កម្មវិធីការរត់ប្រណាំងបែបទេសចរណ៍វប្បធម៌បុរាណប្រវត្តិសាស្ត្រ ដែលមានចម្ងាយ ២២០គីឡូម៉ែត្រ ចេញដំណើរកាលពីថ្ងៃទី៣ ខែធ្នូ ឆ្នាំ២០២៣ ឆ្លងកាត់ខេត្តចំនួន៣ រួមមានខេត្តកំពង់ធំ ខេត្តព្រះវិហារ និងខេត្តសៀមរាប បានមកដល់គោលដៅចុងក្រោយដោយជោគជ័យ នៅបរិវេនប្រាសាទអង្គរវត្ត នាព្រឹកថ្ងៃទី០៨ ខែធ្នូ ឆ្នាំ២០២៣នេះ ជាមួយវត្តមានក្រុមកីឡាករ កីឡាការិនីមកពី ២២ប្រទេស។
លោក គីម សារឿន ដែលបានចូលរួមក្នុងការរត់ប្រណាំងនេះ បានបង្ហាញថា នេះជាលើកទី១ សម្រាប់លោកដែលបានចូលរួមក្នុងកម្មវិធីនេះ ដែលជាបទពិសោធន៍ថ្មីសម្រាប់លោកក្នុងការរត់ឆ្លងកាត់តំបន់បុរាណ និងជនបទនានា ឆ្លងកាត់ខេត្តទាំង៣ ជាពិសេសការស្នាក់នៅជុំគ្នារវាងក្រុមកីឡាករកីឡាការនីទាំងជាង២០ប្រទេស ការថែរក្សាបរិស្ថាន ដែលជាសកម្មភាពសំខាន់ៗ ដែរលោកមិនដែលបានចូលរួម។ ជាមួយនោះ លោកក៏ទួួលបាននូវបទពិសោធន៍ថ្មីៗ នៅពេលស្នាក់នៅជុំគ្នា ទាំងការរស់នៅ សម្រាក ញាំអាហារ និងសកម្មភាពសំខាន់ផ្សេងៗទៀត។
លោកស្រី ត្រាសសឺ មកពីសហរដ្ឋអាមេរិក ដែលជាអ្នកស្ម័កចិត្តក្នុងកម្មវិធីនេះ បានបង្ហាញដែរថា កម្មវិធីរត់ប្រណាំងនេះ ជាព្រឹត្តិការណ៍មួយដែលប្លែកសម្រាប់គាត់ ដែលជាការរត់ឆ្លងកាត់តំបន់បូរាណ ផ្លូវពិបាកជាច្រើន ជាពិសេសតំបន់ជនបទ ដែលមានប្រជាពលរដ្ឋឈរស្វាគមន៍នៅតាមដងផ្លូវនៅពេលដែលពួកគាត់រត់ ដែលជាការលើកទឹកចិត្តមួយដែលពិសេសសម្រាប់អ្នករត់ទាំងអស់។ ហើយនៅឆ្នាំក្រោយៗ លោកស្រីសំណូមពរដល់បងប្អូនខ្មែរជាពិសេសស្ត្រីខ្មែរ សូមចូលរួមឲ្យបានច្រើនក្នុងព្រឹត្តិការណ៍នេះ នៅឆ្នាំក្រោយៗទៀត។
កីឡាករកម្ពុជាមួយរូបទៀត លោក កៅ វណ្ណរិន្ទ បានឲ្យដឹងថា កម្មវិធីការរត់ប្រណាំងបែបទេសចរណ៍វប្បធម៌បុរាណប្រវត្តិសាស្ត្រនេះ ក្រុមកីឡាករកីឡាការិនី បានធ្វើដំណើរឆ្លងកាត់ផ្លូវបុរាណដែលពោពេញទៅដោយរមណីយដ្ឋានវប្បធម៌ ទីកន្លែងប្រវត្តិសាស្រ្តតំបន់ប្រាសាទ អច្ឆរិយៈ រមណីយដ្ឋានទឹកធ្លាក់នានា និងដោយមានការស្វាគមន៍ពីបងប្អូនប្រជាជនកម្ពុជាយ៉ាងច្រើនកុះករ។ នេះគឺជាលើកទី១០ ហើយនៃកម្មវិធីរត់ប្រណាំងនេះ ដែលរៀបចំឡើងដោយក្រុមហ៊ុន Global Limit បន្ទាប់ពីខកខានដោយសារជំងឺកូវីដ។ ប៉ុន្តែសម្រាប់លោក នេះជាលើកទី៤ហើយដែលលោកបានចូលរួមក្នុងកម្មវិធីនេះ ខណៈការចូលរួមកន្លងមកលោកមិនសូវជាចាប់អារម្មណ៍ពីកម្មវិធីនេះទេ តែលើកទី៤នេះ លោកបានយល់ដឹងបានច្រើនពីកម្មវិធី ដែលជាព្រឹត្តិការណ៍ចង់ជំរុញដល់អ្នកចូលរួមបានយល់ដឹងច្រើនពីប្រវត្តិនៃទីតាំងវប្បធម៌បុរាណនីមួយៗ ជាពិសេសទីតាំងវប្បធម៌បុរាណនៅក្នុងខេត្តសៀមរាប មានប្រាសាទ តំបន់ព្រៃភ្នំដែលមានប្រវត្តិយូរលុង ផ្លូវបុរាណដែលមិនមានអ្នកធ្វើសំណើរ ព្រមទាំងតំបន់អច្ឆរិយៈផ្សេងៗទៀតដែលបានបង្ហាញអំពីភាពអស្ចារ្យរបស់បុព្វបុរសខ្មែរសម័យមុន។
លោកបន្តថា កម្មវិធីនេះដែរ ក៏នឹងជាការចូលរួមចំនែកក្នុងការជម្រុញដល់ជនបរទេស ឲ្យចាប់អារម្មណ៍ពីកម្ពុជា ទាំងតំបន់ប្រាសាទ តំបន់ប្រវត្តិសាស្ត្រផ្សេងៗ ព្រោះភ្ញៀវបរទេសភាគច្រើននៅពេលមកកម្ពុជា គោលបំណងធំគឺ ការចង់ស្វែងយល់ពីប្រវត្តិសាស្ត្រផ្សេងរបស់កម្ពុជា ជាពិសេសតំបន់ទេសចរណ៍ប្រវត្តិសាស្ត្រដែលកម្ពុជាមាន។ដូចនេះខេត្តសៀមរាប ជាខេត្តមានអតិភាពខ្ពស់ក្នុងការទទួលស្វាគមន៍ភ្ញៀវទេសចរណ៍បរទេសចូលមកកំសាន្ត៕
អត្ថបទ និងរូបភាព៖ លោក អ៊ុន ណារាជ្យ
