នៅព្រឹកថ្ងៃទី០៥ ខែធ្នូ ឆ្នាំ២០២៣ មន្ទីររៀបចំដែនដីនគរូបនីយកម្ម សំណង និងសុរិយោដីខេត្តសៀមរាប សហការនឹងអាជ្ញាធរស្រុកសូទ្រនិគម បានប្រកាសបិទផ្សាយជាសាធារណៈនូវឯកសារនៃការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ក្នុងចំណោមភូមិចំនួន១៩ សរុប ៩.៧៣៤ក្បាលដី ជូនប្រជាពលរដ្ឋដើម្បីធ្វើការពិនិត្យ និងតវ៉ា ស្ថិតនៅក្នុងឃុំចាន់ស ស្រុកសូទ្រនិគម ខេត្តសៀមរាប។
លោក ហ៊ី សាយ ប្រធានមន្ទីររៀបចំដែនដី ខេត្តសៀមរាប បានបញ្ជាក់ថា ការចុះបញ្ជីដីធ្លីមានលក្ខណៈជាប្រព័ន្ធសំរាប់ខេត្តសៀមរាប បានធ្វើការបិទផ្សាយ និងចេញប័ណ្ណរួចបានចំនួន ១០២ភូមិហើយ រួមមាន៖ ក្រុងសៀមរាបចំនួន ៥៩ភូមិ, ស្រុកសូទ្រនិគមបានចំនួន ២០ភូមិ, ស្រុកប្រាសាទបាគងបានចំនួន ៨ភូមិ, ស្រុកក្រឡាញ់បានចំនួន ៨ភូមិ, ស្រុកពួកបានចំនួន ៦ភូមិ និងស្រុកជីក្រែងបានចំនួន ១ភូមិផងដែរ។
អភិបាលស្រុកសូទ្រនិគម លោក គឹម វណ្ណៈ បានឲ្យដឹងថា ការបិទផ្សាយជាសាធារណៈនូវឯកសារនៃការវិនិច្ឆ័យនេះ មានរយៈពេល ១៥ថ្ងៃ ចាប់ពីថ្ងៃទី០៥-១៩ ខែធ្នូ ឆ្នាំ២០២៣ ដោយគិតរួមទាំងថ្ងៃបុណ្យ និងថ្ងៃឈប់សំរាក មានទីតាំងក្នុងបរិវេណវត្តប្រាសាទអណ្តែត ហៅវត្តសន្លោង ដោយតម្រូវឱ្យបងប្អូនប្រជាពលរដ្ឋជាម្ចាស់ដី ព្រមទាំងស្ថាប័ន និងអង្គភាពពាក់ព័ន្ធទាំងអស់មកចូលរួមពិនិត្យផ្ទៀងផ្ទាត់មើលទិន្នន័យនេះឱ្យបានគ្រប់ៗគ្នា ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនបត្រ័សម្គាល់ម្ចាស់អចលនវត្ថុ។
ព័ត៌មានជាតិ ថ្មីៗ
លោកអភិបាលស្រុក សង្ឃឹម និងជឿជាក់ថា អ្នកដែលមានការពាក់ព័ន្ធទាំងអស់នឹងអញ្ជើញមកចូលរួមពិនិត្យមើលទិន្នន័យដែលបានបិទផ្សាយនេះ ដូចជានៅលើបញ្ជីឈ្មោះម្ចាស់ដី ត្រូវពិនិត្យផ្ទៀងផ្ទាត់ឈ្មោះ សាវតា ទំហំដី ប្រភេទទ្រព្យ និងនៅលើប្លង់សុរិយោដី ត្រូវពិនិត្យមើល ទីតាំងដី រូបរាងដី ព្រោះនេះគឺជាឱកាសចុងក្រោយហើយដែលអ្នកដែលមានការពាក់ព័ន្ធទាំងអស់មានសិទ្ធិធ្វើការកែតំរូវ ឬជំទាស់តវ៉ាបានក្នុងករណីដែលពិនិត្យមើលទៅឃើញថា មានកំហុសឆ្គងនោះ អាចមកជួបគណៈកម្មការរដ្ឋបាលបាន៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
