នៅថ្ងៃទី០៧ខែធ្នូឆ្នាំ២០២៣ អគ្គនាយកដ្ឋានអប់រំ នៃក្រសួងអប់រំ យុវជននិងកីឡា សហការជាមួយ អង្គការរូមធូរីដ បើកសិក្ខាសាលាផ្សព្វផ្សាយផែនការពង្រីកកិច្ចសហការអនុវត្តនិងដាក់ឱ្យប្រើប្រាស់ជាផ្លូវការ សៀវភៅណែនាំគ្រូបង្រៀនស្តីពីបំណិនសតវត្សរ៍ទី២១ នៅសណ្ឋាគារសោមាទេវី ក្នុងក្រុងសៀមរាប ក្រោមអធិបតីភាព ឯកឧត្តម អ៊ុង ជិនណា អគ្គនាយក នៃនាយកដ្ឋានអប់រំ ក្រសួងអប់រំ យុវជន និងកីឡា ដោយមានការចូលរួមពីមន្ត្រី នៃមន្ទីរ និងការិយាល័យអប់រំ យុវជននិងកីឡាមកពីបណ្តាស្រុកមួយចំនួនក្នុងខេត្តសៀមរាប កំពង់ចាម កំពង់ធំ ព្រៃវែង កំពង់ស្ពឺ បន្ទាយមានជ័យ បាត់ដំបង និង ខេត្តកំពត ព្រមទាំងអង្គការដៃគូផងដែរ។
លោក ជា វ៉ាន់ថា នាយកប្រចាំប្រទេស នៃអង្គការរូមធូរីដកម្ពុជា លើកឡើងថា ការផ្លាស់ប្តូរពិភពលោក ផ្តើមចេញពីកុមារដែលទទួលបានការអប់រំប្រកបដោយគុណភាព ហើយយើងប្រាថ្នាចង់បានពិភពលោកមួយ ដែលកុមារគ្រប់រូបមានកន្លែង និង ឱកាសសមស្របសម្រាប់អាន សិក្សារៀនសូត្រ និងអភិវឌ្ឍខ្លួនដើម្បីពន្លឿនការផ្លាស់ប្តូរជាវិជ្ជមាន ហើយអង្គការរូមធូរីដ ក៏បានផ្តោតលើវិស័យអប់រំយ៉ាងខ្លាំងផងដែរ ព្រោះថា ការអប់រំ គឺ ជាសិទ្ធិដែលមនុស្សគ្រប់រូបត្រូវទទួលបាន។
លោកបន្តថា អង្គការនេះបានផ្តោតនិងអនុវត្តកម្មវិធីអំណាន ដើម្បីបណ្តុះទម្លាប់នៃការអាន និងអភិវឌ្ឍបំណិនអាននិងសរសេរ ក្នុងប្រទេសចំនួន២៣ រួមទាំងកម្ពុជាផងដែរ ដោយដាក់អទិភាពលើការគំាទ្រក្រសួងអប់រំ កែសម្រួលកម្មវិធីសិក្សាភាសាខ្មែរថ្នាក់ទី១ ទី២ និងទី៣ ចូលរួមបង្កើតសម្ភារៈបង្រៀន និងរៀនបន្ថែម សម្រាប់គ្រូ និង សិស្ស និងបង្កើតបណ្ណាល័យស្តង់ដាសម្រាប់បឋមសិក្សា ខណៈជាង ២០ឆ្នាំកន្លងមកនេះ យើងបានជួយកុមារបានជាង ២លាន២សែននាក់ហើយ នៅក្នុងប្រទេសកម្ពុជា រួមទាំងបណ្ណាល័យប្រហែល២០០០កន្លែង ការសាងសង់អគារសិក្សានិងបណ្ណាល័យថ្មី និងការជួសជុលអគារបានចំនួន៣៣៩កន្លែង ។
មានប្រសាសន៍ក្នុងឱកាសនោះ ឯកឧត្តម អ៊ុង ជិនណា អគ្គនាយ នៃនាយកដ្ឋានអប់រំ ក្រសួងអប់រំ យុវជន និងកីឡា បានថ្លែងអំណរគុណនិងកោតសរសើរដល់អង្គការរូមធូរីដ ដែលបាននឹងកំពុងជួយដល់ក្រសួង លើការអនុវត្តកម្មវិធីនានា ផ្តោតលើការពង្រឹងគុណភាពអប់រំ តាមរយៈការពង្រឹងប្រព័ន្ធអប់រំប្រកបដោយចីរភាព តាមរយៈការយកចិត្តទុកដាក់លើការពង្រឹងអំណាននិងបណ្ណាល័យនៅកម្រិតបឋមសិក្សា ការអប់រំកុមារីនិងសមភាពយេនឌ័រនៅកម្រិតមធ្យមសិក្សា។
