នៅថ្ងៃទី៦ ខែធ្នូ ឆ្នាំ២០២៣ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានសហការជាមួយរដ្ឋបាលស្រុកវ៉ារិន និងស្រុកអង្គរធំ ធ្វើការចុះផ្សព្វផ្សាយជាសាធារណៈ នូវការកំណត់តំបន់វិនិច្ឆ័យលើការចុះបញ្ជីដីធ្លី ដែលមានលក្ខណៈជាប្រព័ន្ធជូនដល់ប្រជាពលរដ្ឋ ដើម្បីប្រជាពលរដ្ឋមានឱកាសត្រៀមឯកសារ ក៏ដូចជាពិនិត្យស្ថានភាពដីរបស់ខ្លួន ចៀសវាងខកខានដោយប្រការណាមួយអំឡុងពេលក្រុមការងារជំនាញចុះអនុវត្តន៍ការងារ។
នៅក្នុងពិធីផ្សព្វផ្សាយនោះ លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បង្ហាញថា ការចុះកំណត់តំបន់វិនិច្ឆ័យនាពេលនេះ សម្រាប់ស្រុកវ៉ារិន មានចំនួន ១៦ភូមិ ស្ថិតក្នុងឃុំស្រែណូយ និងស្រុកអង្គរធំ មានចំនួន ៦ភូមិ ស្ថិតក្នុងឃុំពាក់ស្នែង។ ចំពោះដំណើរការ នៃការចុះបញ្ជីដីធ្លីមានលក្ខណៈជាប្រព័ន្ធ ក្រុមការងារអនុវត្តន៍តាមនីតិវិធីសំខាន់ៗ ចំនួន៥ គឺជំហានទី១៖ ការកំណត់តំបន់វិនិច្ឆ័យ ជំហានទី២៖ ការវាស់វែងប្លង់សុរិយោដី(ប្លង់ដី) ជំហានទី៣៖ អាជ្ញាធរនឹងធ្វើការបិទផ្សាយជាសាធារណៈ នូវប្លង់ដី និងបញ្ជីឈ្មោះម្ចាស់ដីក្នុងរយៈពេល១៥ថ្ងៃ ដើម្បីឲ្យប្រជាពលរដ្ឋអាចធ្វើការត្រួតពិនិត្យ និងតវ៉ាសុំធ្វើការកែប្រែក្នុងករណីមានភាពមិនត្រឹមត្រូវ ជំហានទី៤៖ ការវិនិច្ឆ័យ និងសម្រេច ជំហានទី៥៖ ការចែកបណ្ណកម្មសិទ្ធ។
លោក ប៊ូ ជុំសម្បត្តិ បញ្ជាក់ថា ការចុះផ្សព្វផ្សាយនាពេលនេះ គឺជាការជូនដំណឹង ដល់ម្ចាស់ក្បាលដី ត្រៀមលក្ខណៈនៅទីតាំងដីរបស់ខ្លួន និងផ្ដល់ឱកាសសម្រាប់ប្រជាពលរដ្ឋ លើកជាសំណួរផ្សេងៗ ក្នុងនោះដែរ សូមម្ចាស់ក្បាលដី ធ្វវើការពិនិត្យព្រំដីរបស់ខ្លួន ដើម្បីបញ្ចៀសទំនាស់ អំឡុងពេលចុះវាស់វែង ដែលនាំឱ្យមានការយឺតយ៉ាវ ក្នុងការទទួលបានបណ្ណកម្មសិទ្ធ។
អត្ថបទ និង រូបថត ៖ លោក ស៊ាន សុផាត និងលោក ធន់ ពូថេ
កែសម្រួលអត្ថបទ ៖ លោក សេង ផល្លី
