នៅព្រឹកថ្ងៃទី៦ ខែធ្នូ ឆ្នាំ២០២៣នេះ លោក សុខ ថុល អភិបាលរងខេត្តសៀមរាប បានដឹកនាំបើកកិច្ចប្រជុំស្តីពីការពិនិត្យ និងពិភាក្សាវឌ្ឍនភាពកំណែទម្រង់រដ្ឋបាលសាធារណៈ ដោយមានការចូលរួមពីសំណាក់អស់លោកលោកស្រីនាយករងរដ្ឋបាល នាយក-នាយករងទីចាត់ការ ថ្នាក់ដឹកនាំមន្ទីរអង្គភាព អាជ្ញាធរក្រុង/ស្រុកជាច្រើនរូប។
លោក សុខ ថុល មានប្រសាសន៍ថា កំណែទម្រង់រដ្ឋបាលសាធារណៈ មានតួនាទីស្នូលក្នុងការកសាងពង្រឹងនីតិរដ្ឋនៅកម្ពុជា កសាងអភិវឌ្ឍសមត្ថភាពស្ថាប័នរដ្ឋ និងធនធានមនុស្សក្នុងវិស័យសាធារណៈ ធ្វើជាបង្អែករឹងមាំដល់ផ្នែកឯកជន និងបង្កលក្ខណៈធានាដល់ប្រក្រតីភាពនៃជីវភាពរស់នៅរបស់ប្រជាជន រួមចំណែកយ៉ាងសំខាន់ដល់ការពង្រឹងបុព្វហេតុសុខសន្តិភាព វឌ្ឍនភាព សុខុមាលភាព និង វិបុលភាពរបស់សង្គមជាតិ។ ការកំណែទម្រង់រដ្ឋបាលសាធារណៈ ត្រូវបានអនុវត្តទៅតាមយុទ្ធសាស្ត្រចតុកោណ ពីដំណាក់កាលទី១ រហូតដំណាក់កាលទី៤ បន្ទាប់ពីបានពិភាក្សាសម្រេចលើនីតិវិធីនៃការជម្រុញអនុម័តជាផ្លូវការឲ្យបានឆាប់នូវកម្មវិធីជាតិកែទម្រង់រដ្ឋបាលសាធារណៈ សម្រាប់រយៈពេល២០២២-២០៣៥ នៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧។
លោក សុខ ថុល មានប្រសាសន៍ទៀតថា កម្មវិធីកំណែទម្រង់ទាំងអស់អាចអនុវត្តសម្រេចជោគជ័យទៅបាន គឺអាស្រ័យដោយការចូលរួមយ៉ាងសកម្មពីតួអង្គពាក់ព័ន្ធទាំងអស់ នៅគ្រប់ផ្នែក គ្រប់ថ្នាក់ទាំងនៅថ្នាក់ជាតិ និងថ្នាក់ក្រោមជាតិ និងដោយមានការគាំទ្រពីប្រជាជននិងសង្គមជាតិទាំងមូល។ ម៉្យាងទៀតកំណែទម្រង់រដ្ឋបាលសាធារណៈ មានតួនាទីស្នូលក្នុងការកសាង ពង្រឹងនីតិរដ្ឋនៅកម្ពុជា កសាងអភិវឌ្ឍសមត្ថភាពស្ថាប័នរដ្ឋ និងធនធានមនុស្សក្នុងវិស័យសាធារណៈ ធ្វើជាបង្អែករឹងមាំដល់ផ្នែកឯកជន និងបង្កលក្ខណៈធានាដល់ប្រក្រតីភាពនៃជីវភាពរស់នៅរបស់ប្រជាជន រួមចំណែកយ៉ាងសំខាន់ដល់ការពង្រឹងបុព្វហេតុសុខសន្តិភាព វឌ្ឍនភាព សុខុមាលភាព និងវិបុលភាពរបស់សង្គមជាតិ។
ក្នុងកិច្ចប្រជុំនេះដែរ លោកអភិបាលរងខេត្ត ក៏បានបញ្ជាក់ថា ក្នុងនាមជាប្រធានអង្គភាព-ស្ថាប័ន ត្រូវចេះបែងចែកតួនាទី ភារកិច្ចដល់មន្ត្រីអនុវត្តតាមការិយាល័យនីមួយៗឱ្យត្រូវទៅតាមជំនាញ គឺដើម្បីធានាបាននូវប្រសិទ្ធភាពការងារ និងការសម្រួលលើការងាររបស់អង្គភាព ជាពិសេសគឺដើម្បីងាយស្រួលធ្វើអធិការកិច្ចវាយតម្លៃការតែងតាំងតួនាទីមន្រ្តីរាជការ។ ក្នុងនោះដែរមន្ត្រីរាជការ ត្រូវស្មោះត្រង់ជាមួយវិជ្ជាជីវះ ស្មោះត្រង់ជាមួយថ្នាក់ដឹកនាំ ស្មោះត្រង់ជាមួយប្រជាពលរដ្ឋ ពង្រឹងវិន័យ អនុវត្តន៍តួនាទីភារកិច្ចឱ្យបានល្អ ត្រូវតែធ្វើជាមន្ត្រីអនុវត្តការងារ តាមតួនាទីទៅតាមរដ្ឋបាល និងប្រធានអង្គភាពរបស់ខ្លួនណែនាំឱ្យបានល្អប្រសើរ ហើយមន្ត្រី ថ្នាក់ក្រោមជាតិ ថ្នាក់ខេត្ត ក្រុងស្រុក និងមន្ទីរ អង្គភាព ត្រូវតែរៀបចំលើការគ្រប់គ្រង តែងតាំង និងក្របខណ្ឌបុគ្គលិករបស់មន្ត្រីខ្លួន តាមប្រព័ន្ធការងារឲ្យបានល្អ និងប្រសិទ្ធភាពខ្ពស់។ ជាពិសេសសូមជម្រុញលើកទឹកចិត្តដល់មន្ត្រីរាជការតាមមូលដ្ឋាន ត្រូវយកចិត្តទុកដាក់លើការគ្រប់គ្រងបុគ្គលិកតាមស្ថាប័ន ឲ្យមានប្រសិទ្ធិភាពខ្ពស់ ស្របតាមសម័យបច្ចេកវិទ្យាផងដែរ៕
អត្ថបទ និងរូបភាព៖ លោក ទ្រា ពន្លឺ, ម៉ី សុខារិទ្ធ
កែសម្រួល៖ លោក អ៊ុន ណារាជ្យ
