នៅព្រឹកថ្ងៃ៨ ខែធ្នូ ឆ្នាំ២០២៣ បងប្អូនអ្នករស់នៅជាមួយមេរោគអេដស៍ចំនួន ៣៤នាក់ ស្រី ១៧នាក់ រស់នៅក្នុងស្រុកស្វាយលើ ខេត្តសៀមរាប បានទទួលអំណោយមនុស្សធម៌ពីសាខាកាកបាទក្រហមកម្ពុជា ខេត្តសៀមរាប ដោយក្នុងម្នាក់ទទួលបាន៖ អង្ករ ៣០គីឡូក្រាម មុង១ ភួយ១ សារុង១ ក្រមា១ មី១កេស ត្រីខ១យួរ និងថវិកា ៥ម៉ឺនរៀល។
មានប្រសាសន៍នាឱកាសនោះ លោកស៊ុំ សំអន នាយកប្រតិបត្តិសាខាកាកបាទក្រហមកម្ពុជា ខេត្តសៀមរាប បាននាំយកនូវការផ្ដាំផ្ញើ សួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍-ជំងឺអេដស៍ និងការអភិវឌ្ឍនៅកម្ពុជា ក៏ដូចជាឯកឧត្តម ប្រាក់ សោភ័ណ ប្រធានគណៈកម្មាធិការសាខាខេត្ត ដែលកន្លងមកតែងតែមានសន្តានចិត្តប្រោសប្រណី និងគិតគូរចំពោះទុក្ខលំបាក និងបានចុះសួរសុខទុក្ខ ផ្តល់អំណោយជូនដល់បងប្អូនប្រជាពលរដ្ឋអ្នករស់នៅជាមួយមេរោគអេដស៍ជាបន្តបន្ទាប់។
ក្នុងឱកាសនោះដែរ លោកស៊ុំ សំអន បានណែនាំដល់បងប្អូនទាំងអស់ ត្រូវប្តេជ្ញាចិត្តចូលរួមទប់ស្កាត់ការរីករាលដាល និងបញ្ចប់ជំងឺអេដស៍ នៅឆ្នាំ២០២២៥ដោយប្រកាន់ភ្ជាប់គោលការណ៍សមភាព និងបរិយាបន្ន។ ត្រូវនាំគ្នាអនុវត្តវិធីសាស្រ្ត មិត្ត-អប់រំ-មិត្ត ក្នុងការចាកឆ្ងាយពីគ្រឿងញៀន ភាពភ្លឿតភ្លឿនផ្លូវភេទដែលជាហានិភ័យខ្ពស់នៃការឆ្លងមេរោគអេដស៍/ជំងឺកាមរោគផ្សេងៗ និងត្រូងខិតខំរៀនសូត្រថែរក្សាសុខភាព បរិភោគអាហាររូបត្ថម្ភល្អ ដូចពាក្យចាស់ពោលថា ស្រឡាញ់ខ្លួន ឱ្យស្ងួនចំណី។ សូមបង-ប្អូនរួមជាតិ ដែលសង្ស័យថាបានប្រឈមមុខនឹងមេរោគអេដស៍ ត្រូវស្វែងរកសេវាផ្តល់ប្រឹក្សា និងធ្វើតេស្តរកមេរោគអេដស៍ឱ្យបានឆាប់បំផុត ទទួលបានការថែទាំសុខភាព និងត្រូវប្រើថ្នាំប្រឆាំងមេរោគអេដស៍ឱ្យបានត្រឹមត្រូវ ទៀងទាត់ និងជាប់លាប់។
ជាមួយគ្នានោះ សូមស្រ្តីមានផ្ទះពោះទៅពិនិត្យ និងថែទាំផ្ទៃពោះជាមួយឆ្មប ឬយ៉ាងហាចឱ្យបាន៤ដងមុនសម្រាលកូន និងទទួលយកសេវ៉ាទប់ស្កាត់ការចម្លងមេរោគអេដស៍/ស្វាយ និងថ្លើមពីសេវាសុខាភិបាល។ ចូលរួមលើកទឹកចិត្ត និងមិនត្រូវរើសអើងឬមាក់ងាយអ្នកផ្ទុកមេរោគអេដស៍ និងអ្នកជំងឺអេដស៍ឡើយ។ និងសូមអំពាវនាវដល់ក្រុមបុរសរួមភេទជាមួយបុរស ក្រុមអ្នកបំប្លែងភេទ ក្រុមស្រ្តីបម្រើសេវានៅតាមគ្រឹះស្ថានកំសាន្តសប្បាយមនុស្សពេញវ័យ។ល។ត្រូវចូលរូមអនុវត្តនូវវិធានការបង្ការការឆ្លងមេរោគអេដស៍ឱ្យបានត្រឹមត្រូវ ដើម្បីសុខភាពផ្ទាល់ខ្លួន និងដើម្បីទប់ស្កាត់ការចម្លងថ្មី និងឈានទៅបញ្ចប់ជំងឺអេដស៍ នៅឆ្នាំ២០២៥ ឱ្យបានសម្រេចជោគជ័យ៕
ប្រភព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
