ក្រុមការងារអន្ដរក្រសួងមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច នៅរសៀលថ្ងៃទី៧ ខែធ្នូ ឆ្នាំ២០២៣ បានចុះធ្វើការត្រួតពិនិត្យ និងវាយតម្លៃការងារថែទាំផ្លូវជាប្រចាំចំនួន ៦ខ្សែ មានប្រវែងសរុប៨៥.០០០ម ទទឹងផ្លូវទំហំ៦ម៉ែត្រ និងផ្លូវខ្លះទៀតទំហំ៥ម៉ែត្រ ជាផ្លូវក្រាលល្បាយក្រួសក្រហមដំណាក់កាលចុងក្រោយ សម្រាប់ឆ្នាំ២០២៣ ដែលជាប្រភពថវិការរាជរដ្ឋាភិបាលកម្ពុជា តាមរយៈមន្ទីរអភិវឌ្ឍន៍ជនបទ ខេត្តសៀមរាប ស្ថិតនៅស្រុកជីក្រែង ស្រុកសូទ្រនិគម ស្រុកស្វាយលើ និងស្រុកស្រីស្នំ។
លោក ទូច ម៉ាឡា ប្រធានមន្ទីរអភិវឌ្ឍន៍ជនបទខេត្ដសៀមរាប បានឲ្យដឹងថា ក្រោយការចុះពិនិត្យ និងវាយតម្លៃ ជាលទ្ធផលគណៈកម្មការអន្តរក្រសួង បានព្រមទទួលយក ព្រោះគណៈកម្មការបានមើលឃើញថា ផ្លូវទាំង៦ខ្សែនេះបានថែទាំជាប្រចាំ ត្រឹមត្រូវទាំងប្រវែងផ្លូវ ទំហំផ្លូវ បរិមាណ និងគុណភាពផ្លូវបានល្អ១០០ភាគរយ សម្រាប់បំរើឱ្យប្រជាពលរដ្ឋប្រើប្រាស់។
លោកប្រធានមន្ទីរ បានបញ្ជាក់ថា ផ្លូវទាំង៦ខ្សែនេះ មានសារៈសំខាន់ណាស់សម្រាប់ប្រជាពលរដ្ឋនៅមូលដ្ឋាន ក្នុងការដឹកជញ្ជូនទំនិញដំណាំកសិកម្មគ្រប់ប្រភេទ ខណៈដែលតំបន់នោះសំបូរដោយស្រែចំការ និងការធ្វើដំណើររបស់សិស្សានុសិស្សទៅសាលារៀន។ លោកក៏បានអំពាវនាដល់អាជ្ញាធរមូលដ្ឋាន និងប្រជាពលរដ្ឋត្រូវចូលរួមថែរក្សាផ្លូវឲ្យបានល្អ ព្រមទាំងហាមដឹកជញ្ជូនទំនិញធន់ធ្ងន់លើសចំនួនកំណត់ដែលធ្វើឲ្យផ្លូវងាយរងគ្រោះ។ ជាមួយគ្នានោះ រាជរដ្ឋាភិបាលកម្ពុជា តាមរយៈមន្ទីរអភិវឌ្ឍន៍ជនបទ នឹងបន្ដសាងសង់ផ្លូវជាច្រើនខ្សែទៀតនៅឆ្នាំ២០២៤ និងឆ្នាំបន្ដបន្ទាប់ទៀត សម្រាប់អាណត្ដិទី៧ ដែលដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្ដ្រី។
ជាមួយសមិទ្ធិផលខាងលើនេះ ប្រជាពលរដ្ឋក្នុងមូលដ្ឋានខាងលើ បានសម្ដែងការសាទរ និងសប្បាយរីករាយ ក្រោយពេលដែលផ្លូវគ្រួសក្រហមក្នុងមូលដ្ឋានពួកគាត់ បានថែទាំងជាប្រចាំ ព្រោះវាសរសៃឈាមសម្រាប់បងប្អូនប្រជាពលរដ្ឋធ្វើដំណើរ។ ពួកគាត់ក៏សូមថ្លែងអំណរគុណយ៉ាងខ្លាំង ដល់រាជរដ្ឋាភិបាល ជាពិសេសក្រសួងអភិវឌ្ឍន៍ជនបទ ដែលបានថែទាំងផ្លូវម្រាប់ឲ្យប្រជាពលរដ្ឋងាយស្រួលធ្វើដំណើរ ដែលជាសមិទ្ធិផលនេះបានបង្ហាញថា រាជរដ្ឋាភិបាលមានការយកចិត្ដទុកដាក់ដល់ប្រជាពលរដ្ឋគ្រប់ទីកន្លែង៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
