នៅព្រឹកថ្ងៃទី១១ ខែធ្នូ ឆ្នាំ២០២៣នេះ មន្ទីរអប់រំ យុវជន និង កីឡាខេត្តសៀមរាប សហការជាមួយរដ្ឋបាលស្រុកជីក្រែង និងសង្គមស៊ីវិល ប្រារព្ធទិវាលាងសម្អាតដៃ ក្រោមប្រធានបទ អនាគតយើងស្ថិតនៅលើដីយើងសូមចូលរួមលាងដៃសម្អាតដៃទាំងអស់គ្នា នៅសាលាបឋមសិក្សាព្រះធាតុ ស្ថិតក្នុងឃុំខ្វាវ ស្រុកជីក្រែង ក្រោមអធិបតីភាពលោក ហុង ឧប្បុលវណ្ណា អនុប្រធានមន្ទីរអប់រំយុវជននិងកីឡាខេត្តសៀមរាប លោក អ៊ុង សាវី ប្រធានអង្គការ Caring for Cambodia. CFC និង លោក រស់ ប៊ុនថន អភិបាលរងស្រុកជីក្រែង ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាពពាក់ព័ន្ធ ប្រធានការិយាល័យអប់រំ យុវជននិងកីឡាក្រុង ស្រុក ក្នុងទូទាំងខេត្ត មន្ត្រីរដ្ឋបាលស្រុក និង ឃុំ លោកគ្រូ អ្នកគ្រូ សិស្សានុសិស្ស និង អាណាព្យាបាលសិស្សជាច្រើនរូប ។
មានប្រសាសន៍ក្នុងឱកាសនោះ លោក រស់ ប៊ុនថន អភិបាលរងស្រុកជីក្រែង បានថ្លែងនូវការគាំទ្រទាំងស្រុងចំពោះទិវាពិភពលោកលាងសម្អាតដៃ ព្រោះវាគឺជាថ្ងៃដ៏សំខាន់មួយដែលបានរំលឹកដល់ការលើកកម្ពស់ការផ្សព្វផ្សាយអំពីសារៈសំខាន់នៃអនាម័យដៃ ជាពិសេសតាមរយៈការលាងសម្អាតដៃជាមួយសាប៊ូ និងការបំផុសឱ្យមានការផ្លាស់ប្ដូរមួយ ចាប់ពីស្ថាប័ន គោលនយោបាយថ្នាក់ជាតិ រហូតដល់កម្រិតអ្នកអនុវត្តសកម្មភាពនៅតាមសហគមន៍ ព្រមទាំងបានសំណូមពរដល់បងប្អូនប្រជាពលរដ្ឋទាំងអស់ ដែលត្រូវជាអាណាព្យាបាលសិស្ស ត្រូវយកចិត្តទុកដាក់ក្នុងការដាស់តឿន អំប់រំនិងណែនាំដល់កូនៗរបស់ខ្លួន ឲ្យយកចិត្តទុកដាក់ឲ្យបានខ្ជាប់ខ្ជួន ក្នុងការលាងសម្អាតដៃ ក៏ដូចជាសម្អាតខ្លួនប្រាណ មុននឹងបរិភោគចំណីអាហារ
លោក អ៊ុង សាវី ប្រធានអង្គការ Caring for Cambodia. CFC មានប្រសាសន៍ថា ទិវាលាងសម្អាតដៃ ដែលបានប្រារព្ធឡើងក្រោមប្រធានបទ “អនាគតយើងស្ថិតនៅលើដៃយើង សូមចូលរួមលាងសម្អាតដៃទាំងអស់គ្នា – ស្រប ពេលនឹងទិវាអនាម័យជាតិនិងទិវាពិភពលោកបង្គន់អនាម័យផងដែរ ពិសេសពិតជាមានអត្ថន័យខ្លាំងណាស់ ព្រោះថា ការលាងសម្អាតដៃ គឺជាវិធីសាស្ត្រសាមញ្ញងាយអនុវត្ត ចំណាយតិច តែមានសារៈសំខាន់បំផុតក្នុង ការបង្ការជំងឺរាគរូស ជំងឺផ្លូវដង្ហើម ពិសេសគឺបរិបទនៃការរីករាលដាលជាសកលៃនៃជំងឺកូវីដ-១៩ ។
លោកបន្តថា ការទម្លាប់លាងសម្អាតដៃនឹងសាប៊ូជាប្រចាំមុនពេលបរិភោគចំណីអាហារ និងក្រោយពេលបន្ទោបង់រួច គឺអាច ជួយសង្គ្រោះជីវិតមនុស្សបានច្រើនជាងការចាក់ថ្នាំបង្ការ ឬអន្តរាគមន៍វេជ្ជសាស្ត្រនានា ក្នុងនោះការលាងសម្អាត ដៃនឹងសាប៊ូ អាចកាត់បន្ថយមរណភាព ដោយសារជំងឺរាតបានជិតពាក់កណ្តាល និងមរណភាពពីជំងឺរលាក ផ្លូវដង្ហើមស្រួចស្រាវបានមួយភាគបួន ។
