉ុន គឺជាប្រទេសពីរ ដែលមានប្រពៃណីវប្បធម៌ អរីយធម៌ដ៍ខ្ពស់ខ្ពស់នៅក្នុងតំបន់អាស៊ី និងអាស៊ីបូព៌ាតាំងពីយូរលង់មកហើយ ដែលមកដល់ពេលនេះ វប្បធម៌រូបបិយនិងអរូបបិយ មានលក្ខណៈល្អប្រសើរ ដោយមិនមានបញ្ហាអ្វីកើតឡើងនោះទេ។ ជាក់ស្ដែងការសំដែងសិល្បៈរួមគ្នានៅកន្លែងបេតិកភ័ណ្ឌពិភពលោករូបនៃប្រាសាទបាយ័ននាពេលនេះ បានបង្ហាញឱ្យឃើញថាវប្បធម៌នៃប្រទេសទាំងពីរ មានភាពស៊ីសង្វាក់គ្នាស្រទន់ទាំងឥរិយាបទថ ការនិយាយស្តី និងការសំដែងឥតខ្ចោះ។
ឯកឧត្ដមអគ្គនាយក មានប្រសាសន៍ទៀតថា នៅក្នុងតំបន់រមណីយដ្ឋានអង្គរ មានទាំងវប្បធម៌រូបបិយ និងអរូបបិយ ដែលរាជរដ្ឋាភិបាល ប្រជាពលរដ្ឋ ត្រូវថែរក្សាប្រពៃណី វប្បធម៌ ទំនៀមទម្លាប់របស់ខ្មែរ។ ទំនាក់ទំនងរវាងប្រទេសកម្ពុជា និងជប៉ុន រយៈពេល៣០ឆ្នាំកន្លងមក ប្រទេសជប៉ុន បានជួយកម្ពុជាលើវិស័យវប្បធម៌ជាច្រើនលានដុល្លា ទាំងការជួសជុល ធនធនាមនុស្ស រហូតដល់កូនខ្មែរមានសមត្ថភាពជួសជុលប្រាសាទខ្លួនឯង។
ឯកឧត្ដម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញាពេញសមត្ថភាពប្រទេសជប៉ុន បានថ្លែងថា ទំនាក់ទំនងរវាងប្រទេសទាំងពីរ ត្រូវបានធ្វើឱ្យប្រសើរឡើងទៅជា«ភាពជាដៃគូយុទ្ធសាស្ត្រ គ្រប់ជ្រុងជ្រោយ»។ ឯកឧត្ដមសង្ឃឹមថា ប្រជាជនកាន់តែច្រើននឹងយកព្រឹត្តិការណ៍ផ្លាស់ប្តូរវប្បធម៌នេះ ដែលជាឱកាសមួយដើម្បីឆ្លុះបញ្ចាំងពីប្រវត្តិសាស្ត្រនៃទំនាក់ទំនងជប៉ុន-កម្ពុជាកន្លងមក ហើយក្នុងនាមជាស្ថានទូតជប៉ុន ក៏ប្រឹងប្រែងឱ្យអស់ពីសមត្ថភាពដើម្បីធានាបាននូវទំនាក់ទំនងរវាងជប៉ុន និងកម្ពុជា ឈានដល់កម្រិតកាន់តែខ្ពស់។
ឯកឧត្ដមបន្ដថា ជប៉ុន និងកម្ពុជា មិនត្រឹមតែជាទំនាក់ទំនងរវាងរដ្ឋាភិបាល និងរដ្ឋាភិបាលប៉ុណ្ណោះទេ ប៉ុន្តែរួមមានទាំងកិច្ចខិតខំប្រឹងប្រែងដោយក្រុមហ៊ុនឯកជន និងអង្គការនានា ខណៈដែលប្រជាជននៃប្រទេសទាំងពីរ ពួកគេក៏បានអភិវឌ្ឍទៅជាទំនាក់ទំនងដ៏ល្អជាមួយនឹងជំនឿទុកចិត្តយ៉ាងរឹងមាំផងដែរ។
សូមបញ្ជាក់ថា ព្រឹត្តិការណ៍ផ្លាស់ប្ដូរវប្បធម៌ប្រពៃណី ដើម្បីអបអរសាទរខួបអនុស្សាវរីយ៍លើកទី៧០ នៃការបង្កើតទំនាក់ទំនងកាទូតរវាងកម្ពុជា ជប៉ុន បានបង្ហាញអំពីសិល្បៈវប្បធម៌ប្រពៃណីដ៏ផូរផង់នៃប្រទេសទាំងពីរ។ ព្រឹត្តិការណ៍នេះ បានចាត់ទុកជាផ្នែកមួយនៃការខិតខំប្រឹងប្រែងដើម្បីលើកកម្ពស់ការយល់ដឹង និងកិច្ចសហប្រតិបត្តិការអន្តរជាតិ អភិវឌ្ឍន៍ទំនាក់ទំនងសហប្រតិបត្តិការរវាងប្រទេសទាំងពីរ និងធ្វើឱ្យទំនាក់ទំនងមិត្តភាពប្រទេសទាំងពីរកាន់តែមានភាពស៊ីជម្រៅតាមរយៈការផ្លាស់ប្ដូរវប្បធម៌ប្រពៃណី៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
