នៅថ្ងៃទី០៨ ខែធ្នូ ឆ្នាំ២០២៣ ខាងមុខនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជួបសំណេះសំណាលជាមួយបងប្អូនប្រជាពលរដ្ឋ ដែលបានផ្លាស់ប្ដូរទីលំនៅចេញពីតំបន់រមណីយដ្ឋានអង្គរ ទៅតាំងទីលំនៅក្នុងតំបន់ភូមិធម្មជាតិរុនតាឯក ស្រុកបន្ទាយស្រី ខេត្តសៀមរាប។
ក្នុងកិច្ចប្រជុំក្រុមការងារពាក់ព័ន្ធនៅព្រឹកថ្ងៃទី០៥ ខែធ្នូ ឆ្នាំ២០២៣នេះ លោក លី សំរិទ្ធ អភិបាលរងខេត្តសៀមរាប បានណែនាំដល់គ្រប់បណ្ដាមន្ទីរ និងអាជ្ញាធរខេត្តពាក់ព័ន្ធ ជាពិសេសកម្លាំងសមត្ថកិច្ចចម្រុះ ត្រូវយកចិត្តទុកដាក់ឲ្យបានខ្ពស់ ក្នុងការរៀបចំ ដើម្បីរក្សាបាននូវសណ្តាប់ធ្នាប់ របៀបរៀបរយឲ្យបានល្អប្រសើរ។ ជាមួយគ្នានោះ មន្ទីរសុខាភិបាលខេត្ត ត្រូវសហការជាមួយអាជ្ញាធរមូលដ្ឋានរៀបចំទីតាំង ដើម្បីសម្រួលដល់បងប្អូនប្រជាពលរដ្ឋ ឲ្យសមស្របតាមលក្ខណ:សុខាភិបាល និងភាពងាយស្រួលដល់អ្នកចូលរួមក្នុងពេលប្រារព្ធពិធី។
ក្នុងនោះលោកអភិបាលរងខេត្ត ក៏បានណែនាំដល់អាជ្ញាធរមូលដ្ឋាន ត្រូវផ្សព្វផ្សាយ និងជំរុញដល់ប្រជាពលរដ្ឋ បន្តរក្សាអនាម័យបរិស្ថាន និង ថែរក្សាបរិស្ថានជាប្រចាំនៅក្នុងមូលដ្ឋានរបស់ខ្លួន ជាពិសេសអាជ្ញាធរមូលដ្ឋាន រួមនិងអ្នកពាក់ព័ន្ធ សូមបន្តធ្វើការអប់រំផ្សព្វផ្សាយដល់ប្រជាពលរដ្ឋ ដែលរស់នៅតាមដងផ្លូវ ត្រូវរក្សាសណ្តាប់ធ្នាប់ក្នុងការប្រកបរបររបស់ខ្លួនប្រចាំថ្ងៃ។
គួរជម្រាបថា ការអភិវឌ្ឍលើផ្ទៃដីនៅតំបន់ធម្មជាតិរុនតាឯក ស្ថិតក្នុងឃុំរុនតាឯក នៃស្រុកបន្ទាស្រី ខេត្តសៀមរាប បានធ្វើការបែងចែកជូនប្រជាពលរដ្ឋក្នុងមួយគ្រួសារទទួលបានដីមួយឡូតិ៍ ដែលក្នុងមួយឡូតិ៍មានទំហំ ២០គុណនឹង៣០ម៉ែត្រ ដើម្បីចែកជូនបងប្អូនប្រជាពលរដ្ឋ ដែលនឹងផ្លាស់ប្ដូរទីលំនៅចេញពីតំបន់រមណីយដ្ឋានអង្គរ។ ក្នុងគម្រោងអភិវឌ្ឍនេះដែរ ក៏មានដូចជា សាលារៀន ចាប់តាំងពីថ្នាក់បឋមសិក្សា រហូតដល់ថ្នាក់វិទ្យាល័យ មណ្ឌលសុខភាព ទីតាំងផ្សារ វត្តអារាម និងអាគាររដ្ឋបាលសាធារណៈជាដើម។ តាមការវាយតម្លៃ គម្រោងភូមិធម្មជាតិរុនតាឯក នឹងក្លាយទៅជាភូមិអេកូទេសចរណ៍ និងជាទីប្រជុំជនថ្មីមួយបន្ថែម ស្របពេលដែលអាកាសយានដ្ឋានអន្តរជាតិសៀមរាបថ្មី បានកំពុងដំណើរការទទួលភ្ញៀវទេសចរជារៀងរាល់ថ្ងៃ៕
អត្ថបទ និងរូបភាព៖ លោក អ៊ុន ណារាជ្យ