លោក ហុង ឧប្បុលវណ្ណា អនុប្រធានមន្ទីរអប់រំយុវជននិងកីឡាខេត្តសៀមរាប មានប្រសាសន៍ថា ដោយសារកិច្ចការមមាញឹក ទើបយើងយកថ្ងៃនេះ ប្រារព្ធទិវាពិភពលោកលាងសម្អាតដៃ ប៉ុន្តែអត្ថន័យសំខាន់ដូចគ្នា ហើយយើងត្រូវតែចូលរួមទាំងអស់គ្នា ដើម្បីឱ្យក្លាយទៅជាការអនុវត្តជាក់ស្តែងពិតប្រាកដបន្ថែមទៀត ប្រកបដោយ ស្មារតីទទួលខុសត្រូវខ្ពស់ ដោយផ្តើមចេញពីបុគ្គលផ្ទាល់ខ្លួនម្នាក់ៗ សមាជិកគ្រួសារ សហគមន៍ និងសង្គមទាំងមូល ខណៈបទពិសោធន៍ដែលយើងធ្លាប់បានឆ្លងកាត់នោះ គឺការរាតត្បាតជាសកលនៃមេរោគកូវីដ១៩ កន្លងមកបានផ្តល់នូវការកត់សម្គាល់យ៉ាងច្បាស់លាស់ថា វិធីមួយក្នុងចំណោមវិធីនានាដែលមានប្រសិទ្ធភាព និងសាមញ្ញបំផុត ដើម្បីបញ្ឈប់ការរីករាលដាល នៃវីរុសនេះ គឺអនាម័យដៃ ជាពិសេសតាមរយៈការលាងសម្អាដៃជាមួយសាប៊ូ ។
លោកបន្តថា នេះជាទិវាមួយដែលបង្ហាញឲ្យប្រជាពលរដ្ឋយើងដែលជាអាណាព្យាបាលសិស្សបានជ្រួតជ្រាបថែមទៀត និងឲ្យក្មួយៗជាសិស្សានុសិស្ស បានយល់ដឹងកាន់តែច្បាស់អំពីអត្ថប្រយោជន៍ក្នុងការថែទាំសុខភាព របស់យើងបន្ទាប់ពីលោកឪពុកអ្នកម្តាយបានប្រៀនប្រដៅយើងអំពីការថែទាំសុខភាព ដោយមុនបរិភោគត្រូវតែលាងសម្អាតដៃ ដូច្នេះក្នុងឱកាសសូមសំណូមពរដល់លោកឪពុកអ្នកម្តាយ ត្រូវយកចិត្តទុកក្នុងការអប់រំកូនៗរបស់ខ្លួន ឲ្យចេះសម្អាតខ្លួនប្រាណខ្លួនឯង ដែលជាប្រការមួយក្នុងការការពារសុខភាពផង និងការកាត់បន្ថយការចំណាយក្នុងការព្យាបាលជំងឺរបស់កូនកូនយើងផង ហេតុនេះឪពុកអ្នកម្តាយ មានតួនាទីសំខាន់ណាស់ក្នុងការចូលរួមថែទាំសុខភាពរបស់កូនៗរបស់ខ្លួន ។
សូមបញ្ជាក់ថា ទិវាពិភពលោកលាងសម្អាតដៃ ត្រូវបានប្រារព្ធឡើងលើកដំបូងបង្អស់នៅថ្ងៃទី១៥ ខែតុលា ឆ្នាំ ២០០៨ ក្នុងប្រទេសនានាទូទាំងពិភពលោក ខណៈបច្ចុប្បន្នជារៀងរាល់ឆ្នាំ ទិវាពិភពលោកលាងសម្អាតដៃ ត្រូវបានកំណត់យក ថ្ងៃទី១៥ ខែតុលា គឺជាថ្ងៃប្រារព្ធទិវានេះ ហើយក្រសួងអប់រំ យុវជន និងកីឡា សហការជាមួយក្រសួងអភិវឌ្ឍន៍ជនបទ ដោយមានការគាំទ្រពីដៃគូ អភិវឌ្ឍន៍នានា ព្រមទាំងវិស័យឯកជន បានប្រារព្ធទិវានេះជារៀងរាល់ឆ្នាំ ចាប់តាំងពីឆ្នាំ២០០៨ ។
សម្រាប់ខេត្តសៀមរាបគឺបានប្រារព្ធទិវាពិភពលោកលាងសម្អាតដៃនេះពីឆ្នាំ២០១៩មក ដោយបានប្រារព្ធទិវាលាងសម្អាតដៃ ចំនួន៤លើករួចមកហើយដែរ គឺលើកទី១ នៅក្រុងសៀមរាប , លើកទី២នៅស្រុកប្រាសាទបាគង លើកទី៣ នៅស្រុកអង្គរជុំ និង លើកទី៤ នៅស្រុកវ៉ារិន ។
គួររំលឹកថា នៅក្នុងពិធីនេះដែរ ក៏មានការកម្មវិធីដាំកូនឈើជានិមិត្តរូបអនុស្សាវរីយ៍ ការជ្រល់ដៃចូលក្នុងទឹកព៌ណ និង ការអនុវត្តសកម្មភាពសកម្មភាពលាងសម្អាតដៃរបស់គណៈអធិបតី និង អ្នកដែលបានមកចូលរួមពិធីនេះ ៕
រូបថត ៖ លោក ស៊ុំ គីន
អត្ថបទ ៖ លោក លីវ សាន្ត