ឯកឧត្តម បន្តថា៖រាជរដ្ឋាភិបាលអាណត្តិទី៧ បានដាក់ចេញយុទ្ធសាស្ត្របញ្ចកោណ ដំណាក់កាលទី១ ដែលមានបាវចនា កំណើន ការងារ សមធម៌ ប្រសិទ្ធភាព និងចីរភាព ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា ឆ្នាំ២០៣០ ក្នុងនោះនៅក្នុងមុំទី១ នៃបញ្ចកោណទី១ “ការពង្រឹងគុណភាពអប់រំ កីឡា វិទ្យាសាស្ត្រ និងបច្ចេកវិទ្យា” ដែលមានកំណែទម្រង់សាលារៀន និងការពង្រឹងគុណភាពអប់រំជាអាទិភាពខ្ពស់បំផុត ពិសេសសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានផ្តល់អនុសាសន៍ដ៏ខ្ពង់ខ្ពស់បំផុត ដល់ក្រសួងអប់រំ យុវជន និងកីឡា នូវវិធានការគន្លឹះ ដើម្បីពង្រឹងគុណភាព សាលារដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា ។
ឯកឧត្តម អ៊ុង ជិនណា បន្ថែមថា៖ដើម្បីអនុវត្តតាមអនុសាសន៍ដ៏ថ្លៃថ្លានេះ ក្រសួងអប់រំ យុវជន និងកីឡា បានពិនិត្យឡើងវិញលើស្តង់ដាសាលារៀន ដែលបានដាក់ចេញនាពេលកន្លងមក ដោយយកវិធានការគន្លឹះទាំង៤ខាងលើ ជាស្នូល ហើយក្រសួងនឹងដាក់ឱ្យអនុវត្តសាលារៀនគំរូដែលមានស្តង់ដាចំនួន ៥ ចាប់ពីមត្តេយ្យសិក្សារហូតដល់មធ្យមសិក្សា និងយុទ្ធនាការ សាលារៀនស្អាតគ្មានសំរាម ក្នុងន័យឈានទៅសម្រេចលទ្ធផលសិក្សារបស់សិស្សប្រកបដោយប្រសិទ្ធភាព និងប្រសិទ្ធផល ហើយឆ្លើយតបបានទៅនឹងវិធានការគន្លឹះទាំង៤ ខាងលើ។
សូមបញ្ជាក់ថា៖តាមលទ្ធផលនៃការវាយតម្លៃក្នុងកំឡុងឆ្នាំ១៩៩៧ ដល់ឆ្នាំ ២០២០ ទៅលើការអនុវត្តន៍ការបង្រៀនបំណិនជីវិត ដែលផ្តោតលើបំណិនសតវត្សរ៍ទី២១ទាំង១០ ក្នុងកម្មវិធីអប់រំកុមារីរបស់អង្គការរូមធូរីដ កុមារីដែលបានចូលរៀនបំណិនជីវិតជាមួយអង្គការរូមធូរីដមានចំណេះដឹងប្រសើរជាងកុមារីដែលមិនបានចូលរៀន ហើយក្នុងនោះបំណិនបួនដែលទទួលបានផលជះខ្លាំង រួមមាន ការសម្រេចចិត្ត, ទំនុកចិត្តលើខ្លួនឯង, ការសម្តែងនិងគ្រប់គ្រងអារម្មណ៍, និងការគ្រប់គ្រងខ្លួនឯង។ ក្រៅពីបំណិនទាំង១០នេះ ក៏ឃើញមានការផ្លាស់ប្តូរខ្លាំងទៅលើ អាកប្បកិរិយានិងចំណេះដឹងទូទៅទាក់ទងទៅនឹងយេនឌ័រផងដែរ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
